Eòin 6 - Tiomnadh Nuadh (MacEachen) 1875

VI. CAIB. Criosta riarachadh choig mile le coig builionnan; a coiseachd air a mhuir: ʼsa labhairt mu aran na beatha.

¹ ʼNan deigh so chaidh Iosa thairis air muir Ghalile, si sin muir Thiberiais;

² Agus lean moran sluaigh e, a chionn ʼs gum faca iad na miarailtean a rinn e orrasan a bha tinn.

³ Uime sin chaidh Iosa suas air beinn: agus shuidh e an sin maille ri dheisciopuil.

⁴ A nis bha chàisg, là feill nan Iudhach, aig laimh.

⁵ Nuair ma ta a thog Iosa suas a shuilean, ʼsa chunnaic e anabarr sluaigh air tighinn ga ionnsuidh, thuirt e ri Philip: Co as a cheannaicheas sinn aran, los gun ith iad so?

⁶ Ach thuirt e so gu diachuinn a chur air: oir bʼ aithne dha fhein ciod a bha e dol a dhianamh.

⁷ Fhreagair Philip e: Cha n-fhoghainn luach dà chiad peighinn de dhʼ aran dhaibh, gus gach aon a dhʼ fhaighinn beagain.

⁸ Thuirt a h-aon dhe dheisciopuil, Aindris, brathair Shimoin Pheadair, ris:

⁹ Tha giullan an so aig a bheil coig builionnan eorna, ʼs dà iasg: ach ciod iad sin am measg na h-uibhir?

¹⁰ An sin thuirt Iosa: Thugaibh air na daoine suidhe sios. A nis bha moran feoir san aite. Shuidh ma ta na daoine, an aireamh mu thimchioll choig mile.

¹¹ Agus ghlac Iosa na builionnan; ʼs an deigh dha taing a thoirt, riaraich e orrasan a bha ʼnan suidhe; mar an ciadna de ʼn iasg, a mhiad ʼsa bʼ aill leo.

¹² Us nuair bha iad riaraichte, thuirt e ri dheisciopuil: Tionailibh na fuighlichean, a dhʼfhagadh, los nach teid iad a dholaidh.

¹³ Thrus iad uime sin, agus lion iad dà chliabh dhiag de spruileach nan coig builionnan eorna, a dhʼfhagadh leo-san a dhʼith.

¹⁴ Le sin nuair chunnaic na daoine sin a mhiarailt a rinn Iosa, thuirt iad: Gu firinneach se so am faidh a tha gu tighinn thun an t-saoghail.

¹⁵ Uime sin nuair a thuig Iosa gun robh iad dol a thighinn gus a spionadh leo gu righ a dhianamh dheth, theich e rithist ʼna aonar do ʼn bheinn.

¹⁶ ʼS nuair a thainig an t-anamuch, chaidh a dheisciopuil sios thun na mara.

¹⁷ ʼSa dol air bord saghach, chaidh iad thar a mhuir do Chapharnaum; agus bha e nis dorcha; ʼs cha robh Iosa air tighinn gan ionnsuidh.

¹⁸ Us dhʼ at a mhuir suas le gaoith mhoir a sheid.

¹⁹ Nuair ma ta bha iad air iomradh mun cuairt de choig stàdan fichead, no deich thar fhichead, chunnaic iad Iosa a coiseachd air a mhuir, ʼsa tarruinn teann air an t-saghach, agus ghabh iad eagal.

²⁰ Us thuirt e riu: Is mise a thʼann, na gabhaibh eagal.

²¹ Le sin bha toil aca a ghabhail a stigh do ʼn t-saghach; ʼs air ball bha an saghach aig an tir gus an robh iad a dol.

²² Air an là ʼr na mhaireach chunnaic an sluagh a sheas air taobh eile na mara, nach robh saghach sam bith eile an sin ach an t-aon fhear, ʼs nach robh Iosa air dol air bord comhla ri dheisciopuil, ach gun deachaidh a dheisciopuil air falbh leo fhein:

²³ Ach thainig saghaichean eile bho Thiberias, teann air an aite anns na dhʼith iad aran, an deigh do ʼn Tighearna taing a thoirt.

