1 Corintianach 7 - Tiomnadh Nuadh (MacEachen) 1875

VII. CAIB. Leasanan mu staid a phosaidh ʼs mu mhaighdeanas. Tha barrachd aig maighdeanas air an staid phosda.

¹ A nis a thaobh nan nichean mu ʼn do sgriobh sibh h-ugam: Is math do dhuine gun bheantuinn do bhoirionnach:

² Ach eagal striopachais biodh a bhean fhein aig a h-uile fear, agus biodh a fear fhein aig a h-uile té.

³ Thugadh am fear dha mhnaoi a dlighe; ʼs mar an ciadna a bhean dha fear.

⁴ Cha n-eil cumhachd aig a mhnaoi air a coluinn fhein, ach aig an fhear. Agus mar an ciadna cha n-eil cumhachd aig an fhear air a choluinn fhein, ach aig a mhnaoi.

⁵ Na diultaibh a cheile, mur h-ann le aonta a cheile car seal theagamh, los sibh fhein a thoirt do dhʼurnaigh; us tillibh a rithist ri cheile, air eagal satan ur buaireadh a thaobh ur mi-gheamnachd.

⁶ Ach tha mi cantuinn so mar ni ceadaichte, ʼs cha n-ann mar fhainte.

⁷ Oir bʼ aill leam sibhse uile a bhith mar tha mi fhein: ach tha a ghibht fhein aig gach duine bho Dhia: fear gu dearbh mar so, agus fear mar sin.

⁸ Ach tha mi g-radh riu-san nach eil posda ʼs ri bantraichean: gur math dhaibh ma dhʼ fhanas iad mar sin, amhuil mar a tha mise.

⁹ Ach mur cum iad iad fhein geamnaidh, posadh iad. Oir is fhearr posadh, na losgadh.

¹⁰ Ach a thaobh na feadhnach a tha posda, tha an Tighearna, cha mhise, a g-àithneadh gun a bhean a dhealachadh ri fear:

¹¹ Agus ma dhealaicheas i, fuiricheadh i gun phosadh, no cordadh i ri ʼfear. Agus na cuireadh am fear air falbh a bhean.

¹² Ach a thaobh chàich, tha mise g-radh, cha n-e an Tighearna. Ma tha aig brathair air bith bean nach eil a creidsinn, ʼs i g-aontachadh tamh maille ris, na cuireadh e air falbh i.

¹³ ʼS ma tha aig mnaoi sa bith fear nach eil a creidsinn, ʼs gun aontaich e tamh maille rithe, na cuireadh i air falbh a fear:

¹⁴ Oir tha am fear neo-chreideach air a naomhachadh leis a mhnaoi chreidich, ʼs tha a bhean neo-chreideach air a naomhachadh leis an fhear chreideach: air-neo bhiodh ur clann neoghlan, ach a nis tha iad naomh.

¹⁵ Ach ma dhʼ fhalbhas an neo-chreideach, falbhadh e: oir cha n-eil brathair no piuthar ri bhith fo sglamhachd sna càsan so: oir ghairm Dia sinn gu sith.

¹⁶ Oir ciamar tha fios agadsa, a bhean, gun sabhail thu dʼ fhear? No, a dhuine, ciamar tha fios agadsa gun sabhail thu do bhean?

¹⁷ Ach mar a roinn an Tighearna air gach neach, mar a ghairm Dia gach neach, a reir sin imicheadh e: ʼs mar sin tha mise teagasg anns na h-eaglaisean uile.

¹⁸ Na ghairmeadh neach sa bith, ʼs e timchioll-ghearrte? na coisneadh e a bhith neo-thimchioll-ghearrte. Na ghairmeadh neach sa bith, ʼs e neo-thimchioll-ghearrte? na biodh e air a thimchioll-ghearradh.

¹⁹ Oir is neoni an timchioll-ghearradh, agus is neoni an neo-thimchioll-ghearradh; ach cumail faintean Dhe.

²⁰ Fanadh gach duine anns a ghairm sin anns an do ghairmeadh e.

