Gnìomharan 18 - Tiomnadh Nuadh (MacEachen) 1875

XVIII. CAIB. Pol a suidheachadh eaglais Chorint; a teagasg aig Ephesus: Apollo a dol gu Corint.

¹ ʼNan deigh so a fagail Athéne, thainig e do Chorint.

² ʼSa faighinn Iudhaich araid, do ʼm bʼ ainm Acuila, a rugadh am Pontus, ʼsa thainig beagan roimh sin as an Eadailte maille ri mhnaoi Prisilla (ʼs gun dʼ orduich Claudius do na h-Iudhaich uile an Roimh fhagail), thainig e gan ionnsuidh.

³ ʼS bho na bʼ ionann ceaird dhaibh, dhʼ fhuirich e comhla riu, agus dhʼ oibrich e (a nis bʼ e dianamh phaillionan bu cheaird daibh).

⁴ ʼS bha e reusonachadh anns an t-sinagog a h-uile sàbaid, a toirt iomraidh air ainm an Tighearna Iosa, ʼsa comhairleachadh nan Iudhach ʼs nan Greigeach.

⁵ ʼS nuair thainig Silas us Timoti á Macedonia, chinn Pol na bu diana ʼna theagasg, a togail fianuis do na h-Iudhaich gum bʼ e Iosa an Criosta.

⁶ Ach nuair bha iadsa cur ʼna aghaidh ʼs ri blaisbheum, chrath e aodach, us thuirt e riu: Biodh ur fuil air ur cinn fhein: tha mise glan, bho so suas theid mi thun nan cinneach.

⁷ ʼSa falbh as a sin, chaidh e stigh do thigh duine araid, Titus Iustus bʼ ainm dha, fear a bha toirt aoraidh do Dhia, ʼs aig an robh a thigh an taice ris an t-sinagog.

⁸ Us chreid Crispus, riaghladair an t-sinagoig, anns an Tighearna, maille ri thigh uile; agus moran de mhuinntir Chorint ga chluinntinn chreid iad, us bhaisteadh iad.

⁹ An sin thuirt an Tighearna ri Pol san oidhche ann an sealladh: Na biodh eagal ort, ach labhair, agus na bi samhach:

¹⁰ Chionn tha mise maille riut: ʼs cha toir duine ionnsuidh ort los do chiurradh: oir tha moran sluaigh agam anns a bhaile so.

¹¹ Us dhʼ fhuirich e an sin bliadhna agus sia miosan, a teagasg facal De ʼnam measg.

¹² Ach nuair bha Gallio ʼna uachdran air Achaia, dhʼ eirich na h-Iudhaich suas a dhʼ aon inntinn an aghaidh Phoil, ʼs thug iad gu cathair a bhreitheanais e,

¹³ A g-radh: Tha an duine so a comhairleachadh dhaoine aoradh a thoirt do Dhia an aghaidh an lagha.

¹⁴ ʼS nuair a bha Pol a teannadh ri bhial fhosgladh, thuirt Gallio ris na h-Iudhaich: Nam bu cuis anaceartais, no cionta ro ghraineil a bhiodh ann, O Iudhaich, bu cheart gun cuirinn suas leibh.

¹⁵ Ach ma ʼs ceisdean mu fhacail, ʼs ainmean, agus ur lagh fhein a thʼ ann, seallaibhse ris: cha mhath leam a bhith am bhritheamh orra sin.

¹⁶ Agus dhʼ fhuadaich e iad bho chathair a bhreitheanais.

¹⁷ An sin rug iad uile air Sosthenes, riaghladair an t-sinagoig, us ghabh iad air an lathair cathair a bhreitheanais: ʼs cha robh omhail aig Gallio do ni dhe so.

¹⁸ Ach Pol, an deigh dha fuireach fhathast fad moran laithean, a gabhail a chead dhe na braithrean, sheol e gu Siria (us Prisilla agus Acuila maille ris), an deigh a cheann a bhearradh aig Ceneris: oir bha e fo bhoid.

¹⁹ Agus thainig e gu Ephesus, us dhʼ fhag e an sin iadsan. Ach chaidh e fhein a stigh do ʼn t-sinagog, agus rinn e deaspud ris na h-Iudhaich.

²⁰ ʼS cha dʼ aontaich e leo, ʼs iad a g-iarraidh air fuireach na bʼ fhaide:

²¹ Ach a gabhail slan leo, ʼsa g-radh: Tillidh mi h-ugaibh a rithist, ma se toil De, dhʼ fhalbh e á Ephesus.

²² ʼSa dol air tir aig Cesaréa, chaidh e suas, ʼs chuir e fàilt air an eaglais, ʼs an sin ghabh e sios a dhʼ Antioch.

²³ Agus an deigh dha cuid de dhʼ uine a chaithe an sin, dhʼ fhalbh e, a siubhal ann an ordugh tromh dhuthaich Ghalatia us Phrigia, a daingneachadh nan deisciopul uile.

²⁴ A nis thainig Iudhach araid gu Ephesus, Apollo bʼ ainm dha, a rugadh an Alecsandria, duine fileanta, us cumhachdach anns na sgriobtuirean.

²⁵ Bha an duine so ionnsuichte ann an slighe an Tighearna; agus le e bhith dian ʼna spiorad, labhair agus theagaisg e gu dichiollach na nichean a bhuineadh do dhʼ Iosa, ʼs fios aige a mhain air baisteadh Eoin.

²⁶ Thòisich ma ta an duine so ri labhairt gu misneachail anns an t-sinagog. Nuair chual Prisilla agus Acuila e, ghabh iad gan ionnsuidh fhein e, us mhìnich iad slighe an Tighearna dha na bu dichiollaiche.

²⁷ ʼS nuair a bha mhiann air dol do Achaia, air dhaibh a bhrosnachadh, sgriobh na braithrean thun nan deisciopul iad a ghabhail ris. An deigh dha ruighinn, bu mhor an comhnadh a rinn e riusan a bhʼ air creidsinn.

²⁸ Oir le mor dhealas chomhdaich e gu follaiseach air na h-Iudhaich, agus dhʼ fhiach e dhaibh bho na sgriobtuirean gum bʼe Iosa an Criosta.