Eòin 7 - Tiomnadh Nuadh (MacEachen) 1875

VII. CAIB. Criosta dol gu feill nam paillionan ʼsa teagasg san teampull.

¹ Agus ʼnan deigh so bha Iosa a g-imeachd feadh Ghalile: oir cha robh toil aige imeachd feadh Iudéa: a thaobh gun robh na h-Iudhaich a g-iarraidh a mharbhadh.

² A nis bha là feill-paillion nan Iudhach aig laimh.

³ Us thuirt a bhraithrean ris: Falbh á so, agus rach gu Iudéa, los gum faic do dheisciopuil cuideachd do ghniomhran a tha thu dianamh.

⁴ Oir cha dian neach air bith ni an uaigneas, us deidh aig fhein a bhith am follais: ma tha thu dianamh nan nichean so, nochd thu fhein do ʼn t-saoghal.

⁵ Oir cha robh a bhraithrean fhein a creidsinn ann.

⁶ An sin thuirt Iosa riu: Cha tainig an t-àm agam-sa fhathast: ach tha an t-àm agaibhse daonnan deas.

⁷ Cha n-urrainn do ʼn t-saoghal fuath a thoirt dhuibhse: ach tha fuath aig ormsa: chionn gum beil mi togail fianuis air, gum beil a dhianadas olc.

⁸ Gabhaibhse suas a dhʼ ionnsuidh na feille so, ach cha teid mise suas thun na feille so: chionn nach do choimhlionadh mʼ àmsa fhathast.

⁹ An deigh dha iad so radh, dhʼ fhan e fhein ann an Galile.

¹⁰ Ach an deigh dha bhraithrean dol suas, chaidh e fhein an sin suas thun na feille, cha n-ann gu follaiseach, ach mar gum bʼ ann gu h-uaigneach.

¹¹ Uime sin bha na h-Iudhaich ga shireadh latha na feille, ʼsa g-radh: Càite am beil e?

¹² ʼS bha monmhur mor am measg an t-sluaigh mu dheidhinn. Oir bha cuid a g-radh: Tha e ʼna dhuine math. ʼS bha cuid eile g-radh: Cha n-eil, ach tha e a mealladh an t-sluaigh.

¹³ Ach cha robh duine air bith a labhairt gu follaiseach uime, air eagal nan Iudhach.

¹⁴ A nis mu mhiadhon na feille, chaidh Iosa suas doʼn teampull, agus theagaisg e.

¹⁵ Agus ghabh na h-Iudhaich ioghnadh, a g-radh: Ciamar is aithne do ʼn duine so litrichean, agus nach dʼ ionnsuich e?

¹⁶ Fhreagair Iosa iad, us thuirt e: Cha leam fhein mo theagasg, ach leis-san a chuir mi.

¹⁷ Ma ʼs math le duine air bith a thoil-sa dhianamh, bithidh fios aige mu ʼn teagasg, co-dhiu ʼsann bho Dhia a tha e, no gur h-ann bhuam fhein a tha mise labhairt.

¹⁸ Esan a labhras bhuaithe fhein, tha e sireadh a ghloire fhein: ach esan a shireas a ghloir-san, a chuir e, tha e firinneach, ʼs cha n-eil eucoir sa bith ann.

¹⁹ Nach tug Maois dhuibh an lagh? ʼs cha n-eil a h-aon agaibh a cumail an lagha.

²⁰ Car-son tha sibh a sireadh mise mharbhadh? Fhreagair an sluagh, us thuirt iad: Tha deomhan agad: co tha sireadh do mharbhadh?

²¹ Fhreagair Iosa, us thuirt e riu: Aon obair rinn mi, agus tha sibh uile a gabhail iongantais.

²² A rithist thug Maois dhuibh an timchioll-ghearradh (cha n-ann chionn gum beil e bho Mhaois, ach bho na h-aithrichean); us air an t-sàbaid timchioll-ghearraidh sibh duine.

²³ Ma tha duine a gabhail an timchioll-ghearraidh air latha na sàbaid, gus nach bristear lagh Mhaois: am beil fearg agaibh riumsa, a chionn gun do leighis mi duine gu h-iomlan air latha na sàbaid?

²⁴ Na tugaibh breth a reir coltais, ach thugaibh breth cheart.

²⁵ Uime sin bha cuid de mhuinntir Ierusalem a g-radh: Nach e so esan a tha iad a g-iarraidh a mharbhadh?

²⁶ Us, fiach, tha e labhairt gu follaiseach, ʼs cha n-eil iad a g-radh ni ris. Am beil na riaghladairean air gabhail ris a cheart rireadh gur e so an Criosta?

