Colosianach 3 - Tiomnadh Nuadh (MacEachen) 1875

III. CAIB. Tha e gan comhairleachadh an seann duine a chur dhiu, ʼs an duine ùr a chur orra: dleasnasan bhan, us fhear, cloinne, us sheirbhiseach.

¹ Uime sin ma dhʼ eirich sibh maille ri Criosta, iarraibh na nichean a tha shuas, far a bheil Criosta ʼna shuidhe air deas laimh Dhe;

² Biodh ur n-aire air na nichean a tha shuas, cha n-ann air na nichean a tha air talamh.

³ Oir tha sibh marbh, ʼs tha ur beatha air a falach maille ri Criosta ann an Dia.

⁴ Nuair a chithear Criosta, ur beatha, an sin chithear sibhse maille ris ann an gloir.

⁵ Claoidhibh mata ur buill a tha air talamh: striopachas, neo-ghloine, mi-gheamnachd, ana-miannan, us sannt, ni is iodhol-aoradh:

⁶ As an leth so tha fearg Dhe a tighinn air cloinn a mhi-chreidimh;

⁷ Agus anns an do ghluais sibhse air uair, nuair chaith sibh ur beatha unnta.

⁸ Ach a nis cuiribh air chul a h-uile ni: fearg, anntlachd, gò, blaisbheum, cainnt dhrabasda a mach as ur bial.

⁹ Na dianaibh briag dha cheile, a cur dhibh an t-seann duine le ghniomhran,

¹⁰ ʼSa cur oirbh an duine ùir, esan a thʼ air ath-nuadhachadh ann an eolas, a reir iomhaigh an Ti, a chruthaich e:

¹¹ Far nach eil cinneach no Iudhach, timchioll-ghearradh no neo-thimchioll-ghearradh, borb-fhear no Sithianach, daoranach no saoranach: ach se Criosta a h-uile ni, agus anns a h-uile ni.

¹² Cuiribhse ma ta oirbh, mar dhaoine taghte Dhe, naomh, agus ionmhuinn, innibh na trocaire, caoimhneas, irioslachd, stuamachd, faighidin:

¹³ A cur suas ri cheile, ʼsa mathadh dha cheile, ma tha aobhar gearain aig neach an aghaidh neach: mar thug an Tighearna mathanas duibh fhein, thugaibhse mathanas mar an ciadna.

¹⁴ Ach fos an cionn so uile biodh a charrantachd agaibh, ʼs gur i bann na coimhliontachd,

¹⁵ Agus dianadh sith Chriosta aoibhneas ʼnur cridheachan, anns a bheil sibh air ar gairm ann an aon chorp; agus bithibh taingeil.

¹⁶ Gabhadh facal Chriosta comhnuidh unnaibh gu pailt anns a h-uile gliocas, a teagasg ʼsa g-earalachadh a cheile le sailm, le laoidhean, agus le dàin spioradail, a seinn do Dhia gu grasmhor ʼnur cridheachan.

¹⁷ Agus ciod air bith a ni sibh ann am facal, no ʼn gniomh, dianaibh gach ni ann an ainm an Tighearna Iosa Criosta, a toirt taing do Dhia ʼs do ʼn Athair troimh-san.

¹⁸ A mhnathan, bithibh umhailt dha ʼr fir, mar is còir, anns an Tighearna.

¹⁹ Fheara, thugaibh gaol dha ʼr mnathan, ʼs na bithibh coimheach riu.

²⁰ A chlann, bithibh umhailt dha ʼr parantan anns gach ni: oir tha so taitneach do ʼn Tighearna.

²¹ Aithriche, na brosnaichibh ur clann gu feirg, eagal gun caill iad am misneach.

²² A sheirbhisich, bithibh umhailt anns a h-uile ni dha ʼr maighistirean a reir na feola, cha n-ann le seirbhis-shula, mar a toileachadh dhaoine, ach le aon-fhillteachd cridhe, ann an eagal De.

²³ Ciod air bith ni ris am bi sibh, dianaibh e bho ʼr cridhe, mar do Dhia, ʼs cha n-ann do dhaoine:

²⁴ Le fios a bhith agaibh gum faigh sibh bho ʼn Tighearna duais na h-oighreachd. Do ʼn Tighearna Criosta dianaibhse seirbhis.

²⁵ Oir esan a ni cron, an ni sin a rinn e gu h-olc, gheobh e ga chionn: ʼs cha n-eil Dia gabhail ri pearsa seach pearsa.