Eòin 3 - Tiomnadh Nuadh (MacEachen) 1875

III. CAIB. Comhradh Chriosta ri Nicodemus: teisteanas Eoin.

¹ Agus bha duine ann dhe na Phairisich, dha ʼm bʼ ainm Nicodemus, a bha ʼna riaghladair air na h-Iudhaich.

² Thainig an duine so gu Iosa san oidhche, us thuirt e ris: A Rabbi, is aithne dhuinn gun tainig thu na dʼ fhear-teagaisg bho Dhia: oir cha n-eil e an comas duine air bith na miarailtean sin a dhianamh, a tha thusa dianamh, mur biodh Dia maille ris.

³ Fhreagair Iosa, us thuirt e ris: Amen, amen, tha mi g-radh riut: mur bi duine air a bhreith a rithist, cha n-urrainn e rioghachd Dhe fhaicinn.

⁴ Thuirt Nicodemus ris: Ciamar is urrainn do dhuine a bhith air a bhreith, nuair a tha e sean? an urrainn e dol a stigh a rithist am broinn a mhathar, ʼsa bhith air ath-bhreith?

⁵ Fhreagair Iosa: Amen, amen, tha mi g-radh riut: mur bi duine air a bhreith a rithist le uisge ʼs leis an Spiorad Naomh, cha n-urrainn e dol a stigh do rioghachd Dhe.

⁶ Is feoil na rugadh bho fheoil; agus is spiorad na rugadh bho spiorad.

⁷ Na gabh iongantas, gun tuirt mi riut: Feumaidh sibh a bhith air ur breith as ùr.

⁸ Tha an spiorad a seideadh far an aill leis; ʼs tha thu a cluinntinn a ghuth, ach cha n-aithne dhut co as a tha e tighinn, no ceana tha e dol: is amhuil a tha h-uile h-aon a rugadh leis an spiorad.

⁹ Fhreagair Nicodemus, us thuirt e ris: Ciamar a dhʼ fhaodas iad sin a bhith?

¹⁰ Fhreagair Iosa, us thuirt e ris: A bheil thusa na dʼ mhaighistir ann an Israel, ʼs tu aineolach air na nichean so?

¹¹ Gu firinneach firinneach tha mi g-radh riut gum beil sinn a labhairt an ni is aithne dhuinn, ʼsa toirt fianuis air an ni a chunnaic sinn, ʼs cha n-eil sibhse gabhail ri ar fianuis.

¹² Ma labhair mi nichean talmhaidh ribh, ʼs nach eil sibh a creidsinn: ciamar a chreideas sibh, ma their mi ribh nichean neamhaidh?

¹³ Agus cha deach duine air bith suas do fhlathanas, ach esan a thainig a nuas bho neamh, Mac an duine a tha air neamh.

¹⁴ Agus mar a thog Maois an nathair suas san fhasach, is amhuil a dhʼfheumas Mac an duine a bhith air a thogail suas;

¹⁵ Los nach teid neach sam bith, a tha creidsinn ann, a dhith, ach gum bi a bheatha shiorruidh aige.

¹⁶ Oir thug Dia leithid de ghaol do ʼn t-saoghal, gun tug e ʼaonaghin Mic seachad; chum nach teid a h-aon air bith, a tha creidsinn ann, a dhith, ach gum bi a bheatha shiorruidh aige.

¹⁷ Oir cha do chuir Dia a Mhac thun an t-saoghail gus an saoghal a dhiteadh, ach gus an saoghal a bhith air a shabhaladh leis.

¹⁸ Esan a chreideas ann, cha dhitear e: ach esan nach creid, tha e cheana air a dhiteadh: a chionn nach eil e creidsinn ann an ainm aonghin Mhic Dhe.

¹⁹ Agus se so an diteadh: a chionn gun tainig an solus thun an t-saoghail, ʼs gum bu docha le daoine an dorchadas na ʼn solus: oir bha an gniomhran olc.

²⁰ Oir tha grain aig gach neach, a tha dianamh an uilc, air an t-solus, ʼs cha n-eil e tighinn a dhʼionnsuidh an t-soluis, gus nach cronaichear ʼoibrichean:

²¹ Ach am fear a ni an fhirinn, thig e thun an t-soluis, gus oibrichean a bhith air am foillseachadh: a chionn gur h-ann an Dia a rinneadh iad.

²² ʼNan deigh sin thainig Iosa agus a dheisciopuil gu talamh Iudéa; us rinn e comhnuidh an sin maille riu, agus bha e a baisteadh.

²³ ʼS bha Eoin cuideachd a baisteadh ann an Ennon lamh ri Salim: a chionn ʼs gun robh moran uisge an sin, us thainig iad, agus bhaisteadh iad.

²⁴ Oir cha do thilgeadh Eoin fhathast am priosan.

²⁵ ʼS dhʼeirich ceisd eadar cuid de dheisciopuil Eoin agus na h-Iudhaich mu dheidhinn glanaidh.

²⁶ Agus thainig iad gu Eoin, us thuirt iad ris: A Rabbi, seall, tha esan, a bha comhla riut air taobh thall Iordain, ʼs air an tug thu fianuis, a baisteadh, agus tha daoine uile a tighinn ga ionnsuidh.

²⁷ Fhreagair Eoin, us thuirt e: Cha n-urrainn do dhuine ni air bith ghlacadh, mur toirear dha e bho neamh.

²⁸ Tha sibhse fhein a togail fianuis dhomh, gun tuirt mi: Cha mhi Criosta, ach gun deach mo chur roimhe.

²⁹ Is esan fear na bainnse aig a bheil bean na bainnse: ach tha caraid fear na bainnse, a tha ʼna sheasamh ʼs ga eisdeachd, a gabhail toil-inntinn le aighear á guth fear na bainnse. Mar sin tha mo thoil-inntinn-sa air a coimhlionadh.

³⁰ Is fheudar dhasan miadachadh, agus dhomhsa laghdachadh.

³¹ Tha esan, a thʼ air tighinn as na h-ardaibh, fos cionn gach uile. Esan a tha bho ʼn talamh, tha e dhe ʼn talamh, ʼs dhe ʼn talamh tha a labhairt. Esan a tha bho neamh, tha e fos cionn nan uile.

³² ʼS air an ni, a chunnaic ʼsa chual e, tha e toirt fianuis: ʼs cha n-eil duine a gabhail ri fhianuis.

³³ Esan a ghabh fhianuis, chuir e sheul ris gum beil Dia firinneach.

³⁴ Oir tha esan, a chuir Dia, a labhairt briathran Dhe: oir cha tug Dia seachad a spiorad le tomhas.

³⁵ Tha gaol aig an Athair air a Mhac; agus chuir e a h-uile ni ʼna laimh.

³⁶ Tha bheatha shiorruidh aige-san, a tha creidsinn sa Mhac: ach esan nach eil a creidsinn sa Mhac, cha n-fhaic e beatha, ach tha fearg Dhe a laidhe air.