Yok-pak Ki 8 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Chiap-tén, Sû-â-ngìn Pí-le̍t-tha̍t en-kóng:

² Liá-chúng fa ngì oi kóng-to kí-sṳ̀ nè? Ngì kóng ke chhiong fûng-chhâi án-ngiòng lon chhôi!

³ Kám-kóng Song-ti voi tiên-to sṳ-fî mâ? Kám-kóng Chhiòn-nèn-chá voi vì-poi kûng-ngi?

⁴ Ngì ke chṳ́-ńg yit-thin he tet-chhui Kì, só-yî Kì chhiu sṳ́ kì-têu su po-yin.

⁵ Ngì yin-kôi mien-hiong Song-ti, pet-chhiet khién-khiù Chhiòn-nèn-chá.

⁶ Na-he ngì án sùn-kiet chṳn-chhṳ̍t, Song-ti yit-thin voi pông-chhu ngì, fì-fu̍k ngì ke thièn-yèn kâ-sṳt.

⁷ Ngì hí-chhû sûi-yèn mì-se, to-mî pit-thin thai hîn-vong.

⁸ Chhiáng ngì chhà-khon kú-thoi ke chṳ-fi, ngiên-kiu ngài-têu chú-siên ke kîn-ngiam.

⁹ Ngài-têu ke sâng-miang tông-tón, yu múng-múng túng-túng; ngit-è kín ko chhiong yáng-è, yit-ha chhiu mò-thet.

¹⁰ Ngài-têu ke chú-siên kám m̀-voi chṳ́-kau ngì? Oi thâng kì-têu tui sîm-tú só-kóng ke fa.

¹¹ Phû-chhó mò nài kám voi sâng? Lù-chuk mò súi kám voi vong?

¹² Súi yit châu-thet, kì-têu chui-siên sí-thet; na-he hàn-nun, kot hâ-lòi ya mò-yung.

¹³ Mò kin-khièn ke ngìn lâu phû-chhó khiung-yong; m̀ ki-tet Song-ti, chhiu mò hî-mong lé.

¹⁴ Kì-têu sin-lai ke voi thôn ke sṳ̂, kì-têu yí-kho ke he tî-tû mióng.

¹⁵ Kì-têu pen-tén mióng-è, chúng-he tî-tû mióng kám m̀-voi lan-thet? Kì-têu khiú-tén mióng-è, tî-tû mióng kám-nèn pûn kì-têu yí-sṳ?

¹⁶ Fái-ngìn chhiong ngit-thèu hâ ke chha̍p-chhó, thèn-ya̍p chhin-chiâng, chhe-to mân-yèn.

¹⁷ Kì ke kîn chhàn-tén ngàm-sa̍k, tâng-ngi̍p sa̍k-phung tú.

¹⁸ Chúng-he, na-he chiông kì pâng chhut-lòi, mò ngìn tî kì sṳt chhai ke-vi sâng-kîn.

¹⁹ Khon â, liá chhiu-he fái-ngìn chhai sṳ-kiên ke hí-lo̍k; yî-heu phe̍t-ngìn voi thoi kì-têu ke thi-vi.

²⁰ Chúng-he, Song-ti yún-yén m̀-voi fit-thet vàn-chhiòn ngìn, ya chhie̍t-tui m̀-voi pông-chhu fái-ngìn.

²¹ Kì hàn-oi sṳ́ ngì khôi-sâng thai-seu; Kì hàn-oi sṳ́ ngì fôn-hí na-thiên.

²² Kì voi sṳ́ hen ngì ke ngìn kien-seu; Kì voi pûn fái-ngìn ke kâ sêu-me̍t.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan