1 Corintianach 15 - Tiomnadh Nuadh (MacEachen) 1875

XV. CAIB. Aiseirigh Chriosta us ar n-aiseirigh fhein: mar a bhios an aiseirigh.

¹ A nis, a bhraithrean, cuiridh mi an ceill dhuibh an soisgeul a theagaisg mi dhuibh, us ris na ghabh sibh, us anns a bheil sibh a seasamh,

² Us leis a bheil sibh air ur sabhaladh, ma tha sibh a cumail an rian theagaisg a thug mi dhuibh, nas lugha na chreid sibh gu diomhain.

³ Oir liubhair mi dhuibh an toiseach na fhuair mi fhein: gun dʼ fhuair Criosta bàs air son ar peacannan a reir nan Sgriobtur;

⁴ Agus gun do thiodhlaiceadh e, ʼs gun dʼ eirich e rithist an treas latha a reir nan Sgriobtur;

⁵ Agus gum facas e le Cephas, ʼs an deigh sin leis na h-aon-diag;

⁶ An sin chunnacas e le corr us coig ciad brathair comhla; dhe ʼm beil moran maireann gu so, us chaidil cuid;

⁷ An deigh sin chunnacas e le Seumas, an sin leis na h-ostail uile;

⁸ Agus mu dheireadh uile chunnacas leamsa e, mar neach a rugadh an an-àm.

⁹ Oir is mi is lugha dhe na h-ostail, nach fhiach ostal a chantuinn rium: a chionn gun dʼ rinn mi geur-leanmhuinn air eaglais De.

¹⁰ Ach le grasan De is mi an ni is mi, ʼs cha robh a ghrasan gun bhuil unnam, ach dhʼ oibrich mi na bu mhuà air phailte na iad uile: cha mhise gu dearbh, ach grasan De maille rium:

¹¹ Ach co-dhiu is mise no iadsan: mar so tha sinn a searmonachadh, mar so chreid sibhse.

¹² A nis ma thathas a teagasg gun dʼ eirich Criosta bho na mairbh, ciamar a tha cuid ʼnur measg a g-radh, nach eil aiseirigh nam marbh ann?

¹³ A nis mur eil aiseirigh nam marbh ann, cha dʼ eirich Criosta fhein a rithist.

¹⁴ ʼS mur dʼ eirich Criosta rithist, is diomhain mar sin ar searmonachadh, is diomhain ur creideamh-sa cuideachd;

¹⁵ Seadh, agus gheobhar sinn ʼnar fianuisean-breige air Dia: a chionn gun tug sinn fianuis an aghaidh Dhe gun do thog e Criosta, nach do thog e, mur eirich na mairbh a rithist.

¹⁶ Oir mur eirich na mairbh a rithist, cha mhua dhʼ eirich Criosta rithist.

¹⁷ Agus mur dʼ eirich Criosta rithist, is diomhain ur creideamh-sa: oir tha sibh fhathast ʼnur peacannan.

¹⁸ Agus a reir sin chaidh iadsan, a chaidil ann an Criosta, a dhith.

¹⁹ Ma ʼsann sa bheatha so a mhain a tha ar dochas ann an Criosta, is sinn is truaighe de dhaoine uile.

²⁰ Ach a nis dhʼ eirich Criosta bho na mairbh ʼna chiad thoradh na feadhnach a tha ʼnan cadal:

²¹ Oir mar is ann tromh dhuine thainig am bàs, ʼsann tromh dhuine aiseirigh nam marbh cuideachd.

²² Agus mar a tha iad uile bàsachadh an Adhamh, mar sin cuideachd beothaichear iad uile ann an Criosta.

²³ Ach a h-uile h-aon ʼna ordugh fhein: Criosta a chiad thoradh; an sin iadsan is le Criosta, a chreid ʼna thighinn.

²⁴ An sin a chrioch, nuair a liubhras e seachad an rioghachd do Dhia ʼs do ʼn Athair, nuair a bheir e gu neoni a h-uile uachdranachd, agus cumhachd, agus feart.

²⁵ Oir is còir da righeachadh, gus an cuir e naimhdean uile fo chasan.

²⁶ Ach se am bàs an namhaid mu dheireadh a sgriosar: oir chuir e h-uile ni fo chasan. Ach nuair tha e g-radh:

²⁷ Chuireadh a h-uile ni fodha; gun teagamh saor bhuaithe san, a chuir a h-uile ni fodha.

²⁸ Us nuair a chuirear a h-uile ni fodha, bithidh am Mac fhein fodha-san, a chuir a h-uile ni fodha, gu Dia a bhith ʼna h-uile ni anns a h-uile ni.

²⁹ Air neo ciod a ni iadsan a thʼ air am baisteadh air son nam marbh, mur eil na mairbh gu eirigh a rithist idir? ciod h-uige idir a thathas gam baisteadh air an son?

