Bìoball air-loidhne

Yok-pak Ki 9 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Yok-pak chiap-tén en-kóng:

² He â, liá tho-lî ngài chhiòn-phu tî; chúng-he chhai Song-ti mien-chhièn, ngìn ngióng voi chhṳ̂n-cho ngi-ngìn nè?

³ Má-ngìn nèn lâu Kì phien-lun nè? Kì thì-chhut yit-chhiên chak mun-thì, yit-chak tû mò-ngìn voi fì-tap.

⁴ Song-ti thai-yû chṳ-fi, thai-yû nèn-li̍t; má-ngìn tí-khong Kì hàn nèn phìn-ôn nè?

⁵ Kì sái thai-sân, sân ya chhiòn-mò kám-kok; Kì yit fat-khién, lièn sân tû pién chón-lòi.

⁶ Kì sṳ́ thi thîn-thûng, lì-khôi ngièn-vi; Kì sṳ́ thi ke chhû-é yèu-thung.

⁷ Kì hêm ngit-thèu mo̍k chhut-lòi, yu sṳ́ sên-é mò fat-kông.

⁸ Kì chhṳ-kâ phû-sat kiûng-chhông, kiok-tha̍p chhai hói-long táng-kô.

⁹ Kì chhai thiên-táng ôn sên-é — Pet-téu, Lia̍p-fu-sên, Mâu-sên, lâu nàm-khi̍t ke sên-khiùn.

¹⁰ Ngài-têu mò-fap liáu-kié Kì só-cho ke thai-sṳ; Kì khì-meu ke chok-vì vù-khiùng vù-chhin.

¹¹ Song-ti tui ngài sùn-thèu ko, ngài khon m̀-tó Kì; Kì tui ngài mien-chhièn hàng-ko, ngài ya mò kám-kok.

¹² Kì sùi-yi nâ-chéu Kì só-oi ke, mò ngìn nèn chú-tóng; má-ngìn kám mun Kì kóng: Ngì chhai ke-vi cho má-ke nè?

¹³ Song-ti ke nu-hi m̀-voi thìn-chṳ́; ke-têu pông-chhu hói-koai Lâ-ha̍p-pak ke ngìn chhiòn-phu phu̍k chhai Kì ke kiok-hâ.

¹⁴ Ngài ngióng-kám en Song-ti? Ngài ngióng-kám lâu Kì au?

¹⁵ Ngài sûi-yèn mò-chhui, ya m̀-kám en Kì; ngài chṳ́-nèn hiong Song-ti — ngài ke sṳ́m-phan chá khiù lìn-mén.

¹⁶ Chhiu-son ngài khiù-ham Kì, Kì chṳn-kîn tap-yin ngài, ngài me m̀-kám siông-sin Kì hén thâng ngài ke sâng.

¹⁷ Kì yung phau-fûng tá-kit ngài, mò-yèn mò-ku sông-hoi ngài.

¹⁸ Kì m̀ pûn ngài théu yit-héu hi, fán-chón sṳ́ thung-khú chhûng-mân ngài.

¹⁹ Na-he ngài yung phau-li̍t, má-ngìn yû Kì án thai-li̍t! Na-he sông fap-thìn, má-ngìn kám chhòn Kì chhut-thìn?

²⁰ Ngài sûi-yèn mò-chhui, ngài ke fa hàn-he thin ngài yû-chhui; ngài sûi-yèn chhîn-pha̍k, Kì hàn-he oi chṳn-mìn ngài ke ko-sṳt.

²¹ Ngài mò-chhui, chúng-he yû má-ke yung nè? Ngài yí-kîn khon-khiâng ngài ke sâng-miang.

²² Yû-chhui mò-chhui chhiòn-phu he khiung-yong, chúng-kóng Song-ti oi fí-me̍t ngài-têu.

²³ Na-he fut-yèn-kiên tù-tó châi-fo lòi sí-thet, Song-ti chhiu chhṳ́-seu mò-chhui ke ngìn só su-tó ke chhie̍t-mong.

²⁴ Song-ti chiông sṳ-kie kâu chhai fái-ngìn ke sú-chûng; Kì sṳ́ thi-song ke sṳ́m-phan-kôn chhiòn-phu chhiong chhiâng-miâng yit-yong. Liá m̀-he Song-ti cho ke, he má-ngìn cho ke nè?

²⁵ Ngài ke ngit-è pí sung khoai-sin ke chéu kha-kiak, chhiong pî-tén ko-hi, mò khon-tó má-ke fuk-lo̍k.

²⁶ Ngài ke sâng-miang chhiong khoai-thìn chéu tông-kiak, chhiu-chhiong ên-tiâu chok sṳ̍t-vu̍t chhung-tén hâ.

²⁷ Ngài chhiu-son miên-kióng fôn-seu, sióng m̀ ki-tet chhṳ-kâ ke thung-khú,

²⁸ só-yû ke châi-nan hàn-he hoi ngài mò-kat mò-sat; yîn-vi ngài tî Song-ti m̀-voi khon ngài cho mò-chhui.

²⁹ Ki-yèn Kì oi phan ngài yû-chhui, ngài ngióng-sṳ́ pha̍k-pha̍k sṳ̂n-yên nè?

³⁰ Chhiu-son ngài yung siet súi sé-sṳ̂n, chhiu-son ngài nâ chhà-kû sé-sú,

³¹ Song-ti hàn oi chiông ngài fit-lo̍k lá-sap fut; lièn ngài ke sâm-fu ya chhiòn-phu voi hiàm ngài.

³² Na-he Song-ti lâu ngài khiung-yong he ngìn, ngài cho-tet lâu Kì phien-lun; ngài cho-tet lâu Kì khiung-ha hi fap-yen, lióng-sà tông-mien lòi tui-chṳt.

³³ Chúng-he, Kì lâu ngài chṳ̂-kiên mò kûng-tong ke chhài-phan; mò-ngìn cho-tet chhai Song-ti lâu ngài chṳ̂-kiên cho thiàu-kié.

³⁴ Song-ti â, khiù Ngì m̀-hó chai chit-fa̍t ngài! Khiù Ngì m̀-hó chai khiúng-hak ngài.

³⁵ Án-ngiòng, ngài chhiu kám thai-tám kóng-fa, chhiòn m̀-sṳ́ kiâng Ngì; chúng-he, liá-ha ngài ke chhìn-hìn pin m̀-he án-ngiòng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan