Gnìomharan 13 - Tiomnadh Nuadh (MacEachen) 1875

XIII. CAIB. Saul us Barnabas air an cur air adhart le gluasad an Spioraid Naoimh: Theagaisg iad ann an Ciprus ʼs ann an Antioch Phisidia.

¹ A nis bha san eaglais a bha an Antioch faidhean agus ollamhan, ʼnam measg sin bha Barnabas, agus Simon, ris an abrar Niger, agus Lucius bho Chirené, agus Manahen, a bha ʼna chomhalta Heroid an Tetrarch, agus Saul.

² ʼS nuair a bha iad a frithealadh do ʼn Tighearna, ʼsa trasgadh, thuirt an Spiorad Naomh riu: Cuiribh Saul ʼs Barnabas air leth dhomh air son na h-oibre, gus na shonraich mi iad.

³ An sin air dhaibh trasgadh, ʼs urnaigh a dhianamh, agus an lamhan a chur orra, leig iad air falbh iad.

⁴ Us chaidh iadsan, ʼs iad air an cur air an adhart mar so leis an Spiorad Naomh, do Sheleucia, agus á sin sheol iad gu Ciprus.

⁵ ʼS nuair a thainig iad gu Salamina, shearmonaich iad facal De ann an Sinagogan nan Iudhach. ʼS bha Eoin aca cuideachd san fhrithealadh.

⁶ Us nuair a shiubhail iad tromh ʼn eilean uile gu ruig Paphos, fhuair iad feareigin, a bha ʼna dhraoi, ʼna fhaidh-breige, ʼna Iudhach, dha ʼm bʼ ainm Bariésu,

⁷ A bha comhla ris an uachdran Sergius Paulus, duine tuigseach. Air dhasan Barnabas agus Saul a ghairm ga ionnsuidh, bha toil aige facal De chluinntinn.

⁸ Ach chuir Elimas an draoi (oir se sin an t-ainm aige air eadar-theangachadh,) ʼnan aghaidh, a sireadh an t-uachdran a thionndadh air falbh bho ʼn chreideamh.

⁹ Ach Saul, se sin Pol, ʼs e lan de ʼn Spiorad Naomh, a leagail giar shula air,

¹⁰ Thuirt e: O thusa, a tha lan de ʼn h-uile foill, ʼs de ʼn h-uile ceilg, a mhic an deomhain, a namhaid a h-uile ceartais, cha n-eil thu sgur de shlighean cearta an Tighearna fhiaradh.

¹¹ Us, seall, a nis tha lamh an Tighearna ort, ʼs bithidh thu dall, gun a ghrian fhaicinn car uine. ʼS ghrad-thuit ceo agus dubhar air; ʼsa dol mun cuairt shir e cuideigin a stiuradh air laimh e.

¹² An sin nuair chunnaic an t-uachdran na rinneadh, chreid e, a gabhail ioghnaidh ri teagasg an Tighearna.

¹³ ʼS nuair sheol Pol us iadsan a bha cuide ris bho Phaphos, thainig iad gu Pergé ann am Pamphilia. Ach dhealaich Eoin riu, us thill e gu Ierusalem.

¹⁴ Ach iadsan a gabhail tromh Phergé, thainig iad gu Antioch ann am Pisidia; ʼsa dol a stigh do ʼn t-sinagog air latha na sàbaid, rinn iad suidhe.

¹⁵ ʼS an deigh leughadh an lagha, ʼs nam faidhean, chuir riaghladairean an t-sinagoig gan ionnsuidh, a g-radh: A dhaoine ʼsa bhraithre, ma tha facal air bith de dhʼ earail agaibh do ʼn t-sluagh, abraibh e.

¹⁶ An sin Pol a g-eirigh, ʼsa smeideadh le ʼlaimh iad a bhith samhach, thuirt e: A dhaoine Israil, us sibhse air a bheil eagal De, eisdibh:

¹⁷ Thagh Dia pobull Israil ar n-aithrichean, ʼs dhʼ ardaich e am pobull, nuair a bha iad a tamh an talamh na h-Eiphit, ʼs le gairdean treun thug e mach iad aisde.

¹⁸ Agus fad dà fhichead bliadhna chuir e suas ri ʼm beusan anns an fhasach.

¹⁹ ʼS nuair a sgrios e seachd cinnidhean an talamh Chanaain, roinn e am fearann-sa orra le crannchur,

²⁰ Mar gum bʼ eadh an ceann ceithir chiad agus leth-chiad bliadhna; ʼs an deigh so thug e dhaibh britheamhan gu Samuel am faidh.

²¹ ʼS an deigh sin dh ʼiarr iad righ; us thug Dia dhaibh Saul mac Chis, fear dhà fhichead bliadhna, de threibh Bheniamin.

²² ʼS nuair thugadh esan air falbh, thog e suas dhaibh Dài gu bhith ʼna righ: air an tug e teisteanas a g-radh: Fhuair mi Dài mac Iesse, duine a reir mo chridhe, a ni mʼ uile thoil.

²³ De shliochd-sa, a reir a gheallaidh, thog Dia suas do dhʼ Israel Slanair, Iosa,

²⁴ An deigh do Eoin, roimh a thighinn-sa, baisteadh an aithreachais a shearmonachadh do shluagh Israil uile.

²⁵ ʼS nuair bha Eoin a coimhlionadh a thuruis, thuirt e: Cha mhise esan a tha sibh a saoilsinn gur mi, ach seall, tha neach a tighinn as mo dheigh, nach airidh mi air brogan a chas fhuasgladh.

²⁶ Fheara ʼsa bhraithre, a chlann-stuic Abrahaim, ʼs gach aon ʼnur measg anns a bheil eagal De, ʼsann gu ʼr n-ionnsuidhse chaidh facal an t-sabhalaidh so a chur.

²⁷ Oir luchd-tuinidh Ierusalem, agus an riaghladairean, le cion eolais air-san, ʼs air facail nam faidhean, a thathas a leughadh gach sàbaid, le toirt binn air-san choimhlion iad iad.

²⁸ ʼS ged nach dʼ fhuair iad cuis-bhàis air bith ann, dhʼ iarr iad cead air Pilat a chur gu bàs.

²⁹ ʼS nuair a choimhlion iad a h-uile ni a bha sgriobhte mu dheidhinn, thug iad nuas bho ʼn chrann e, ʼs chuir iad ann an uaigh e.

³⁰ Ach thog Dia suas e bho na mairbh air an treas latha; agus chunnacas e fad moran laithean leo-san,

³¹ A thainig suas comhla ris bho Ghalile do Ierusalem, a tha ʼnam fianuisean dha do ʼn t-sluagh gus an latha an diugh.

³² Agus tha sinn a g-innse dhuibhse a gheallaidh sin a thugadh dha ʼr n-aithrichean:

³³ Gun do choimhlion Dia e dhuinne an clann-sa, le Iosa a thogail suas, mar a tha e sgriobhte san darna salm: Is tu mo mhac, an diugh ghin mi thu.

³⁴ Ach gun do thog e e bho na mairbh gun e a thilleadh bho sin suas tuille gu truailleachd, thuirt e mar so: Ni mi firinneach dhuibh geallaidhnean naomha Dhài.

³⁵ Us uime sin tha e g-radh an aite eile: Cha leig thu le tʼ Aon Naomh truailleachd fhaicinn.

³⁶ Oir an deigh do Dhài ʼna linn fhein frithealadh do thoil De, chaidil e; ʼs chuireadh e ri ʼaithrichean, agus chunnaic e truailleachd.

³⁷ Ach cha n-fhac esan a thog Dia bho na mairbh truailleachd.

³⁸ Biodh fios agaibh ma ta, fheara ʼsa bhraithre, gur ann troimhse a tha mathanas pheacannan air a shearmonachadh dhuibh; agus bho ʼn h-uile ni, bho nach bʼ urrainn duibh a bhith air ur naomhachadh le lagh Mhaois,

³⁹ Tha gach aon, a chreideas, air a naomhachadh leis-san.

⁴⁰ Thugaibh an aire ma ta nach eirich dhuibh na chaidh innse leis na faidhean:

⁴¹ Faicibh, a luchd-taire, ʼs gabhaibh iongantas, agus theirigibh a dhith: oir oibrichidh mi obair ʼnur laithean, obair nach creid sibh, ged dhʼ innseadh duine air bith dhuibh e.

⁴² ʼS nuair a bha iad a dol a mach, ghuidh iad orra na briathran ciadna labhairt riu air an ath shàbaid.

⁴³ Agus nuair a sgaoil an sinagog, lean moran de na h-Iudhaich, ʼs de na coigrich chrabhach Pol agus Barnabas: a labhair riu, gan comhairleachadh iad a sheasamh buan ann an grasan De.

⁴⁴ Ach air an ath shàbaid chruinnich am baile uile ach beag a dhʼ eisdeachd ri facal De.

⁴⁵ Ach air do na h-Iudhaich leithid de shluagh fhaicinn, lionadh iad le farmad, ʼs le blaisbheum chuir iad an aghaidh nan nichean a bha air an radh le Pol.

⁴⁶ An sin thuirt Pol us Barnabas gu misneachail: ʼSann dhuibhse a thigeadh oirnn facal De a labhairt an toiseach: ach a chionn gum beil sibh ga dhiultadh, ʼs gu ʼr meas fhein neo-thoillteanach air beatha shiorruidh, seall, tha sinn a tionndadh ris na cinnich.

⁴⁷ Oir ʼsann mar sin a dhʼ àithn an Tighearna oirnn: Chuir mi thu na dʼ sholus do na cinnich, gus thu bhith na dʼ shabhaladh gu iomall an talmhuinn.

⁴⁸ ʼS nuair chuala na cinnich so, ghabh iad toilinntinn, ʼs ghloraich iad facal an Tighearna; agus chreid a mhiad ʼsa bha air an roimh-orduchadh gu beatha shiorruidh.

⁴⁹ Agus bha facal an Tighearna air a sgaoileadh feadh na ducha gu leir.

⁵⁰ Ach bhrosnaich na h-Iudhaich boirionnaich chrabhach agus uasal, agus priomh-dhaoine a bhaile, us thog iad geur-leanmhuinn an aghaidh Phoil agus Bharnabais: us thilg iad a mach iad as an criochan.

⁵¹ Ach chrath iadsan duslach an cas ʼnan aghaidh, agus thainig iad gu Iconium.

⁵² Agus bha na deisciopuil air an lionadh le sòlas agus leis an Spiorad Naomh.