Bìoball air-loidhne

Yok-sû-â Ki 9 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Kî-phiên-ngìn Khî-phien Yok-sû-â

¹ Yî-set-lie̍t ngìn-mìn sṳn-li ke sêu-sit chhòn-phien Yok-tan-hò sî-phién ke sân-khî, kô-ngièn, lâu Thi-chûng-hói hói-sùn ke phìn-ngièn, sṳm-chṳ yén-to pet-phién ke Lì-pâ-nun; ya chhòn-to Het-ngìn, Â-mô-li-ngìn, Kâ-nàm-ngìn, Pí-li-sé-ngìn, Hî-vi-ngìn, Yâ-pu-sṳ̂-ngìn liá-têu vòng ke ngí-kûng chûng.

² Kì-têu chhiu lièn-ha̍p hí-lòi, yit-sîm yit-yi oi tui-khong Yok-sû-â lâu Yî-set-lie̍t-ngìn.

³ Chúng-he, he̍t chhai Kî-phiên ke Hî-vi-ngìn thâng-tó Yok-sû-â ngióng-pân tui-thai Yâ-li-kô lâu Ngie-sàng,

⁴ chhiu sat-kie khî-phien Yok-sû-â. Kì-têu nâ khiu pu-thoi lâu pú-ko ke phì chiú-thoi chông sṳ̍t-vu̍t, piong chhai lì poi-táng,

⁵ vû-sṳ̂n chok khiu sâm-fu, kiok chok pú-ko ke khiu hài, tai-tén ngang-thet yu sâng-kû ke piáng.

⁶ Kì-têu lòi-to Kit-kap yàng-thi hi kien Yok-sû-â lâu Yî-set-lie̍t-ngìn, kóng: “Ngài-têu he tui tông-yén ke thi-fông lòi ke, pai-thok lâu ngài-têu li̍p-yok!”

⁷ Yî-set-lie̍t-ngìn tui liá-têu Hî-vi-ngìn kóng: “Ngì-têu mò thin-chho̍k chhiu he̍t chhai fu-khiun nè! Ngài-têu ngióng-oi lâu ngì-têu li̍p-yok?”

⁸ Kì-têu tui Yok-sû-â kóng: “Ngài-têu he lòi fu̍k-sṳ ngì-têu ke.” Yok-sû-â mun kì-têu: “Ngì-têu he má-ngìn? Tui nai-vi lòi ke?”

⁹ Kì-têu chhiu tui Yok-sû-â kóng: “Phu̍k-ngìn tui tông-yén ke thi-fông lòi, yîn-vi ngài-têu thâng-tó Song-chú — ngì-têu Song-ti ke sṳn-miàng; Kì chhai Âi-khi̍p só-cho ke yit-chhiet,

¹⁰ lâu Kì tui Yok-tan-hò tûng-phién ke lióng-ke Â-mô-li-vòng — Hî-sṳ̍t-pún-vòng Sî-fèn pin he̍t chhai Â-sṳ̂-thâ-liu̍k ke Pâ-sân-vòng Ngo̍k só-cho ke yit-chhiet, ngài-têu chhiòn-phu yû thâng-tó lé.

¹¹ Ngài-têu ke liâng-chhiu lâu koet-nui ke ngìn-mìn ham ngài-têu tai-tén lu-song oi sṳ̍t ke tûng-sî lòi kien ngì-têu, kóng: ‘Ngài-têu kâm-ngien fu̍k-sṳ ngì-têu, pai-thok lâu ngài-têu li̍p-yok!’

¹² Ngì khon liá-têu piáng, ngài-têu chhut-mùn oi lòi khon ngì-têu ke sṳ̀ hàn sêu-sêu, liá-ha chhiòn-phu ngang-thet, ya sâng-kû lé.

¹³ Ngài-têu chông-chiú ke sṳ̀, chiú-thoi hàn-he sîn ke, chúng-he liá-ha chhiòn-phu khiu lé. Ngài-têu ke sâm-fu, hài ya chhiòn-phu yîn-vi hàng yén-lu lan-thet lé.”

¹⁴ Yî-set-lie̍t-ngìn nâ-têu kì-têu ke sṳ̍t-vu̍t, chúng-he mò hi khiù-mun Song-chú.

¹⁵ Yok-sû-â chhiu lâu Kî-phiên-ngìn tá fò-phìn ke khie-yok, tap-yin m̀ chhṳ̀ kì-têu. Yî-set-lie̍t ke-têu liâng-chhiu ya fat-sṳ chûn-sú liá thiàu-yok.

¹⁶ Khie-yok tá-hó sâm-ngit, Yî-set-lie̍t-ngìn chang tî liá-têu ngìn ngièn-lòi he̍t chhai fu-khiun thin-thin.

¹⁷ Yî-set-lie̍t-ngìn chhiu hi chhìm kì-têu; sâm-ngit yî-heu, to liá-têu ngìn he̍t ke thi-fông, chhiu-he Kî-phiên, Kî-fî-lâ, Pí-liu̍k, lâu Kî-lie̍t-Yâ-lìm.

¹⁸ Chúng-he Yî-set-lie̍t-ngìn m̀-kám chhṳ̀ kì-têu, yîn-vi kì ke-têu liâng-chhiu sṳt chṳ́-tén Song-chú — Yî-set-lie̍t Song-ti ke miàng hiong liá-têu ngìn fat-sṳ. Vi-tó liá-khien sṳ, fi-chung lûng-chúng koai-yen ke-têu liâng-chhiu.

¹⁹ Chúng-he ke-têu liâng-chhiu tui chhiòn fi-chung kóng: “Ngài-têu yí-kîn chṳ́-tén Song-chú — Yî-set-lie̍t Song-ti ke miàng hiong kì-têu fat-sṳ, liá-ha ngài-têu cho-m̀-tet sông-hoi kì-têu.

²⁰ Yîn-vi yû liá khie-yok, ngài-têu yit-thin oi liù kì-têu sâng-miang, na-mò, Song-ti voi chit-fa̍t ngài-têu.”

²¹ Ke-têu liâng-chhiu ki-siu̍k tui fi-chung kóng: “Oi liù kì-têu ke sâng-miang, kì-têu hàn cho-tet vi chhiòn fi-chung pho-chhèu khâi-súi.” Thai-kâ chhiu chiap-su ke-têu liâng-chhiu ke yi-kien.

²² Yok-sû-â fûn-fu ngìn chiông Kî-phiên-ngìn tai-lòi, mun kì-têu: “Ngì-têu cho-má-ke khî-phien ngài-têu? Ngì-têu mìn-mìn he̍t chhai fu-khiun, cho-má-ke kóng he tui yén-fông lòi ke nè?

²³ Yîn-vi khî-phien ngài-têu, Song-ti yí-kîn thin ngì-têu ke chhui; ngì-têu oi yún-yén cho nù-chhòi, vi ngài Song-ti ke sṳn-thien lòi pho-chhèu khâi-súi.”

²⁴ Kì-têu en Yok-sû-â kóng: “Phu̍k-ngìn án-ngiòng cho he yîn-vi yû-ngìn sṳ̍t-chhai lâu ngài-têu kóng, Song-chú — ngì ke Song-ti sṳt chṳ́-sṳ Kì ke phu̍k-ngìn Mô-sî, oi chiông liá-te thú-thi chhiòn-phu su-pûn ngì-têu, ham ngì-têu chhai chin-ngi̍p liá-te thú-thi ke sṳ̀, oi chhṳ̀-chhiang só-yû ke ngìn. Yîn-vi kiâng pûn ngì-têu chhṳ̀-thet, ngài-têu chang phien ngì-têu.

²⁵ Liá-ha ngài-têu chhai ngì-têu ke sú-chûng, yù-chhai ngì-têu oi ngióng-pân kûng-tong tui-thai ngài-têu!”

²⁶ Só-yî Yok-sû-â pó-fu kì-têu, m̀-chún Yî-set-lie̍t-ngìn chhṳ̀ kì-têu;

²⁷ chúng-he kì thùng-sṳ̀ ya ham kì-têu cho nù-chhòi, vi fi-chung lâu Song-chú ke chi-thàn pho-chhèu khâi-súi. Chhṳ̍t-to kîm-pû-ngit, kì-têu hàn ki-siu̍k chhai Song-chú só-sién ke só-chhai cho liá-chúng kûng-chok.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan