1 Eòin 1 - Tiomnadh Nuadh (MacEachen) 1875

I. CHAIBIDEAL. Tha e g-innse ciod a chunnaic agus a chual e mu Chriosta (ʼs gur e a bheatha shiorruidh), gu co-chomunn a bhith againn ri Dia as a leth-san, agus a h-uile mathas; ach air chumhnanta gun aidich sinn ar peacannan.

¹ An ni bhʼ ann bho thoiseach, a chuala sinn, a chunnaic sinn le ʼr suilean, air an dʼ amhairc sinn, ʼsa laimhsich ar lamhan mu fhacal na beatha:

² Oir dhʼ fhoillsicheadh a bheatha, us chunnaic sinn, us tha sinn a togail fianuis, ʼsa g-innse dhuibh na beatha siorruidh, a bha maille ris an Athair, ʼsa nochdadh dhuinne:

³ Na chunnaic agus na chuala sinn tha sinn a g-innse dhuibh, gu co-chomunn a bhith agaibh ruinne, us gus am bi ar co-chomunne ris an Athair, us ri Mhac Iosa Criosta.

⁴ Agus tha sinn a sgriobhadh nan nichean so gu ʼr n-ionnsuidh, gu sòlas a bhith agaibh, ʼs gum bi ur sòlas lan.

⁵ Agus se so an teachdaireachd a chuala sinn bhuaithe, ʼsa tha sinn a g-innse dhuibhse: Gur solus Dia, agus nach eil dorchadas sa bith ann.

⁶ Ma their sinn gum beil co-chomunn againn ris, us sinn a g-imeachd an dorchadas, tha sinn briagach, ʼs cha n-eil sinn a dianamh na firinne.

⁷ Ach ma tha sinn a g-imeachd san t-solus, mar a tha esan san t-solus, tha co-chomunn againn ri cheile, us glanaidh fuil Iosa Criosta, a Mhac-san, sinn bho ʼn h-uile peacadh.

⁸ Ma their sinn nach eil peacadh againn, tha sinn ga ʼr mealladh fhein, ʼs cha n-eil an fhirinn unnainn.

⁹ Ma dhʼ aidicheas sinn ar peacannan, tha esan dileas us ceart gus ar peacannan a mhathadh dhuinn, agus ar glanadh bho ʼn h-uile eucoir.

¹⁰ Ma their sinn nach do pheacaich sinn, tha sinn ga dhianamh-san briagach, ʼs cha n-eil fhacal unnainn.