³⁰ Cʼ uime a tha sinn fhein cuideachd an cunnart gach uair?

³¹ A h-uile latha, a bhraithrean, tha mi bàsachadh air son ur gloire, a tha agam ann an Iosa Criosta ar Tighearna.

³² Ma ghleac mi (a labhairt mar dhuine) ri beistean ann an Ephesus, ciod an stà dhomh e, mur eil na mairbh gu eirigh a rithist? Ithemid us olamaid: oir am maireach gheobh sinn bàs.

³³ Na bithibh air ur mealladh: Truaillidh droch comhradh deagh bheusan.

³⁴ Duisgibh, a dhaoine cearta, ʼs na peacaichibh: oir aig cuid cha n-eil eolas De, tha mi cantuinn so gu ʼr nàire.

³⁵ Ach their cuideigin: Ciamar a tha na mairbh gu eirigh a rithist? no ciod a ghné coluinne san tig iad?

³⁶ A dhuine gun thoinisg, cha chinn na tha thu cur, mur bàsaich e an toiseach.

³⁷ Agus an ni a tha thu cur, cha n-e an corp a bhitheas ann a tha thu cur, ach lom ghrainne, mar de chruithneachd, no de sheorsaichean eile.

³⁸ Ach bheir Dia corp dha mar is aill leis, us do ʼn h-uile seorsa sil a chorp fhein.

³⁹ Cha n-aon fheoil a h-uile feoil: ach tha feoil aig daoine, feoil eile aig spreidh, feoil eile aig eoin, feoil eile aig iasg.

⁴⁰ Agus tha cuirp neamhaidh, us cuirp thalmhaidh ann: ach cha n-ionann gloir nan corp neamhaidh, agus gloir nan corp talmhaidh.

⁴¹ Cha n-ionann gloir na greine, agus gloir na gealaiche, agus gloir nan reul. Agus tha atharrachadh eadar reul us reul an gloir:

⁴² Is amhuil sin cuideachd aiseirigh nam marbh. Tha i air a cur an truailleachd, eiridh i ann an neo-thruailleachd.

⁴³ Tha i air a cur an as-onair, eiridh i an gloir. Tha i air a cur an laigse, eiridh i an cumhachd.

⁴⁴ Tha i air a cur ʼna coluinn thalmhaidh, eiridh i ʼna coluinn spioradail. Ma tha coluinn thalmhaidh ann, tha coluinn spioradail ann mar an ciadna, mar tha e sgriobhte:

⁴⁵ Rinneadh a chiad duine Adhamh ʼna anam beo, an t-Adhamh deireannach ʼna spiorad beothachail.

⁴⁶ Ach cha bʼe sin a tha spioradail a bha an toiseach, ach sin a tha corporra: agus a rithist sin a tha spioradail.

⁴⁷ Bha chiad duine bho ʼn talamh, talmhaidh: an ath dhuine bho neamh, neamhaidh.

⁴⁸ Mar an duine talmhaidh, is amhuil na daoine talmhaidh: ʼs mar an duine neamhaidh, is amhuil na daoine neamhaidh.

⁴⁹ Uime sin mar a ghiulain sinn iomhaigh an duine thalmhaidh, giulainemid cuideachd iomhaigh an duine neamhaidh.

⁵⁰ A nis tha mi g-radh so, a bhraithrean: nach urrainn do dhʼ fheoil ʼs do dhʼ fhuil rioghachd Dhe a shealbhachadh, ʼs cha mhua shealbhaicheas truailleachd neo-thruailleachd.

⁵¹ Seall, tha mi labhairt ruin-dhiomhair ribh: Eiridh sinn gu dearbh uile rithist, ach cha mhuthar sinn uile.

⁵² Ann am mionaid, am priobadh na sula, aig an trombaid dheireannaich (oir seinnidh an trombaid) eiridh na mairbh gu neo-thruaillidh, agus muthar sinne.

⁵³ Oir feumaidh an ni truaillidh so neo-thruailleachd a chur uime, ʼs an ni bàsmhor so neo-bhàsmhorachd a chur uime.

⁵⁴ ʼS nnair a chuireas an ni bàsmhor so neo bhàsmhorachd uime, an sin tachraidh am facal a tha sgriobhte: Shluigeadh am bàs suas leis a bhuaidh.

⁵⁵ O bhàis, càit a bheil do bhuaidh? O bhàis, càit a bheil do ghath?

⁵⁶ A nis se am peacadh gath a bhàis: agus neart a pheacaidh, an lagh.

⁵⁷ Ach taing do Dhia, a thug a bhuaidh dhuinne tromh ar Tighearna Iosa Criosta.

⁵⁸ Uime sin, mo bhraithrean gradhach, bithibh steidheil agus neo-luasganach, nas pailte daonnan an obair an Tighearna, a tuigsinn nach eil ur saothair diomhain anns an Tighearna.