Bìoball air-loidhne

Yok-sû-â Ki 8 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Cham-liâng Ngie-sàng

¹ Song-chú tui Yok-sû-â kóng: “Ngì oi tai-liâng só-yû voi siông-chhṳ̀ ke ngìn to Ngie-sàng hi; m̀-sṳ́ kiâng, m̀-hó sṳt-chṳ. Ngài yí-kîn chiông Ngie-sàng ke vòng, kì ke ngìn-mìn, sàng-chṳ́n, lâu thú-thi chhiòn-phu kâu-pûn ngì.

² Yî-chhièn ngì ngióng-pân tui-thai Yâ-li-kô-sàng lâu kì ke vòng, ngì ya oi cheu-yong tui-thai Ngie-sàng lâu kì ke vòng; chúng-he liá-pái ngì-têu cho-tet vi chhṳ-kâ liù-hâ chhòi-vu̍t lâu thèu-sâng. Ngì oi tui heu-poi kûng-kit Ngie-sàng.”

³ Só-yî, Yok-sû-â lâu chhiòn-phu voi siông-chhṳ̀ ke ngìn chún-phi to Ngie-sàng hi. Kì sién-chhut sâm-van chîn-pîn, phai kì-têu chhai am-pû-thèu chhut-fat.

⁴ Kì min-lin kì-têu kóng: “Ngì-têu oi mài-fu̍k chhai sàng ke heu-poi, chúng-he m̀-hó lì-khôi thet-yén, tak-sà oi sùi-sṳ̀ chún-phi kûng-kit.

⁵ Ngài tai-liâng ke ngìn oi chṳn-mien chin-kûng Ngie-sàng; sàng-tú ke ngìn chhut-lòi kûng-kit ngài-têu ke sṳ̀, ngài-têu oi chhiong song-pái án-ngiòng chón-sṳ̂n thò-chéu.

⁶ Kì-têu voi kiuk ngài-têu, chhṳ̍t-to ngài-têu phien kì-têu lì-khôi ke-sàng tông-yén. Kì-têu voi láu-tó ngài-têu he chhiong song-pái án-ngiòng chhai kì-têu mien-chhièn thò-chéu.

⁷ Ke-sṳ̀, ngì-têu chhiu oi tui mài-fu̍k ke thi-fông chhut-lòi kûng-kit, cham-liâng ke-sàng. Song-chú — ngì-têu ke Song-ti voi chiông liá-sàng kâu-pûn ngì-têu.

⁸ Ngì-têu cham-liâng liá-sàng yî-heu, oi chûn-cheu Song-chú ke min-lin, piong-fó sêu-sàng. Liá he ngài pûn ngì-têu ke min-lin.”

⁹ Só-yî Yok-sû-â phai kì-têu chhut-hi, kì-têu hi-to Ngie-sàng sî-phién, Pak-thi̍t-li lâu Ngie-sàng tûng-ông ke só-chhai, mài-fu̍k chhai ke-vi tén-tén. Chúng-he Yok-sû-â lâu ngìn-mìn hàn chhai yàng-thi ko-ya.

¹⁰ Thi-ngi ngit tá-chó, Yok-sû-â hong-hí-lòi, seu-si̍p kì ke kiûn-chhui. Kì lâu Yî-set-lie̍t ke-têu chóng-ló tai-liâng kiûn-chhui hiong Ngie-sàng chhut-fat.

¹¹ Yok-sû-â tai-liâng ke kiûn-chhui hàng to Ngie-sàng chin-kûng, chhai sàng ke pet-phién ôn-yàng; kì-têu lâu Ngie-sàng chûng-kiên kak-tén yit-ke sân-lak.

¹² Yok-sû-â phai thai-yok ńg-chhiên ngìn hi mài-fu̍k chhai sàng ke sî-phién, chhiu chhai Pak-thi̍t-li lâu Ngie-sàng ke tûng-ông.

¹³ Kiûn-chhui ke pu-chṳ he án-ngiòng: Chú-li̍t kiûn-chhui chhai sàng ke pet-phién, mài-fu̍k ke kiûn-chhui chhai sàng ke sî-phién. Ke am-pû, Yok-sû-â chhai sân-lak ko-ya.

¹⁴ Ngie-sàng ke vòng khon-tó Yok-sû-â ke kiûn-chhui, tá-chó chhiu chhut-lòi ngiàng-chan. Kì seu-si̍p só-yû phu-ha, chhai Yok-tan hò-kuk chhièn song-pái kâu-chan ke thi-fông lâu Yî-set-lie̍t-ngìn siông-chhṳ̀, pin m̀-tî sàng ke heu-poi yû kiûn-chhui mài-fu̍k oi lòi kûng-kit.

¹⁵ Yok-sû-â lâu kì ke kiûn-chhui cha-yi tá-sû, hiong khóng-yâ thò-chéu.

¹⁶ Ngie-sàng ke ngìn chhiòn-phu chhut-lòi tûi Yî-set-lie̍t-ngìn; kì-têu ye̍t-tûi, chhiu lì sàng ye̍t-yén.

¹⁷ Ngie-sàng lâu Pak-thi̍t-li-sàng mò yit-sà mò chhut-lòi kiuk Yî-set-lie̍t-ngìn; kì-têu chhiu liù-hâ khûng-sàng, mò-ngìn fòng-phi.

¹⁸ Ke-sṳ̀, Song-chú tui Yok-sû-â kóng: “Chiông ngì ke chhiông-thèu chṳ́-hiong Ngie-sàng; Ngài oi chiông liá-sàng su-pûn ngì lé.” Yok-sû-â chhiu cheu án-ngiòng hi-cho.

¹⁹ Kì khià-hí chhiông lòi, mài-fu̍k ke kiûn-chhui kiak-kiak tui mài-fu̍k ke thi-fông chhut-lòi, chéu-tén hi Ngie-sàng, cham-liâng ke-sàng, ngiàm-sṳ̀ piong-fó chiông kì sêu-thet.

²⁰ Ngie-sàng ke ngìn fì-thèu yit-khon, chhiu khon-tó fó-yên chhung-thiên. Liá-sṳ̀, hiong khóng-yâ thò-chéu ke Yî-set-lie̍t-ngìn chón-ko sṳ̂n lòi kûng-kit kì-têu; kì-têu mò nai hó chéu.

²¹ Yok-sû-â lâu kì ke kiûn-chhui khon-tó mài-fu̍k ke kiûn-chhui yí-kîn cham-liâng Ngie-sàng, sàng ya chho̍k-fó lé, chhiu chón-sṳ̂n kûng-tá Ngie-sàng ke ngìn.

²² Liá-sṳ̀, kûng-ngi̍p sàng-tú hi ke Yî-set-lie̍t-ngìn ya chhut-lòi chiap-yin. Ngie-sàng ke ngìn vàn-chhiòn pûn Yî-set-lie̍t-ngìn pâu-vì, chhiòn-phu pûn-ngìn chhṳ̀ chhiang-chhiang, mò yit-ke chéu-thet.

²³ Chṳ́-yû Ngie-sàng ke vòng pûn-ngìn sâng-sâng chok-to Yok-sû-â ke mien-chhièn.

²⁴ Ngie-sàng ngìn kiuk Yî-set-lie̍t-ngìn to fông-liòng ke yâ-thi; chúng-he Yî-set-lie̍t-ngìn chiông kì-têu chhiòn-phu chhṳ̀-sí chhai ke-vi, yèn-heu chón-to Ngie-sàng, yu chiông liù chhai sàng-tú ke ngìn chhṳ̀-thet.

^25-26 Yok-sû-â yit-chhṳ̍t yung kì ke chhiông-thèu chṳ́-hiong Ngie-sàng, chhṳ̍t-to sàng-tú ke ngìn chhiòn-phu pûn-ngìn chhṳ̀ chhiang-chhiang, chang piong-hâ kì ke chhiông-thèu. Ke-ngit, Ngie-sàng ke ngìn chhiòn-phu pûn-ngìn chhṳ̀ chhiang-chhiang, nàm-ńg yit-khiung yit-van lióng-chhiên ngìn.

²⁷ Yî-set-lie̍t-ngìn cheu Song-chú fûn-fu Yok-sû-â ke fa chiông sàng-tú ke thèu-sâng lâu chhòi-vu̍t liù hâ-lòi.

²⁸ Yok-sû-â chiông Ngie-sàng sêu chhiang-chhiang; to kîm-pû-ngit Ngie-sàng hàn-he yit-phién fông-liòng ke nài-tôi.

²⁹ Kì chiông Ngie-sàng ke vòng tiau-sí chhai su-táng, sṳ̂-thí liù chhai ke-vi, chhṳ̍t-to lìm-am-é. Ngit-thèu lo̍k-sân ke sṳ̀, Yok-sû-â ham-ngìn chiông sṳ̂-thí nâ hâ-lòi, fit chhai sàng mùn-héu. Kì-têu chhai sṳ̂-thí mien-táng tôi yit thai-tôi sa̍k-thèu; liá sa̍k-tôi to kîm-pû-ngit hàn chhai ke-vi.

Chhai Yî-pâ-lu-sân Siên-thu̍k Fap-li̍t

³⁰ Ke-sṳ̀, Yok-sû-â chhai Yî-pâ-lu-sân vi Song-chú — Yî-set-lie̍t ke Song-ti hí yit-chho chi-thàn,

³¹ he cheu Song-chú ke phu̍k-ngìn Mô-sî só chṳ́-sṳ Yî-set-lie̍t-ngìn ke fông-fap hí ke; Mô-sî ke Fap-li̍t-sû ki-chai: “Oi yung ke-têu mò kîn-ko thiet-hi chho̍k ke kûi-chak sa̍k-thèu hí chi-thàn.” Kì-têu chhai chi-thàn táng hien sêu-fa-chi pûn Song-chú, ya hien phìn-ôn-chi.

³² Chhai ke-vi, tông Yî-set-lie̍t-ngìn mien-chhièn, Yok-sû-â chiông Mô-sî só-siá ke fap-li̍t chhùng-sîn siá chhai sa̍k-thèu táng.

³³ Yî-set-lie̍t-ngìn lâu kì ke-têu chóng-ló, chóng-kôn, sṳ́m-phan-kôn, lâu chhiam-sṳ̀ he̍t chhai kì-têu tông-chûng ke ngoi-chhu̍k ngìn fûn-cho lióng-chhui, khî chhai Song-chú ke yok-khui lióng-phién, mien-tui kông yok-khui ke Li-vi-ngìn chi-sṳ̂, yit-pan ke ngìn tui-tén Kî-li-sîm-sân, nang-ngoi yit-pan ke ngìn tui-tén Yî-pâ-lu-sân. Song-chú ke phu̍k-ngìn Mô-sî sṳt fûn-fu kì-têu, tông kì-têu chiap-su chuk-fuk ke sṳ̀, chhiu-he oi án-ngiòng cho.

³⁴ Yèn-heu, Yok-sû-â cheu Fap-li̍t-sû só-siá ke, thai-sâng siên-thu̍k chhiòn-phu fap-li̍t, pâu-hàm chuk-fuk lâu chu-chú.

³⁵ Mô-sî kie-min chûng ke tak-ki fa, Yok-sû-â lûng-chúng chhai Yî-set-lie̍t chhiòn-thí ngìn-mìn ke chhi-fi chûng siên-thu̍k; liá-têu ngìn-chûng, ya pâu-hàm fu-ńg, se-ngìn-è, lâu chhiam-sṳ̀ he̍t chhai kì-têu tông-chûng ke ngoi-chhu̍k ngìn.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan