Bìoball air-loidhne

Yok-sû-â Ki 24 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yok-sû-â Chhai Sṳ-kiam lâu Ngìn-mìn Chhùng-sîn Li̍p-yok

¹ Yok-sû-â chhai Sṳ-kiam seu-si̍p Yî-set-lie̍t kok kî-chhu̍k. Kì seu-si̍p Yî-set-lie̍t ke chóng-ló, liâng-chhiu, sṳ́m-phan-kôn, lâu kôn-chóng, kì-têu chhiu lòi-to Song-ti mien-chhièn.

² Yok-sû-â tui chhiòn-phu mìn-chung kóng: “Song-chú — Yî-set-lie̍t ke Song-ti án-ngiòng kóng: ‘Tông-kiú yî-chhièn, ngì-têu ke chú-siên Thâ-lâ pin kì ke lai-é Â-pak-lâ-hón lâu Nâ-ho̍k, he̍t chhai Yu-fat-lâ-tí-hò ke-phién; kì-têu pai phe̍t ke sṳ̀n-mìn.

³ Ngài tai ngì-têu ke chú-siên Â-pak-lâ-hón tui ke-vi ko Yu-fat-lâ-tí-hò, thu kì hàng-phien Kâ-nàm kok-thi, yu su-pûn kì chhin-tô chṳ́-sûn. Ngài su-pûn kì Yî-sat,

⁴ yu pûn Yî-sat lióng-ke lai-é — Ngâ-kok lâu Yî-so. Ngài chiông Yî-tûng ke sân-khî pûn Yî-so, cho kì ke sán-ngia̍p; chúng-he Ngâ-kok lâu kì ke chṳ́-sûn hâ-to Âi-khi̍p hi.

⁵ “ ‘Ngài chhâi-phai Mô-sî lâu Â-lùn; Ngài kong thai châi-fo pûn Âi-khi̍p; chui-heu Ngài thu ngì-têu chhut-lòi.

⁶ Ngài tui Âi-khi̍p chiông ngì-têu ke chú-siên thu chhut-lòi; Âi-khi̍p-ngìn yung chan-chhâ, pîn-mâ kiuk kì-têu. Ngì-têu ke chú-siên to Fùng-hói ke sṳ̀,

⁷ kì-têu khiù Ngài kiu-miang. Ngài yung vû-am chiông kì-têu lâu Âi-khi̍p-ngìn kak-khôi, Ngài yung hói-súi chim-thet Âi-khi̍p-ngìn, chiông kì-têu thûn-me̍t. Ngài tui Âi-khi̍p só-cho ke ngì-têu chhiòn-phu chhin chhîn-chhú. “ ‘Ngì-têu chhai khóng-yâ he̍t tông-kiú,

⁸ heu-lòi, Ngài thu ngì-têu to Yok-tan-hò tûng-phién, to Â-mô-li-ngìn só-he̍t ke thú-thi. Kì-têu kûng-kit ngì-têu; chúng-he Ngài chiông kì-têu kâu chhai ngì-têu sú-chûng, sṳ́ ngì-têu tet-tó kì-têu ke thú-thi. Ngì-têu chin-kûng ke sṳ̀, Ngài chhiu chhù-me̍t kì-têu.

⁹ Heu-lòi, Mô-ap-vòng Sî-pat ke lai-é Pâ-le̍t chún-phi kûng-tá ngì-têu, phai-ngìn ham Pí-ngí ke lai-é Pâ-làn lòi chu-chú ngì-têu.

¹⁰ Chúng-he Ngài m̀-thâng Pâ-làn ke fa, só-yî kì fán-chón chuk-fuk ngì-têu kí-hâ pái; án-ngiòng, Ngài chhiu kiu ngì-têu thot-lì Pâ-le̍t ke sú.

¹¹ “ ‘Ngì-têu ko Yok-tan-hò, to Yâ-li-kô. Yâ-li-kô-ngìn kûng-tá ngì-têu, chhiong Â-mô-li-ngìn, Pí-li-sé-ngìn, Kâ-nàm-ngìn, Het-ngìn, Kiet-kâ-sat-ngìn, Hî-vi-ngìn, Yâ-pu-sṳ̂-ngìn kûng-tá ngì-têu yit-yong; chúng-he Ngài chiông kì-têu chhiòn-phu kâu chhai ngì-têu sú-chûng.

¹² Ngì-têu chhièn-chin ke sṳ̀, Ngài sṳ́ kì-têu chho̍k-kiâng fun-lon, chiông lióng-ke Â-mô-li-vòng kiuk-chéu; liá pin m̀-he yîn-vi ngì-têu yung tô-kiam ya-he kiûng-chien só cho-sṳ̀n ke.

¹³ Ngài su-pûn ngì-têu ke thú-thi m̀-he ngì-têu yung lò-li̍t tet-lòi ke; Ngài su-pûn ngì-têu ke sàng-sṳ pin m̀-he ngì-têu hí ke. Ngì-têu liá-ha chhiu he̍t chhai ke-vi; ngì-têu sṳ̍t ke phù-thò lâu kám-lám pin m̀-he ngì-têu chhṳ-kâ chung ke.’ ”

¹⁴ Yok-sû-â ki-siu̍k kóng: “Ngì-têu oi kin-vi Song-chú, chṳ̂n-sîm sṳ̀n-yi sṳ-fung Kì. Ngì-têu oi chhù-thet chú-siên chhai Mî-sok-put-tha̍t-mí-â lâu Âi-khi̍p só-pai ke sṳ̀n-mìn, tân-tân sṳ-fung Song-chú.

¹⁵ Na-he ngì-têu m̀ kâm-ngien sṳ-fung Song-chú, án-ngiòng, kîm-pû-ngit oi cho kiet-thin, ngì-têu oi sṳ-fung nai-ke: He ngì-têu chú-siên chhai Mî-sok-put-tha̍t-mí-â só-pai ke sṳ̀n-mìn? Ya-he ngì-têu he̍t liá thi-fông ke Â-mô-li-ngìn só-pai ke sṳ̀n-mìn? Chúng-he ngài lâu ngài chhiòn-kâ, ngài-têu oi sṳ-fung Song-chú.”

¹⁶ Mìn-chung en-kóng: “Ngài-têu chhie̍t-tui m̀-kám lì-khôi Song-chú, hi sṳ-fung phe̍t ke sṳ̀n-mìn!

¹⁷ Song-chú — ngài-têu ke Song-ti sṳt thu ngài-têu ke chú-siên lâu ngài-têu lì-khôi chhai Âi-khi̍p cho nù-chhòi ke koet-kâ; ngài-têu chhîn-ngién khon-tó Kì só-hàng ke thai sṳ̀n-chiak. Chhai ngài-têu kîn-ko ke koet-kâ chûng, mò-lun má-ke thi-fông, Kì lûng-chúng pó-sú ngài-têu ôn-chhiòn.

¹⁸ Ngài-têu chin-ngi̍p liá-phién thú-thi ke sṳ̀, Song-chú kiuk-chéu só-yû he̍t chhai liá-vi ke Â-mô-li-ngìn. Só-yî ngài-têu oi sṳ-fung Song-chú; Kì he ngài-têu ke Song-ti.”

¹⁹ Yok-sû-â tui mìn-chung kóng: “Chúng-he ngì-têu mò yit-thin yû phan-fap sṳ-fung Song-chú! Yîn-vi Kì he sṳ̀n-sṳn ke Song-ti, he chôn-chhìn ke Song-ti. Kì m̀-voi sa-miên ngì-têu ke ko-fam lâu chhui-ok.

²⁰ Na-he ngì-têu lì-khôi Song-chú, hi sṳ-fung ngoi-chhu̍k ke sṳ̀n-mìn, sûi-yèn Kì sṳt ên-thai ngì-têu, Kì hàn-he voi kong châi-fo fí-me̍t ngì-têu.”

²¹ Mìn-chung tui Yok-sû-â kóng: “Ngài-têu kiet-thin oi sṳ-fung Song-chú!”

²² Yok-sû-â kóng: “Ngì-têu chhṳ-kâ cho-chṳn, chṳn-mìn ngì-têu kiet-thin oi sṳ-fung Song-chú.” Kì-têu kóng: “Hó! Ngài-têu chhṳ-kâ cho-chṳn.”

²³ Só-yî Yok-sû-â min-lin kì-têu: “Ki-yèn án-ngiòng, ngì-têu oi chhù-thet só-yû ngoi-chhu̍k ke sṳ̀n-mìn, kiet-sîm kûi-hiong Song-chú — Yî-set-lie̍t ke Song-ti.”

²⁴ Mìn-chung tui Yok-sû-â kóng: “Ngài-têu kiet-thin oi sṳ-fung Song-chú — ngài-têu ke Song-ti; ngài-têu oi thâng-chhiùng Kì.”

²⁵ Ke-ngit, Yok-sû-â vi ngìn-mìn li̍p-yok; kì chhai Sṳ-kiam chiông fap-li̍t lâu thiàu-li kâu-pûn kì-têu.

²⁶ Yok-sû-â chiông liá-têu min-lin siá chhai Song-ti ke Fap-li̍t-sû, yèn-heu chhai Song-chú sṳn-só ke siong-su hâ tun yit-te thai sa̍k-thèu.

²⁷ Kì tui chhiòn-phu ngìn-mìn kóng: “Liá-te sa̍k-thèu oi vi ngài-têu cho-chṳn; kì thâng-tó Song-chú tui ngài-têu só kóng yit-chhiet ke fa. Só-yî, kì oi vi ngì-têu cho-chṳn, miên-tet ngì-têu phoi-ngia̍k ngì-têu ke Song-ti.”

²⁸ Yèn-heu Yok-sû-â ham ngìn-mìn tak-sà to-chón chhṳ-kâ pûn-tó ke thú-thi hi.

Yok-sû-â lâu Yî-li-â-sat Ko-sṳ̂n

²⁹ Liá-têu sṳ yî-heu, Song-chú ke phu̍k-ngìn — Nun ke lai-é Yok-sû-â ko-sṳ̂n; kì ko-sṳ̂n ke sṳ̀ he yit-pak yit-sṳ̍p se.

³⁰ Yî-set-lie̍t ngìn-mìn chiông kì ôn-chong chhai kì pûn-tó ke thú-thi, chhiu-he Kâ-sṳ̍t-sân pet-phién Yî-fap-lièn sân-khî ke Thìn-nâ-Sî-lâ.

³¹ Yok-sû-â chhai-sṳ ke ngit-è, Yî-set-lie̍t ngìn-mìn sṳ-fung Song-chú; kì sí-thet yî-heu, ke-têu chhîn-ngién khon-tó Song-chú vi Yî-set-lie̍t-ngìn só-cho yit-chhiet sṳ ke chóng-ló hàn-sâng ke ngit-è, ngìn-mìn hàn-he sṳ-fung Song-chú.

³² Yî-set-lie̍t ngìn-mìn tui Âi-khi̍p só tai chhut-lòi Yok-sit ke hài-kut, ôn-chong chhai Sṳ-kiam, chhiu-he Ngâ-kok yung yit-pak chak ngiùn-pi hiong Sṳ-kiam ke â-pâ, Ha̍p-mat ke chṳ́-sûn mâi hâ-lòi ke-te thi. Yok-sit ke heu-thoi sṳ̀n-chiap ke-thi.

³³ Â-lùn ke lai-é Yî-li-â-sat ya ko-sṳ̂n, ôn-chong chhai Kî-pí-â, chhiu-he kiâ lai-é Fî-nì-ha̍p só pûn-tó chhai Yî-fap-lièn sân-khî ke se-sân táng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan