Ephèsianach 6 - Tiomnadh Nuadh (MacEachen) 1875

VI. CAIB. Dleasnasan cloinne agus sheirbhiseach: armachd a Chriostaidh.

¹ A chlann, bithibh umhailt dha ʼr parantan san Tighearna: oir tha so ceart.

² Thoir onair dha tʼ athair dha dʼ mhathair: si so a chiad fhainte le gealladh:

³ Los gun soirbhich leat, agus gum bi fad laithean agad air talamh.

⁴ Agus sibhse, aithrichean, na brosnaichibh ur clann gu feirg: ach togaibh suas iad ann an oilein ʼs ann an smachd an Tighearna.

⁵ A sheirbhisich, bithibh umhailt dha ʼr maighistirean a reir na feola le athadh agus ball-chrith, ann an treibhdhireas ur cridhe, mar do Chriosta:

⁶ Cha n-ann ʼnur seirbhisich-sula, mar a toileachadh dhaoine, ach mar sheirbhisich Chriosta, a dianamh toil De bho ʼn chridhe,

⁷ Le deagh thoil ri seirbhis mar do ʼn Tighearna, ʼs cha n-ann do dhaoine:

⁸ A tuigsinn gum faigh gach aon a cheart mhath a ni e, ge bith e, bho ʼn Tighearna, co-dhiu is saoranach no daoranach e.

⁹ Ach sibhse, a mhaigtistirean, dianaibh na nichean ciadna dhaibh-san, a seachnadh maoitheadh: a tuigsinn gum beil an Tighearna aca-san agus agaibhse ann am flathanas; ʼs nach eil eisimeil aige ri pearsa dhaoine.

¹⁰ A thaobh na cuid eile, a bhraithrean, bithibh air ur neartachadh san Tighearna, agus ann am feart a chumhachd.

¹¹ Cuiribh oirbh armachd Dhe, air chor ʼs gur urrainn duibh seasamh an aghaidh ribeachan an deomhain:

¹² Oir cha n-ann an aghaidh feola agus fala a tha ar gleachd, ach an aghaidh phrionnsachan us chumhachdan, an aghaidh riaghladairean saoghal an dorchadais so, an aghaidh spioraid an uilc sna h-ard-ionadan.

¹³ Air an aobhar sin glacaibh armachd Dhe ann an rathad ʼs gur urrainn duibh seasamh anns an droch latha, agus seasamh gu coimhlionta anns gach ni.

¹⁴ Seasaibh ma ta le ʼr leasraidh crioslaichte le firinn, agus uchd-eideadh a cheartais oirbh,

¹⁵ ʼS mar chaiseirt deisealachd soisgeul na sithe,

¹⁶ Anns a h-uile ni a gabhail sgiath a chreidimh, leis am faod sibh uile ghathan teinteach an fhir is miosa a mhuchadh;

¹⁷ Agus gabhaibh h-ugaibh clogaid an t-sabhalaidh, us claidheamh an Spioraid (se sin facal De).

¹⁸ Leis a h-uile urnaigh agus achanaich a guidhe san spiorad gach àm, ʼs as leth sin a caithris leis a h-uile durachd agus aslachadh air son nan naomh uile,

¹⁹ Agus air mo shonsa, gun toirear labhairt dhomh gus mo bhial fhosgladh gu misneachail, los mistire an t-soisgeil a dhianamh aithnichte,

²⁰ ʼS mi am theachdair air a shon ann an cuibhreach, los mi bhith misneachail ann, gu labhairt mar is còir dhomh.

²¹ Ach gu brath a bhith agaibh mu nichean dha mʼ thaobhsa, us ciod ris a bheil mi: cuiridh Tichicus, mo bhrathair ro ghaolach, agus fear-frithealaidh dileas anns an Tighearna, air shuilean dhuibh gach ni;

²² A chuir mi h-ugaibh a dhʼ aon mhathas, gu fios a bhith agaibh air na tha tachairt dha ʼr taobh-ne, agus gus am furtaich e air ur cridheachan.

²³ Gun robh sith do na braithrean agus carrantachd le creideamh bho Dhia an t-Athair, ʼs bho ʼn Tighearna Iosa Criosta.

²⁴ Grasan gun robh dhaibh-san uile, a tha toirt gaoil dha ʼr Tighearna Iosa Criosta ann an neo-thruailleachd. Amen.