²⁷ Ach ʼs aithne dhuinn an duine so, co as a tha e: ach nuair thig Criosta, cha bhith fios aig duine air bith co as a tha e.

²⁸ Air an aobhar sin ghlaodh Iosa anns an teampull, a teagasg ʼsa g-radh: Is aithne dhuibh mi, agus is aithne dhuibh co as a tha mi; ʼs cha tainig mi bhuam fhein, ach tha esan fior, a chuir mi, neach nach aithne dhuibhse.

²⁹ Is aithne dhomhsa e: chionn tha mi bhuaithe, agus is esan a chuir mi.

³⁰ Uime sin dhʼiarr iad a ghlacadh: ʼs cha do chuir duine lamh air: a chionn nach robh uair-sa air tighinn fhathast.

³¹ Ach chreid moran de ʼn t-sluagh ann, us bha iad a g-radh: Nuair a thig Criosta, an dian e tuille mhiarailtean na iad so, a tha an duine so dianamh?

³² Chuala na Phairisich an sluagh a talach mu na nichean so ga thaobh; agus chuir na riaghladairean ʼs na Phairisich maoir gus a ghlacadh.

³³ Uime sin thuirt Iosa riu: Tacan beag fhathast tha mi cuide ribh; an sin tha mi dol ga ionnsuidhse, a chuir mi.

³⁴ Iarraidh sibh mi, ʼs cha n-fhaigh sibh mi: agus far am bi mise, cha n-urrainn duibhse tighinn.

³⁵ Uime sin thuirt na h-Iudhaich ʼnam measg fhein: Càite bheil e gu dol, far nach fhaigh sinn e? Bheil e gu dol thun nan daoine sgapte measg nan cinneach, ʼs na cinnich a theagasg?

³⁶ Ciod e am facal so, a thuirt e: Iarraidh sibh mi, ʼs cha n-fhaigh sibh mi; us far a bheil mise, cha n-urrainn duibhse tighinn?

³⁷ Agus air an latha mhor mu dheireadh de ʼn fheill, sheas Iosa, us dhʼeigh e, a g-radh: Ma tha pathadh air neach sam bith, thigeadh e h-ugamsa, agus oladh e.

³⁸ Esan a chreideas unnamsa, mar tha an sgriobtur a g-radh, as a bhroinn-sa struthaidh aibhnichean de dhʼ uisge beo.

³⁹ A nis thuirt e so mu ʼn spiorad a gheobhadh iadsan, a chreideadh ann: oir cha tugadh an spiorad seachad fhathast: a bhrigh nach robh Iosa fhathast air a ghlorachadh.

⁴⁰ Uime sin nuair chuala cuid am measg an t-sluaigh sin na briathran so, thuirt iad: Se so a rireadh am faidh.

⁴¹ Thuirt cuid eile: Se so Criosta. Ach thuirt roinn eile: An tig Criosta á Galile?

⁴² Nach eil an sgriobtur a g-radh: Gur ann bho shiol Dhài, ʼs bho bhaile Bhethlehem far an robh Dài, a thig Criosta?

⁴³ Mar sin dhʼeirich easaontas am measg an t-sluaigh as a leth.

⁴⁴ Agus bha toil aig cuid diubh a ghlacadh: ach cha do chuir duine sa bith lamh air.

⁴⁵ An sin thainig na maoir thun nan ard-shagart ʼs nam Phairiseach. Agus thuirt iadsan riu: Car-son nach tug sibh leibh e?

⁴⁶ Fhreagair na maoir: Cha do labhair duine riamh mar an duine so.

⁴⁷ Fhreagair ma ta na Phairisich iad: A bheil sibhse cuideachd air ur mealladh?

⁴⁸ Na chreid aon fhear de na riaghladairean ann, no de na Phairisich?

⁴⁹ Ach an sluagh so dha nach aithne an lagh, tha iad mollaichte.

⁵⁰ Thuirt Nicodemus riu, esan a thainig ga ionnsuidh trath oidhche, ʼs e fhein ʼna fhear dhiubh:

⁵¹ Am beil an lagh againne a toirt breth air duine gun chluinntinn bhuaithe fhein an toiseach, ʼs mu ʼm bi fios ciod a tha e dianamh?

⁵² Fhreagair iadsan, us thuirt iad ris: An Galiléanach thusa cuideachd? Rannsaich na sgriobtuirean, agus faic nach eirich faidh á Galile.

⁵³ Us thill gach duine gu thigh fhein.