Ephèsianach 2 - Tiomnadh Nuadh (MacEachen) 1875

II. CAIB. Tha ar math uile a tighinn tromh Chriosta: se ar sith.

¹ Agus sibhse nuair bha sibh marbh ʼnur ciontan ʼs nur peacannan,

² Anns an dʼ imich sibh roimh so, a reir abhuist an t-saoghail so, a reir prionns cumhachd an athair so, an spiorad a tha nis a g-oibreachadh ann an cloinn a mhi-chreidimh,

³ Anns an robh sinn uile mar an ciadna aon uair a caithe ar beatha ann am miannan ar feola, a dianamh toil na feola agus a smaointean, agus a bha sinn a thaobh naduir ʼnar cloinn feirge, mar bha càch:

⁴ Ach Dia (a tha saibhir an trocair) le ro mhiad a charrantachd, leis na ghradhaich e sinn,

⁵ Agus nuair a bha sinn marbh ann am peacannan, bheothaich e sinn ann an Criosta (ʼs gur ann le ghrasan-sa a tha sibh sabhailte),

⁶ Agus thog e suas sinn maille ris, agus thug e oirnn suidhe comhla ris anns na h-ardaibh ann an Iosa Criosta;

⁷ A dhʼ fhiachuinn do linntean ri tighinn saibhreas lan-phailt a ghrasan ʼna fhialachd dhuinne ann an Iosa Criosta.

⁸ Oir le grasan tha sibh sabhailte tromh chreideamh, agus so cha n-ann bhuaibh fhein: oir is gibht Dhe e,

⁹ Cha n-ann bho oibrichean, gus nach dian neach air bith uaill.

¹⁰ Oir is sinne obair a laimh, air ar cruthachadh ann an Iosa Criosta anns na deagh ghniomhan, a dhʼuidheamaich Dia gus sinn a dhʼ imeachd unnta.

¹¹ Air an aobhar sin cuimhnichibh gun robh sibh aon uair ʼnur cinnich anns an fheoil, ʼs gun canteadh ribh an neo-thimchioll-ghearradh le sin ris an abrar timchioll-ghearradh san fheoil diante le lamhan:

¹² Chionn gun robh sibh an uair sin as aogais Chriosta, ʼnur coigrich do chomunn Israil, aineolach air an tiomnadh, gun dochas ris a ghealltanas, ʼs gun Dia anns an t-saoghal so.

¹³ Ach a nis ann an Iosa Criosta tha sibhse, a bha aon uair an cein, air ur toirt faisg le fuil Chriosta.

¹⁴ Oir se esan ar sith, a rinn an dithis ʼnan aon, a bristeadh sios balla-mhiadhoin an dealachaidh, an naimhdeas ʼna fheoil fhein:

¹⁵ A cur air chul lagh nan orduighean le reachdan, gus an dithis a dhianamh ʼnan aon duine ùr ann fhein, a dianamh sithe,

¹⁶ Agus an dithis a reiteachadh ri Dia ann an aon chorp leis a chrois, a sgriosadh an naimhdeis ann fhein.

¹⁷ ʼSa tighinn shoisgeulaich e sith dhuibhse a bha fad as; agus sith dhaibh-san a bha ʼm faisg:

¹⁸ Oir troimh-san tha rathad againn le cheile ann an aon Spiorad thun an Athar.

¹⁹ A nis ma ta cha n-eil sibh nas fhaide ʼnur n-aoidhean ʼs ʼnur coigrich, ach tha sibh an co-chomunn nan naomh, ʼs ʼnur teaghlach aig Dia,

²⁰ Togte air steidh nan ostal ʼs nam faidhean, Iosa Criosta fhein ʼna chloich-chinn na h-oisne:

²¹ Anns a bheil an t-aitreabh uile, ceangailte ri cheile, a g-eirigh suas ʼna theampull naomh san Tighearna,

²² Anns a bheil sibhse cuideachd togte gu bhith ʼnur n-aros-comhnuidh do Dhia anns an Spiorad.