Eabhraidhich 12 - Tiomnadh Nuadh (MacEachen) 1875

XII. CAIB. Tha e gam brosnachadh gu faighidin fo chroisean: am mor chunnart droch bhuil a thoirt á grasan an tiomnaidh nuaidh.

¹ Agus le sin bho na tha nial cho mor de dhʼ fhianuisean air ar cul, le cur dhinn a h-uile cudthruim agus peacaidh a tha ʼnar lorg, ruithemid le faighidin thun a chatha, a chuireadh romhainn:

² A coimhead air Iosa, ughdair us fear-criochnachaidh a chreidimh, a dhʼ fhuilig a cheusadh air sgàth an t-sòlais a chuireadh roimhe, a dianamh diù de mhasladh, ʼsa tha nis ʼna shuidhe air deas laimh cathair Dhe.

³ Oir meòraichibh gu dichiollach air-san, a dhʼ fhuilig a leithid so de dhiachuinn bho pheacaich ʼna aghaidh fhein; chum nach gabh sibhse sgios, a fannachadh ʼnur n-inntinn.

⁴ Oir cha do chath sibh fhathast gu fuil, a stri an aghaidh a pheacaidh:

⁵ Oir leig sibh an diochuimhne an toil-inntinn, a tha labhairt ribh mar ri cloinn, a g-radh: A mhic, na leig á faire oilean an Tighearna; ʼs na gabh sgios nuair a chronaichear thu leis.

⁶ Oir an neach is toigh leis an Tighearna, smachdaichidh e e: agus sgiursaidh e a h-uile mac ris an gabh e.

⁷ Seasaibh buan fo smachdachadh. Tha Dia buntuinn ribh mar ri mic: oir co am mac nach cronaich an t-athair?

⁸ Ach ma tha sibhse gun smachdachadh, dheth bheil roinn aig a h-uile duine, is clann dhiolain sibh, ʼs cha mhic.

⁹ A bharrachd air sin bha aithrichean againn a thaobh na feola mar luchd-ionnsachaidh, ʼs thug sinn athadh dhaibh: nach mor nas mua na sin tha againn ri bhith umhail do Athair nan spiorad, ʼsa bhith beo?

¹⁰ Agus gu dearbh theagaisg iadsan sinn car beagan laithean a reir an toil fhein: ach esan gus ur buannachd, los sinn a dhʼ fhaighinn a naomhachd.

¹¹ Tha h-uile smachdachadh an drasda gu dearbh cha n-ann ʼna chuis aighir, ach ʼna chuis bhròin: ach an deigh so bheir e dhaibh-san, a bhios air am fiachuinn leis, toradh ro shitheil a cheartais.

¹² Uime sin togaibh suas na lamhan a thʼ air failneachadh, ʼs na gluinean laga,

¹³ Us dianaibh ceuman direach le ʼr casan; los nach teid a h-aon air bith as an rathad le crubaiche, ach an aite sin gum bi e air a leigheas.

¹⁴ Leanaibh sith ri daoine uile, us naomhachd, oir as a h-aonais cha n-fhaic duine sa bith Dia:

¹⁵ A beachdachadh gu dichiollach, nach bi duine air bith an deigh laimh air grasan Dhe; air eagal friamh air bith de sheirbhe a dhʼ fhas suas gu éis a chur, ʼs gum bi moran air an truailleadh leatha;

¹⁶ Air eagal fear-striopachais air bith a bhith ann, no duine neo-choisrigte, mar Esau, a reic air son aon thrath bìdh còir a chiad-bhreith:

¹⁷ ʼS biodh fios agaibh, nuair, an deigh sin, a bʼ aill leis a bhith ʼna oighre air a bheannachd, gun do dhiultadh e: oir cha dʼ fhuair ʼaithreachas eisdeachd, ged a shir e le deoir e.

¹⁸ Oir cha tainig sibh gu beinn dha ʼm faoidteadh beantuinn, ʼs gu teine loisgeach, gu cuairt-ghaoith, gu dorchadas, ʼs gu doininn,

¹⁹ ʼS gu fuaim trombaide, agus gu guth fhacal, a thug air an fheadhainn a chuala an leisgeul a ghabhail, nach labhairteadh am facal riu-san.

²⁰ Oir chabʼ urrainn daibh an ni a labhradh a ghiulan: Us ma bheanas ainmhidh doʼ n bheinn, clachar e.

²¹ Agus le cho fuathasach ʼsa bha na chunnacas, thuirt Maois: Tha mi fo eagal ʼs air chrith.

²² Ach tha sibh air tighinn gu sliabh Shioin, ʼs gu baile an De bheo, Ierusalem neamhaidh, ʼs gu cuideachda ioma mile aingeal,

²³ ʼS gu eaglais nan ciad-ghin, a tha sgriobhte air neamh, ʼs gu Dia britheamh nan uile, ʼs gu spioraid nan naomh air an dianamh coimhlionta,

²⁴ ʼS gu Iosa Criosta eadar-mhiadhonair an tiomnaidh nuaidh, agus gu crathadh fala, a tha labhairt nas fhearr na fuil Abeil.

²⁵ Faicibh nach diult sibh esan a tha labhairt. Oir mur do thàr iadsan as, a dhiult esan a labhair air talamh, ʼs mor nas lugha na sin a thàras sinne as, a tha tionndadh bhuaithe-san, a tha labhairt ruinn bho fhlathanas.

²⁶ Bʼ e ghuth-san a chrath an talamh an trà sin: ach a tha nis a gealltuinn, a g-radh: Aon uair fhathast; us gluaisidh mi cha n-e mhain an talamh, ach neamh cuideachd.

²⁷ ʼS le Aon uair fhathast a chantuinn, tha e ciallachadh na nichean gluasadach atharrachadh mar nichean diante, los gun seas buan na nichean neo-ghluasadach.

²⁸ Uime sin le rioghachd neo-ghluasadach fhaighinn, tha grasan againn: dianamaid seirbhis leo, a toileachadh Dhe le fiamh, agus le athadh.

²⁹ Oir is teine caithteach ar Dia-ne.