²⁴ Nuair ma ta chunnaic an sluagh nach robh Iosa an sin, no dheisciopuil, ghabh iad saghaichean, ʼs thainig iad gu Capharnaum, a sireadh Iosa.

²⁵ ʼS nuair a fhuair iad e air taobh eile na mara, thuirt iad ris: A Rabbi, cuin a thainig thu an so?

²⁶ Fhreagair Iosa, us thuirt e: Gu firinneach firinneach tha mi g-radh ribh: tha sibh gam shireadh, cha n-ann air son gum faca sibh na miarailtean, ach air son gun dʼ ith sibh de na builionnan, ʼs gun dʼ fhuair sibh ur sàsachadh.

²⁷ Na saothraichibh air son an tiochd-an-tir a theid a dhith, ach air son an tiochd-an-tir a mhaireas gus a bheatha shiorruidh, a bheir Mac an duine dhuibh. Oir esan sheul Dia an t-Athair.

²⁸ Uime sin thuirt iad ris: Ciod a ni sinn, los gun oibrich sinn obair Dhe?

²⁹ Fhreagair Iosa, us thuirt e riu: Si so obair Dhe, sibh a chreidsinn annsan a chuir e.

³⁰ Air an aobhar sin thuirt iad ris: Ciod an comharradh ma ta a ni thu, chum gum faic sinn, ʼs gun creid sinn thu? Ciod a tha thu g-oibreachadh?

³¹ Dhʼith ar n-aithrichean manna anns an fhasach, mar a tha sgriobhte: Thug e aran dhaibh bho neamh gus ithe.

³² An sin thuirt Iosa riu: Gu fior fior tha mi g-radh ribh: Cha tug Maois dhuibh aran bho neamh, ach tha mʼ Athair toirt dhuibh an fhior arain bho neamh.

³³ Oir se sin aran De a tha tighinn a nuas bho neamh, ʼsa tha toirt beatha do ʼn t-saoghal.

³⁴ Uime sin thuirt iad ris: A Thighearna, thoir an t-aran so dhuinn an comhnuidh.

³⁵ Us thuirt Iosa riu: Is mise aran na beatha: an neach a thig gam ionnsuidhse, cha bhi acras air; ʼsan neach a chreideas unnamsa, cha bhi pathadh air a chaoidh.

³⁶ Ach thuirt mi ribh, gum faca sibhse cuideachd mi, ʼs cha n-eil sibh a creidsinn.

³⁷ Thig gach aon a bheir an t-Athair dhomh gam ionnsuidh; ʼs an neach a thig gam ionnsuidh, cha thilg mi mach:

³⁸ Oir thainig mi nuas bho neamh, cha n-ann gus mo thoil fhein a dhianamh, ach a thoil-san a chuir mi.

³⁹ A nis si so toil an Athar a chuir mi, nach caillinn gin dhiusan uile, a thug e dhomh, ach gun togainn suas e rithist air an latha dheireannach.

⁴⁰ Ach si so toil mʼAthar a chuir mi, gum bi a bheatha shiorruidh aig gach aon a chi am Mac, ʼsa chreideas ann, agus togaidh mise suas e air an latha dheireannach.

⁴¹ Uime sin rinn na h-Iudhaich monmhur uime, chionn gun tuirt e: Is mise an t-aran beo a thainig a nuas bho neamh.

⁴² Agus thuirt iad: Nach e so Iosa mac Ioseiph, aig a bheil athair agus mathair a ʼs aithne dhuinn? Ciamar ma ta their esan: Thainig mi nuas bho neamh?

⁴³ Uime sin fhreagair Iosa, us thuirt e riu: Na bithibh ri monmhur ʼnur measg fhein.

⁴⁴ Cha n-urrainn do dhuine sam bith tighinn gam ionnsuidhse, mur tarruinn an t-Athair, a chuir mi, e; agus togaidh mise suas e air an latha dheireannach.

⁴⁵ Tha e sgriobhte sna faidhean: Bithidh iad uile air an teagasg le Dia. Tha gach aon, a chuala bho ʼn Athair, ʼsa dhʼfhaghluim, a tighinn h-ugamsa.

⁴⁶ Cha n-e gum faca neach: air bith an t-Athair, ach esan a tha bho Dhia, chunnaic esan an t-Athair.

⁴⁷ Gu firinneach firinneach tha mi a g-radh ribh: Esan a tha creidsinn unnamsa, tha bheatha shiorruidh aige.

⁴⁸ Is mise aran na beatha.

⁴⁹ Dhʼith ur n-aithrichean manna san fhasach, agus fhuair iad bàs.

⁵⁰ Se so an t-aran a tha tighinn a nuas bho neamh; los, ma dhʼitheas neach air bith dheth, nach fhaigh e bàs.

⁵¹ Is mise an t-aran beo, a thainig a nuas bho neamh.

⁵² Ma dhʼitheas neach air bith dhe ʼn aran so, bithidh e beo gu siorruidh; ʼs an t-aran a bheir mise seachad, se mʼ fheoil e air son beatha an t-saoghail.

⁵³ Air son so bha na h-Iudhaich a consachadh ri cheile, a g-radh: Ciamar is urrainn do ʼn duine so fheoil a thoirt dhuinn gus a h-ithe?

⁵⁴ An sin thuirt Iosa riu: Gu firinneach firinneach tha mi g-radh ribh: mur ith sibh feoil Mhic an duine, ʼs mur ol sibh fhuil, cha bhi bheatha agaibh unnaibh.

⁵⁵ An neach a dhʼitheas mʼ fheoil, ʼsa dhʼolas mʼ fhuil, tha bheatha shiorruidh aige; us togaidh mi suas e air an latha dheireannach.

⁵⁶ Oir is biadh firinneach mʼ fheoil; agus is deoch fhirinneach mʼ fhuil.

⁵⁷ An neach a dhʼitheas mʼ fheoil, ʼsa dhʼolas mʼ fhuil, gabhaidh e comhnuidh unnamsa, agus mise annsan.

⁵⁸ Mar a chuir an t-Athair beo mise, ʼsa tha mise beo tromh mʼ Athair: mar sin an neach a dhʼitheas mise, bithidh e beo tromham-sa.

⁵⁹ Se so an t-aran a thainig a nuas bho neamh. Cha n-ann mar a dhʼith ur n-aithrichean manna, ʼsa fhuair iad bàs. An neach a dhʼitheas an t-aran so, bithidh e beo gu siorruidh.

⁶⁰ Iad so labhair e, ʼs e teagasg anns an t-sinagog an Capharnaum.

⁶¹ Uime sin thuirt moran dhe dheisciopuil, ʼs iad a cluinntinn so: Is cruaidh am facal so, co is urrainn eisdeachd ris?

⁶² Ach Iosa a tuigsinn ann fhein, gun robh a dheisciopuil ri monmhur mu so, thuirt e riu: Am beil sibh a gabhail sgainneil á so?

⁶³ Ciod ma ta ma chi sibh Mac an duine a dol suas far an robh e roimhe?

⁶⁴ Se an Spiorad a tha beothachadh: cha n-eil buannachd sam bith san fheoil. Na briathran a labhair mi ribh, is spiorad agus beatha iad.

⁶⁵ Ach tha cuid dhibh nach eil a creidsinn. Oir bha fios aig Iosa bho thoiseach co bʼ iad nach robh a creidsinn, agus co am fear a bhrathadh e.

⁶⁶ Us thuirt e: ʼSann as leth sin a thuirt mi ribh nach urrainn do neach air bith tighinn h-ugamsa, mur toirear dha e le mʼ Athair.

⁶⁷ An deigh so chaidh moran dhe dheisciopuil air an ais; ʼs cha dʼimich iad tuille comhla ris.

⁶⁸ An sin thuirt Iosa ris na dhà-dhiag: An aill leibhse falbh cuideachd?

⁶⁹ Agus fhreagair Simon Peadar e: A Thighearna, co dhʼionnsuidh an teid sinn? Tha briathran na beatha siorruidh agad.

⁷⁰ Agus chreid sinne, agus ʼs aithne dhuinn gur tu Criosta Mac Dhe.

⁷¹ Fhreagair Iosa iad: Nach do thagh mise sibh a dhà-dhiag? agus tha h-aon agaibh ʼna dheomhan.

⁷² Ach labhair e mu Iudas Iscariot, mac Shimoin: oir bʼesan a bha gus a bhrath, ʼs gum bu h-aon de na dhà-dhiag e.