1 Peadar 5 - Tiomnadh Nuadh (MacEachen) 1875

V. CAIB. Tha e toirt brosnachaidh do ʼn chleir ʼs do ʼn phobull, gus an dleasnasan araidh a chur an céill: tha e cur umhlachd us faire mu ʼn coinneamh uile.

¹ Tha mi guidhe ma ta air na seanairean ʼnur measg, ʼs mi fhein cuideachd am sheanair, ʼs am fhianuis air fulangasan Chriosta, agus am fhear-comhphairt de ʼn ghloir sin a tha ri foillseachadh anns an àm ri tighinn:

² Beathaichibh treud Dhe a tha ʼnur measg, a gabhail curaim dhi, cha n-ann a dhʼ aindeoin, ach gu deonach a reir Dhe; cha n-ann air son buannachd salaich, ach le ʼr deoin;

³ Cha mhua ʼsann le ain-tighearnas air a chleir, ach ʼnur luchd-sampuill do ʼn treud bho ʼn chridhe.

⁴ Us nuair dhʼ fhoillsichear prionns nam buachaillean, gheobh sibh crùn na glorach nach searg.

⁵ Mar an ciadna bithibh, a dhaoine oga, umhailte do na seanairean. Us fiachaibh uile umhlachd do gach a cheile: oir tha Dia a cur an aghaidh nan uaibhreach, ʼsa toirt ghrasan do na daoine iriosal.

⁶ Bithibhse ma ta iriosal fo laimh chumhachdaich Dhe, los gun ardaich e sibh an àm na sealltuinn:

⁷ A tilgeadh ur n-uile churaim air, oir tha curam aige dhibh.

⁸ Bithibh measarra, agus dianaibh faire: a chionn gum beil ur namhaid an deomhan a dol mun cuairt mar leomhan beucach a sireadh co a shluigeas e:

⁹ Cuiribhse ʼna aghaidh, laidir sa chreideamh: le fios gum beil ur braithrean, a tha san t-saoghal, fo ʼn diachuinn chiadna.

¹⁰ Ach Dia nan uile ghras, a ghairm sinn gu ghloir shiorruidh ann an Iosa Criosta, an deigh dhuibh beagan fhulang, ni e fhein coimhlion, laidir, agus steidheil sibh.

¹¹ Dhasan gun robh gloir us rioghachd fad shaoghal nan saoghal. Amen.

¹² Le Silbhanus, brathair dileas dhuibhse, mar tha mi an duil, sgriobh mi ann am beagan bhriathran: a guidhe, sa toirt teisteanais, gur iad so fior ghrasan Dhe air a bheil sibh ʼnur seasamh.

¹³ Tha an eaglais a thʼ ann am Babilon, a thaghadh maille ribh, a cur bheanuachd gu ʼr n-ionnsuidh, agus cuideachd Marcus mo mhac.

¹⁴ Cuiribh fàilt air a cheile le poig naoimh. Grasan gun robh dhuibh uile, a tha ann an Iosa Criosta. Amen.