²¹ An do ghairmeadh thu na dʼ thraill? na gabh suim dhe sin: ach ma ʼs urrainn dhut a bhith saor, gum bʼ e do raghainn e.

²² Oir esan a ghairmeadh leis an Tighearna, ʼs e ʼna thraill, is saoranach an Tighearna e: mar an ciadna neach a ghairmeadh, ʼs e saor, se fear-muinntir Chriosta e.

²³ Cheannaicheadh le pris sibh, na bithibh ʼnur traillean aig daoine.

²⁴ A bhraithrean, fanadh a h-uile duine ann an Dia san staid anns na ghairmeadh e.

²⁵ A thaobh oighean cha n-eil fainte sa bith agam bho ʼn Tighearna: ach tha mi toirt comhairle seachad, mar dhuine a fhuair trocair bho ʼn Tighearna gu bhith firinneach.

²⁶ Tha mi saoilsinn ma ta gum beil so math air son feumalachd na h-uarach, gur math do dhuine a bhith mar so.

²⁷ Am beil thu ceangailte ri mnaoi? Na sir fuasgladh. Am beil thu fuasgailte bho mhnaoi? Na iarr bean.

²⁸ Ach ma ghabhas tu bean, cha pheacadh dhut e. Us ma phosas oigh, cha do pheacaich i: a dhʼ aindeoin sin bithidh trioblaid na feola aig an leithidean so. Ach tha mise gu ʼr caomhnadh.

²⁹ Tha mi g-radh so ma ta, a bhraithrean. Tha an uine goirid: se leanas bho so, biodh iadsan cuideachd aig am beil mnathan, mar nach biodh iad aca:

³⁰ Us iadsan a tha gal, mar nach biodh iad a gal; us iadsan a tha aighearach, mar nach biodh iad aighearach; agus iadsan a tha ceannach, mar nach biodh iad a sealbhachadh ni;

³¹ Us iadsan a tha mealtuinn an t-saoghail so, mar nach biodh iad ga mhealtuinn: oir theid dealbh an t-saoghail so seachad.

³² Ach is aill leam sibh a bhith gun iomaguin. Esan a tha gun mhnaoi, tha e curamach mu nichean an Tighearna, fiach an toilich e Dia.

³³ Ach esan aig a bheil bean, tha e iomaguineach mu nichean an t-saoghail, fiach an toilich e a bhean, ʼs tha e air a roinn.

³⁴ ʼS tha am boirionnach nach eil posda, agus an oigh, a smaoineachadh air nichean an Tighearna, gus i bhith naomh an coluinn ʼs an spiorad. Ach tha ise, a tha posda, a smaoineachadh air nichean an t-saoghail, fiach an toilich i a fear.

³⁵ Agus tha mi g-radh so gu buannachd dhuibhse: cha n-ann gus ur cur an ribe, ach air son an ni a tha dealbhach, ʼsa bheir cothrom dhuibh air freasdal do ʼn Tighearna gun obadh.

³⁶ Ach ma tha duine air bith a saoilsinn gu bheil e ʼna mhasladh dha a thaobh ʼoighe, gu bheil i thar aois, ʼs gum feum a chuis a bhith mar sin; dianadh e a thoil fhein; cha pheacadh dha, ma phosas i.

³⁷ Ach esan a chuir roimhe gu daingeann ʼna chridhe, gun eiginn sa bith air, ach e ʼna mhaighistir air a thoil fhein, ʼsa shuidhich so ʼna chridhe fhein a mhaighdean a ghleidheadh, tha e dianamh gu math.

³⁸ Mar sin am fear a tha toirt seachad a mhaighdein gu posadh, tha e dianamh gu math; ʼs am fear cuideachd nach eil ga toirt seachad, tha e dianamh nas fhearr.

³⁹ Tha boirionnach ceangailte leis an lagh fhad ʼsa tha a fear beo: ach ma gheobh a fear bàs, tha i fuasgailte; posadh i co is aill leatha: ach anns an Tighearna a mhain.

⁴⁰ Ach bithidh i nas beannaichte ma dhʼfhuiricheas i mar a tha i, a reir mo chomhairle-sa: agus tha mi am beachd gum beil Spiorad Dhe agam.