1 Corintianach 12 - Tiomnadh Nuadh (MacEachen) 1875

XII. CAIB. Gum beil ioma seorsa ghibhtean spioradail ann: gum feum buill a chuirp spioradail, mar bhuill a chuirp nadurra, eiridneachadh air a cheile.

¹ A nis, a bhraithrean, cha mhath leam sibh a bhith aineolach mu nichean spioradail.

² Is aithne dhuibh, nuair a bha sibh ʼnur cinnich, gun deach sibh gu iodholan balbha, mar a bhatar gu ʼr stiuradh.

³ Uime sin tha mi toirt dhuibh ri thuigsinn, nach abair duine air bith, a tha labhairt le Spiorad Dhe, Anathema ri Iosa. Agus cha n-urrainn do dhuine an Tighearn Iosa a radh, ach leis an Spiorad Naomh.

⁴ A nis tha caochla seorsa de ghrasan ann, ach an t-aon Spiorad:

⁵ ʼS tha caochla seorsa de fhrithealadh ann, ach an t-aon Tighearna:

⁶ ʼS tha caochla seorsa de ghniomhran ann, ach an t-aon Dia, a tha g-oibreachadh gach ni anns gach aon.

⁷ Agus tha soilleireachadh an Spioraid air a thoirt do ʼn h-uile neach gu bhuannachd.

⁸ Do h-aon gu dearbh tha facal a ghliocais air a thoirt leis an Spiorad; ʼs do fhear eile facal an eolais leis an Spiorad chiadna;

⁹ ʼS do fhear eile creideamh leis an Spiorad chiadna; do fhear eile grasan leighis leis an aon Spiorad;

¹⁰ Do fhear eile dianamh mhiarailtean, do fhear eile faidhdearachd, do fhear eile aithneachadh spiorad, do fhear eile ioma gné theanganan, do fhear eile eadar-theangachadh bhriathran.

¹¹ Ach se an t-aon Spiorad ciadna a tha dianamh nan nichean so uile, a roinn air gach aon a reir a thoil.

¹² Oir mar is aon a choluinn, agus ioma ball aice; agus an deigh sin is aon choluinn uile bhuill na coluinne, ged is lionor iad: is amhuil sin Criosta.

¹³ Oir anns an aon Spiorad bhaisteadh sinn uile gu aon chorp, co-dhiu is Iudhaich no cinnich, co-dhiu is daoranaich no saoranaich sinn; agus anns an aon Spiorad thugadh dhuinn ri ol.

¹⁴ Oir cha n-aon bhall a choluinn, ach ioma ball.

¹⁵ Nan abradh a chas: Bho nach mi an lamh, cha n-eil mi de ʼn choluinn: nach eil i de ʼn choluinn a dhʼ aindeoin sin?

¹⁶ ʼS nan abradh a chluas: Bho nach mi an t-suil, cha n-eil mi de ʼn choluinn: nach eil i de ʼn choluinn a dhʼ aindeoin sin?

¹⁷ Nam biodh a choluinn uile ʼna suil, càit am biodh a chlaistinn? Nam biodh a choluinn uile ʼna claistinn, càit am biodh am fàileadh?

¹⁸ Ach a nis shuidhich Dia na buill, a h-uile h-aon dhiu anns a choluinn mar a bʼ aill leis.

¹⁹ Agus nam bʼ aon bhall iad uile, càit am biodh a choluinn?

²⁰ Ach a nis is ioma ball iad a rireadh, ach aon chorp.

²¹ ʼS cha n-urrainn do ʼn t-suil a radh ris an laimh: Cha n-eil feum agam air do shaothair; no an ceann a rithist ris na casan: Cha n-eil feum agam oirbh.

²² Ach an aite sin ʼsiad na buill de ʼn choluinn is laige gu mor a thaobh coltais, is mua feum;

²³ Agus na buill a tha sinn a meas is mi-urramaiche dhe ʼr coluinn, tha sinn a cuairteachadh leis a bharrachd mhor a dhʼ onair; agus iadsan is neo-eireachdaile dhinn, ʼsiad tha faighinn gu mor am barrachd eireachdais.

²⁴ Ach air ar buill dhealbhach cha n-eil ni dhe so a dhith: ach rian Dia a choluinn, a buileachadh am barrachd urraim far an robh e dhith,

²⁵ Gus nach biodh ar-amach anns a choluinn, ach gum freasdaladh na buill air a cheile.

²⁶ Agus ma tha aon bhall am pein, tha na buill uile am pein maille ris; no ma tha aon bhall sunndach, tha na buill uile an aoibhneas maille ris.

²⁷ A nis is sibhse corp Chriosta, agus buill de bhall.

²⁸ Agus gu fior shuidhich Dia teadhainn anns an eaglais, ostail an toiseach, san ath aite faidhean, san treas aite ollamhan, an deigh sin miarailtean, an sin grasan leighis, luchd-cobhair, uachdranachd, ioma gné theanganan, eadar-mhineachadh bhriathran.

²⁹ Am beil iad uile ʼnan ostail? am beil iad uile ʼnam faidhean? am beil iad uile ʼnan ollamhan?

³⁰ An dian iad uile miarailtean? am beil grasan leighis aca uile? an labhair iad uile le teanganan? an eadar-theangaich iad uile?

³¹ Ach bithibh titheach air na gibhtean is fhearr. Agus tha mi dol a dhʼ fhiachuinn dhuibh slighe nas barraichte fhathast.