Bìoball air-loidhne

Yok-pak Ki 29 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yok-pak Chui-heu ke Sṳ̂n-su

¹ Yok-pak chiap-tén yu kóng:

² Ngài ngióng-pân hî-mong ngièn-ngie̍t voi chhiong thèu-pái án-ngiòng, chhiong ko-hi Song-ti pó-sú ngài ke ngièn-ngit khiung-yong.

³ Ke-yông-sṳ̀, Kì ke tên cheu chhai ngài ke thèu-nà táng; Kì ke kông tai ngài hàng-ko vû-am.

⁴ Ke-yông-sṳ̀, ngài hàn heu-sâng, tông khiòng-chong; Song-ti ke chhṳ̀-oi pí-yim ngâ vuk-hâ.

⁵ Chhiòn-nèn-chá lâu ngài khiung-ha; ngài ke chṳ́-ńg chhiòn-phu vì-tén ngài.

⁶ Ngài só to ke thi-fông yû sṳ̍t m̀-thet ke nen, lièn ngàm-sa̍k ya yúng-chhut kám-lám-yù chhiong hò-pa súi án-tô.

⁷ Ngài chhut-hi to sàng-mùn si̍p-fi ke só-chhai, ngìn chhiu chhai kóng-chhòng vi ngài yi-phi chho-vi.

⁸ Heu-sâng ngìn khon-tó ngài chhiu ngiong ngài siên-hàng; ló-ngìn-kâ khon-tó ngài chhiòn-phu khî hí-lòi;

⁹ liâng-chhiu kóng-tén fa ya thìn hâ-lòi, yu yung-sú êm-tén chhṳ-kâ ke choi.

¹⁰ Lièn kui-chhu̍k ya m̀-kám kóng-fa, chhiòn-phu tiâm-tiâm mò chhut-sâng.

¹¹ Thâng-tó ngài ke ngìn lûng-chúng chuk-fuk ngài, khon-tó ngài ke ngìn chhiòn-phu chhṳ̂n-chan ngài.

¹² Khiùng-khú ngìn oi ngài then-sú, ngài chhiu pông-chhu; kû-yì lòi khiù ngài kiu-chi, ngài mò khî-chhie̍t.

¹³ Voi me̍t-mòng ke ngìn vi ngài lòi chuk-fuk; ngài sṳ́ koá-fu ke sîm fôn-hí chhong-kô.

¹⁴ Ngài chiông chṳn-ngi chún-cho sâm-fu lòi chok; kûng-phìn he ngài ke ngoi-sâm lâu mo-é.

¹⁵ Ngài cho mô-muk ngìn ke muk-chû; ngài cho pâi-kiok ngìn ke kiok-kut.

¹⁶ Ngài cho khiùng-ngìn ke â-pâ; ngài vi sâng-fun ngìn sṳ̂n-yên.

¹⁷ Ngài fí-fái khiòng-phau ke sṳ-li̍t, kiu pûn kì-têu khî-fu ke ngìn.

¹⁸ Ngài sióng ngài voi hó-sí chhai vuk-hâ; ngài ke se-sṳ voi chhiong nài-sâ án-tô.

¹⁹ Ngài chhiong su-kîn chhûn-to súi-piên, am-pû-sṳ̀ yû lu-súi chṳ̂-yun ngài ke kî-ya̍p.

²⁰ Sà-sà tû yit-chhṳ̍t chhṳ̂n-chan ngài, ngài ke ngièn-hi m̀-sṳt sôi-thui.

²¹ Ngìn-ngìn tén-heu thâng ngài ke fa, tiâm-tiâm liâng-su ngài ke kau-thô.

²² Ngài kóng-so̍t, thai-kâ chhiu mò fa hó pú-chhûng; ngài ke fa chhiong yí-súi lo̍k chhai kì-têu sṳ̂n-hong.

²³ Kì-têu hàn chhin sióng-oi thâng ngài kau-thô, choi so̍k-so̍k chhiong nùng-mìn phan-mong chhûn-yí.

²⁴ Kì-têu sṳt-chṳ ke sṳ̀, ngài ôn-ví kì-têu; ngài yung mân-mien ke seu-yùng kú-li kì-têu.

²⁵ Ngài cho kì-têu ke liâng-chhiu, kiet-thin oi hàng ke lu; ngài tai-liâng kì-têu, chhiong he kiûn-vòng tai-liâng kiûn-chhui, chhai kì-têu sṳt-mong ke sṳ̀, ngài chhiu ôn-ví kì-têu.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan