Bìoball air-loidhne

Yok-pak Ki 31 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Ngài sṳt lâu ngài ke muk-chû li̍p-yok, khon se-moi-é chhie̍t-tui cho-m̀-tet tai sià-ngiam.

² Chṳ-song ke Song-ti vi ngài-têu só-thin ke po-yin he má-ke? Chṳ-kô ke Chhiòn-nèn-chá he ngióng-pân po-tap ngìn ke hàng-vì nè?

³ Kì kám m̀-he oi kong châi-nan pûn put-ngi ke ngìn? Kám m̀-he oi sṳ́ châi-fo lìm-to chok-ok ke ngìn?

⁴ Kì kám m̀-he chhà-khon ngài só hàng ke tho-lu? Kì kám m̀-he tiám-son ngài yit-chhiet ke kiok-phu?

⁵ Ngài kám fat-sṳ, ngài chhiùng-lòi m̀-sṳt chok-ok; ngài ya m̀-sṳt khî-cha phe̍t-ngìn.

⁶ Ngien Song-ti yung kûng-tong ke thiên-phìn lòi-chhṳn ngài; Kì chhiu voi tî ngài chṳn-kîn mò fam má-ke chhui.

⁷ Na-he ngài ke kiok phiên-lì chṳn-lu, sîm pûn só khon ke ok khip-yîn hi, sú yu pûn chhui-ok lòi tá-lá-sap,

⁸ chhiu pûn phe̍t-ngìn sû-kot ngài ke chhut-sán, pûn phe̍t-ngìn hióng-su ngài chung ke sán-vu̍t.

⁹ Na-he ngài tui lìn-sa ke pû-ngiòng yû sià-ngiam, mài-fu̍k chhai kì ke mùn-héu tén kî-fi,

¹⁰ chhiu pûn ngâ pû-ngiòng hi lâu phe̍t-ngìn chú-fan, chhiu pûn phe̍t ke nàm-ngìn lâu kì khiung-ha soi.

¹¹ Liá he ngiàm-chhung ke chhui; yin-tông oi phan sí-hìn.

¹² Liá-ke chhui voi chhiong fí-me̍t ke thai-fó, chiông ngài só-yû ke sán-vu̍t sêu chhiang-chhiang.

¹³ Ngài ke phu̍k-ngìn tui ngài péu-sṳ put-mân ke sṳ̀, ngài chhiu siòng-se thâng, yung kûng-tho tui-thai kì-têu.

¹⁴ Na-m̀-he án-ngiòng, ngài ngióng-nèn mien-tui Song-ti nè? Song-ti sṳ́m-mun ngài ke sṳ̀, ngài oi kóng má-ke nè?

¹⁵ Chhóng-chho ngài ke Song-ti kám m̀-he ya chhóng-chho kì-têu? Chhóng-chho ngài-têu ke kám m̀-he khiung yit-ke Song-ti nè?

¹⁶ Ngài kám sṳt m̀-hén kiu-chi khiùng-khú ngìn mò? Ngài kám sṳt pûn koá-fu sṳt-mong ko he-mò?

¹⁷ Ngài kám sṳt chhṳ-kâ sṳ̍t-to páu-páu, chúng-he yù-chhai kû-yì ngo tú-sṳ́?

¹⁸ Ngài chhòng-theu cheu-ku kû-yì, chhiong he kiâ-pâ; ngài yit-sên-ngìn sòng fù-chhṳ̀ pông-chhu koá-fu.

¹⁹ Ngài na tù-tó ngìn mò-sâm chok, lâng-to voi sí, ngài na khon-tó khiùng-khú ngìn mò sâm-fu hó-chok,

²⁰ ngài chhiu nâ chhṳ-kâ chhut-sán ke yòng-mô sâm pûn kì-têu chok-sêu. Kì-têu lûng-chúng sṳ̀n-sîm kám-chhia ngài.

²¹ Na-he ngài chhai fap-yen yû phèn-yû, chhiu kho sṳ-li̍t hi khî-fu kû-yì,

²² ngien ngài ke kiên-thèu lut-vón, ngien ngài ke sú-kut thôn-thet.

²³ Yîn-vi ngài tông-kiâng Song-ti ke chit-fa̍t, yîn Kì ke vî-ngiàm, ngài m̀-kám lon-lòi!

²⁴ Ngài chhiùng-lòi m̀-sṳt yí-kho kîm-chhièn, ya chhie̍t-tui m̀-voi sin-lai vòng-kîm.

²⁵ Ngài m̀-sṳt yîn-vi chhièn-chhòi kiêu-ngau, ya m̀-voi yîn-vi fu-chiuk fôn-hí.

²⁶ Ngài m̀-sṳt yîn-vi ngit-thèu án-kông, ya-he yîn-vi ngie̍t-kông án mìn-liong,

²⁷ chhiu su yín-yu hi kô-siung kì-têu, ya-he chîm-sú lòi péu-sṳ chûn-kin.

²⁸ Án-ngiòng cho chhiu-he phoi-ngia̍k chṳ-kô ke Song-ti; liá he chhui-thai ok-khi̍t, yin-kôi oi phan sí-hìn.

²⁹ Ngài chhiùng-lòi m̀-sṳt khon thi̍t-ngìn su-khú chhiu khoai-lo̍k, m̀-sṳt khon-tó kì-têu tù-tó châi-nan chhiu fôn-hí;

³⁰ m̀-chún ngài ke choi fam-chhui, chu-chú ngìn “kô-mô chhie̍t-thoi”.

³¹ Só-yû chhai ngài vuk-hâ cho-ko chhòng-kûng ke ngìn, m̀-sṳt kóng ngài mò hó-hó lòi chiap-thai kì-têu.

³² Ngài chhiáng ko-lu ke lî-hak to ngâ vuk-hâ lòi, chhiùng-lòi m̀-sṳt pûn kì-têu chhai kiê-hong ko-ya.

³³ Ngìn sòng-sòng oi chiông chhṳ-kâ ke ko-fam châ-tén; chúng-he ngài mò chiông chhṳ-kâ ke ko-sṳt khong-tén.

³⁴ Ngài chhiùng-lòi chhiu m̀-kiâng chhîn-chhu̍k ngoi-ngìn kóng ngài ke hàn-fa, mò yîn-vi kiâng ngìn ma chhiu m̀-kám kóng-fa, m̀-kám chhut-mùn.

³⁵ Kám-kóng mò ngìn hén thâng ngài sot-mìn mâ! Ngài fat-sṳ, ngài ke fa tak-ki chṳ̂n-sṳ̍t; ngien chhiòn-nèn ke Song-ti hén fì-tap ngài! Ngien ke ko ngài ke siá chhut ngài ke chhui, chiông siá-hó ke chhong-é nâ pûn ngài khon.

³⁶ Ngài oi chiông kì tap chhai kiên-thèu táng-kô, ya-he cho miên-liù tai chhai thèu-nà táng.

³⁷ Ngài oi hiong Song-ti sot-mìn ngài só-cho ke yit-chhiet, chhiong vòng-chṳ́ thai-thai fông-fông lòi-to Kì ke mien-chhièn.

³⁸ Na-he ngài sṳt pa-cham phe̍t-ngìn ke thièn-thi, thièn-thi voi thai-sâng hêm, lài-kiêu ya voi kieu;

³⁹ na-he ngài sṳ̍t thièn-sán mò fu-chhièn, ya-he hoi kâng-chung ke ngìn ngo-sí,

⁴⁰ ngien ke-te thièn sâng-mân net-è lâu yâ-chhó, séu-ma̍k thai-ma̍k chhiòn-phu m̀-voi chai chhut-sán. Yok-pak ke fa kóng-so̍t lé.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan