Bìoball air-loidhne

Yok-sû-â Ki 7 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Â-kôn Fam-chhui

¹ Song-chú sṳt min-lin Yî-set-lie̍t-ngìn cho-m̀-tet nâ ke-têu oi fí-me̍t ke chan-li-phín, chúng-he yû-ngìn vì-poi min-lin. Kì ke miàng ôn-to Â-kôn, he Kâ-mí ke lai-é, Sat-tí ke sûn-é, su̍k Yù-thai kî-chhu̍k chûng ke Chhia-lâ chûng-chhu̍k. Kì mò chûn-sú liá min-lin, só-yî Song-chú hiong Yî-set-lie̍t-ngìn thai fat-khién.

² Yok-sû-â phai-ngìn tui Yâ-li-kô to Pak-Â-vùn fu-khiun, Pak-thi̍t-li tûng-phién ke Ngie-sàng, min-lin kì-têu hi tá-tham ke só-chhai. Kì-têu vàn-sṳ̀n tá-tham heu,

³ chón-lòi hiong Yok-sû-â po-ko kóng: “M̀-sṳ́ chhut-thung chhiòn-phu ngìn-mìn hi kûng-tá Ngie-sàng; yung lióng-sâm chhiên-ngìn chhiu la-lé, yîn-vi sàng-tú ke ngìn mò kí-tô.”

⁴ Só-yî thai-yok yû sâm-chhiên ke Yî-set-lie̍t-ngìn sông-hi kûng-tá Ngie-sàng, chúng-he kì-têu sa sû-thet.

⁵ Ngie-sàng ke ngìn kiuk kì-têu, tui sàng-mùn yit-chhṳ̍t kiuk-to Sṳ-pâ-lìm, chhai hâ-kia ke thi-fông chiông sâm-sṳ̍p liuk-sà chhṳ̀-thet. Só-yî, Yî-set-lie̍t-ngìn kiâng-to mò-tám.

⁶ Yok-sû-â lâu Yî-set-lie̍t-ngìn ke-têu chóng-ló pî-sông to chhá-lan sâm-fu, nâ chhṳ̀n-fôi ve chhai thèu-nà táng, chhai Song-chú ke yok-khui chhièn phu̍k chhai thi-song, chhṳ̍t-to lìm-am-é.

⁷ Yok-sû-â kóng: “Ái! Chṳ-kô ke Song-chú â, Ngì cho-má-ke thu liá ngìn-mìn ko Yok-tan-hò nè? He oi chiông ngài-têu kâu-pûn Â-mô-li-ngìn, fí-me̍t ngài-têu he-mò? Cho-má-ke m̀-pûn ngài-têu liù chhai Yok-tan-hò ke-phién nè?

⁸ Chú â, liá-ha Yî-set-lie̍t ngìn-mìn yí-kîn chhai thi̍t-ngìn mien-chhièn sû-thet, ngài hàn-yû má-ke hó kóng nè?

⁹ Kâ-nàm-ngìn lâu liá thi-fông só-yû ke ngìn yit thâng-tó liá sêu-sit, kì-têu voi lòi pâu-vì ngài-têu, chiông ngài-têu ke miàng vàn-chhiòn chhù-thet. Ke-sṳ̀, Ngì oi ngióng-pân vì-fu Ngì ke thai-miàng nè?”

¹⁰ Song-chú tui Yok-sû-â kóng: “Hong hí-lòi! Cho-má-ke phu̍k chhai thi-song nè?

¹¹ Yî-set-lie̍t-ngìn yû fam-chhui! Kì-têu vì-fam Ngài ke min-lin, vì-poi Ngài lâu kì-têu ke li̍p-yok. Kì-têu nâ ke-têu oi fí-me̍t ke chan-li-phín; kì-têu thêu liá-têu tûng-sî, lâu chhṳ-kâ ke tûng-sî khiung-ha khong hí-lòi.

¹² Só-yî, Yî-set-lie̍t-ngìn mò phan-fap tá-yàng thi̍t-ngìn. Kì-têu chón-sṳ̂n thò-chéu, yîn-vi kì-têu sàng-cho su chu-chú ke. Ngì-têu na m̀ fí-me̍t ke-têu mò yin-kôi nâ ke chan-li-phín, Ngài chhiu mò chai lâu ngì-têu khiung-ha!

¹³ Liá-ha ngì hong hí-lòi, oi kiet-chhiang ngìn-mìn, ham kì-têu chún-phi hó, thiên-kông-ngit to Ngài mien-chhièn lòi, yîn-vi Ngài — Song-chú, Yî-set-lie̍t ke Song-ti oi lâu kì-têu kóng: ‘Yî-set-lie̍t-ngìn nâ, ngì-têu yû nâ Ngài min-lin ngì-têu yit-thin oi fí-me̍t ke chan-li-phín. Na-he ngì-têu m̀ chhù-thet liá-têu tûng-sî, ngì-têu chhiu mò phan-fap tá-yàng thi̍t-ngìn!’

¹⁴ Ngì oi fûn-fu ngìn-mìn, thiên-kông chêu-sṳ̀n oi cheu kî-chhu̍k si̍p-ha̍p to Ngài mien-chhièn lòi; Ngài — Song-chú chhû-tó ke kî-chhu̍k oi yit chûng-chhu̍k yit chûng-chhu̍k hàng chhièn-lòi, chhû-tó ke chûng-chhu̍k oi yit kâ-chhu̍k yit kâ-chhu̍k hàng chhièn-lòi; chhû-tó ke kâ-chhu̍k oi yit-sà yit-sà hàng chhièn-lòi.

¹⁵ Ngài chhû-tó ke ke-sà, chhiu-he nâ yin-kôi oi fí-me̍t ke chan-li-phín ke ngìn; ngì-têu oi sêu-sí kì, lièn kì ke vuk-hâ ngìn lâu só-yû su̍k kì ke tûng-sî ya oi sêu-thet; yîn-vi kì vì-poi Ngài ke yok, pûn Yî-set-lie̍t tai-lòi kien-seu.”

¹⁶ Thi-ngi ngit tá-chó, Yok-sû-â ham Yî-set-lie̍t-ngìn yit kî-chhu̍k yit kî-chhu̍k si̍p-ha̍p to kì mien-chhièn lòi, chhû-tó ke he Yù-thai kî-chhu̍k.

¹⁷ Kì ham Yù-thai kî-chhu̍k yit chûng-chhu̍k yit chûng-chhu̍k hàng chhièn-lòi, chhû-tó Chhia-lâ chûng-chhu̍k. Kì ham Chhia-lâ chûng-chhu̍k yit kâ-chhu̍k yit kâ-chhu̍k hàng chhièn-lòi, chhû-tó ke he Sat-tí kâ-chhu̍k.

¹⁸ Kì ham Sat-tí kâ-chhu̍k yit-ke yit-ke hàng chhièn-lòi; chui-heu chhiu chhû-tó Sat-tí ke sûn-é, Kâ-mí ke lai-é Â-kôn.

¹⁹ Yok-sû-â tui Â-kôn kóng: “Se-chṳ́ â, ngì oi chiông yùng-kông kûi-pûn Song-chú — Yî-set-lie̍t ke Song-ti, chhai Kì mien-chhièn ngin-chhui. Lâu ngài kóng, ngì to-tái cho má-ke sṳ; cho-m̀-tet phien ngài ô!”

²⁰ Â-kôn en Yok-sû-â kóng: “Ngài khok-sṳ̍t yû tet-chhui Song-chú — Yî-set-lie̍t ke Song-ti. Liá he ngài só cho ke:

²¹ Chhai ngài-têu ke chan-li-phín tông-chûng, ngài khon-tó yit-liâng tông-chiâng ke Pâ-pí-lùn ngoi-sâm, hàn-yû thai-yok lióng kûng-kîn chhûng ke ngiùn-è, lâu yit-thiàu thai-yok pan kûng-kîn chhûng ke kîm-é. Ngài thâm-oi liá-têu tûng-sî, chhiu nâ hí-lòi. Liá-têu tûng-sî chhiòn-phu mài chhai ngài chong-phùng tú ke thi-nài-hâ; ngiùn-è chhai chui hâ-poi.”

²² Só-yî, Yok-sû-â phai-ngìn chéu-to chong-phùng ke-vi hi-chhìm, chṳn-kîn fat-hien ke-têu yit-thin oi fí-me̍t ke tûng-sî mài chhai thi-nài-hâ, ngiùn-è chhai chui hâ-poi.

²³ Kì-têu chiông ke-têu tûng-sî pân-chhut chong-phùng, tai-to Yok-sû-â lâu só-yû Yî-set-lie̍t ngìn-mìn ke-vi, pài chhai Song-chú mien-chhièn.

²⁴ Yok-sû-â lâu Yî-set-lie̍t ngìn-mìn khiú-tó Â-kôn, chiông ngiùn-è, ngoi-sâm, kîm thiàu, lièn thùng Â-kôn ke chṳ́-ńg, ngiù, yòng, lì, chong-phùng, lâu kì só-yû ke tûng-sî chhiòn-phu tai-to Â-kot sân-lak.

²⁵ Yok-sû-â tui Â-kôn kóng: “Ngì cho-má-ke tai-pûn ngài-têu liá-ke châi-nan nè? Liá-ha Song-chú oi kong châi-nan pûn ngì lé!” Só-yî Yî-set-lie̍t mìn-chung yung sa̍k-thèu te̍p-sí Â-kôn lâu kì ke vuk-hâ ngìn, sêu-thet kì só-yû ke tûng-sî.

²⁶ Kì-têu chhai Â-kôn sṳ̂-thí mien-táng tôi yit thai-tôi sa̍k-thèu. Liá sa̍k-tôi to liá-ha hàn chhai ke-vi. Só-yî, ke thi-fông to kîm-pû-ngit hàn ôn-to Â-kot sân-lak. Án-ngiòng, Song-chú thìn-thet Kì ke thai fat-khién.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan