Bìoball air-loidhne

Yok-sû-â Ki 3 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Ko Yok-tan-hò

¹ Thi-ngi chêu-sṳ̀n, Yok-sû-â lâu só-yû ke Yî-set-lie̍t-ngìn tá-chó lì-khôi Sṳ̍p-thìn, lòi-to Yok-tan-hò, chhai ke-vi ôn-yàng, tén ko-hò.

² Sâm-ngit heu, ngìn-mìn ke-têu liâng-chhiu to yàng-chûng tak só-chhai hi,

³ fûn-fu ngìn-mìn kóng: “Ngì-têu khon-tó Li-vi kî-chhu̍k ke-têu chi-sṳ̂ kông Song-chú — ngì-têu Song-ti ke yok-khui chhièn-chin ke sṳ̀, ngì-têu chhiu oi sái-yàng, thèn yok-khui chhièn-chin.

⁴ Ngì-têu màng-sṳt hi-ko liá thi-fông, só-yî kì-têu voi chhai thèu-chhièn tai-lu. Chúng-he ngì-têu m̀-hó hàng thet-khiûn yok-khui, oi thèn chhai yok-khui heu-poi, pó-chhṳ̀ thai-yok yit kûng-lî yén.”

⁵ Yok-sû-â fûn-fu ngìn-mìn: “Ngì-têu oi kiet-chhiang chhṳ-kâ, yîn-vi thiên-kông-ngit Song-chú oi chhai ngì-têu tông-chûng hàng sṳ̀n-chiak.”

⁶ Yèn-heu Yok-sû-â fûn-fu ke-têu chi-sṳ̂: “Ngì-têu oi chiông yok-khui kông hí-lòi, hàng chhai ngìn-mìn thèu-chhièn.” Kì-têu chhiu cheu án-ngiòng hi-cho.

⁷ Song-chú tui Yok-sû-â kóng: “Tui kîm-pû-ngit khôi-sṳ́, Ngài oi sṳ́ só-yû ke Yî-set-lie̍t ngìn-mìn chûn ngì cho thai liâng-chhiu. Kì-têu voi khon-chhut Ngài lâu ngì khiung-ha, chhiong yî-chhièn Ngài lâu Mô-sî khiung-ha yit-yong.

⁸ Ngì oi fûn-fu kông yok-khui ke-têu chi-sṳ̂: ‘Ngì-têu to Yok-tan hò-sùn ke sṳ̀, chhiu oi hàng-ngi̍p hò-pa tú khî-tén.’ ”

⁹ Só-yî Yok-sû-â tui Yî-set-lie̍t ngìn-mìn kóng: “Lòi â! Lòi thâng Song-chú — ngì-têu Song-ti ke fa.

^10-11 Ngì-têu hiong-chhièn hàng ke sṳ̀, Song-ti yit-thin voi chhai ngì-têu mien-chhièn kiuk-chéu Kâ-nàm-ngìn, Het-ngìn, Hî-vi-ngìn, Pí-li-sé-ngìn, Kiet-kâ-sat-ngìn, Â-mô-li-ngìn lâu Yâ-pu-sṳ̂-ngìn. Chhiòn sṳ-kie ke Chú-chái — Song-chú ke yok-khui chhai ngì-têu thèu-chhièn ko Yok-tan-hò ke sṳ̀, ngì-têu chhiu tî yún-sên Song-ti chhai ngì-têu chûng-kiên.

¹² Liá-ha, ngì-têu oi tui Yî-set-lie̍t sṳ̍p-ngi kî-chhu̍k tông-chûng kok kî-chhu̍k sién-chhut yit-sà, yit-khiung sṳ̍p-ngi sà.

¹³ Ke-têu chi-sṳ̂ kông chhiòn sṳ-kie ke Chú-chái — Song-chú ke yok-khui tha̍p-tó súi ke sṳ̀, Yok-tan-hò ke súi voi thìn-chṳ́ liù-thûng. Song-yù liù hâ-lòi ke súi voi si̍p chhai yit-ke thi-fông, sàng-cho yit-chak thai pî-thèu.”

^14-15 Ke-sṳ̀ tú-hó he sû-kot ke sṳ̀-chiet, hò-pa súi cheu-sòng chong-ko lióng-ngan. Mìn-chung chhiu sái-yàng, chún-phi ko Yok-tan-hò; ke-têu chi-sṳ̂ kông-tén yok-khui chhai kì-têu thèu-chhièn hàng. Ke-têu chi-sṳ̂ ke kiok yit tha̍p-ngi̍p súi,

¹⁶ hò-pa súi chhiu thìn-chṳ́ liù-thûng: song-yù ke súi chhai Sat-lâ-tan fu-khiun ke Â-tông-sàng chhiu si̍p cho yit-ha, sàng-cho yit-chak thai pî-thèu; ha-yù liù-ngi̍p Sí-hói ke súi vàn-chhiòn chhiet-thôn. Só-yî mìn-chung tui Yâ-li-kô tui-mien fu-khiun ko-hi.

¹⁷ Ke-têu chi-sṳ̂ kông-tén Song-chú ke yok-khui, khî-he̍t chhai Yok-tan-hò tûng-ông ke châu-thi, tén Yî-set-lie̍t mìn-chung hàng-tén ko châu-thi, chhṳ̍t-to só-yû ke koet-mìn chhiòn-phu ko Yok-tan-hò.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan