1 Corintianach 8 - Tiomnadh Nuadh (MacEachen) 1875

VIII. CAIB. Ged is neoni iodholan, an deigh sin uile, cha n-fhaodar nichean a chaidh thairgse dhaibh iche, air eagal sgainneil.

¹ A nis a thaobh nan nichean a thathas a g-iobradh do iodholan, tha fios againn gum beil eolas againn uile. Seididh faghlum suas; ach bheir a charrantachd deagh shamhla.

² Ach ma tha neach air bith am barail gur aithne dha ni sa bith, cha dʼ aithnich e fhathast mar bu chòir dha aithneachadh.

³ Agus ma tha gaol aig duine air bith air Dia, tha esan air aithneachadh leis.

⁴ Ach a thaobh bhiadhan a thathas a g-iobradh do iodholan, tha fios againn gur neoni iodhol anns an t-saoghal, ʼs nach eil Dia ann ach a h-aon.

⁵ Oir ged a tha iad ann ris an abrar diathan, air neamh no air talamh (oir tha ioma dia, us ioma tighearn ann):

⁶ Ach dhuinne cha n-eil ann ach aon Dia, an t-Athair, bho bheil a h-uile ni, agus sinne ann; agus aon Tighearna Iosa Criosta, bho bheil a h-uile ni, agus sinne troimh-san.

⁷ Ach cha n-eil eolas aig a h-uile h-aon. Oir gu so fhein tha cuid le fiosrachadh air an iodhol a g-ithe na chaidh iobradh do iodhol; ʼs tha an cogais, bhon a tha i lag, air a truailleadh.

⁸ Ach cha n-eil biadh ga ʼr dianamh taitneach do Dhia. Oir ged a dhʼitheas sinn, cha bhi sinn nas pailte; cha mhua, ged nach ith, a bhitheas sinn nas gainne.

⁹ Ach gabhaibh toighe, air eagal theagamh gum bi ur cead so ʼna cheap-tuislidh dhaibh-san, a tha lag.

¹⁰ Oir ma chi fear esan aig a bheil eolas ʼna shuidhe aig bord an teampull iodhoil, nach gabh a chogais, ʼs e lag, danadas gu icheadh nichean a dhʼiobradh do iodholan?

¹¹ Agus an teid le dʼ eolas-sa brathair lag a dhith air son an dʼ fhuilig Criosta am bàs?

¹² Agus mar so le peacachadh an aghaidh nam braithrean, agus le an cogais lag a lotadh, tha sibh a peacachadh an aghaidh Chriosta.

¹³ Uime sin ma tha biadh a toirt sgainneil dha mʼ bhrathair, cha n-ith mi feoil am feasd, air eagal gun toir mi sgainneal dha mʼ bhrathair.