Yok-pak Ki 28 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Siung-chan Chṳ-fi

¹ Ngiùn yû sên-sán ke khóng-chhòng; kîm yû thì-lien ke só-chhai.

² Ngìn tui thi-nài-hâ yet-chhut thiet, ya tui sa̍k-thèu tú thì-lien thùng.

³ Ngìn chéu-to chui-am ke só-chhai hi chhái-khóng, kì to thi-chhèn chhin chhṳ̂m ke só-chhai hi chhìm, oi tui vû-am chûng chiông khóng-sa̍k yet chhut-lòi.

⁴ Kì chhiu chhai mò-ngìn he̍t ke thi-fông khôi-khóng; chhai hán-tet yû-ngìn to ke só-chhai kûng-chok, chhai khóng-hâng tî-poi tiau-tén yèu-lòi yèu-hi.

⁵ Thi-mien chhut-sán liòng-sṳ̍t, thi tái-hâ sa ngie̍t-to chhiong fó-lù.

⁶ Sa̍k-thèu tú khong-tén làm-pó-sa̍k, thi-nài-hâ yû kîm-sâ.

⁷ Ên-tiâu m̀-tî ngi̍p khóng-chhòng ke lu; yeu-phò ke muk-chû ya mò khon-ko.

⁸ Hiûng-ok ke yâ-chhu m̀-sṳt tha̍p-ko, hiûng-mâng ke sṳ̂-é ya m̀-sṳt kîn-ko.

⁹ Ngìn chho̍k-khôi chhin-ngang ke sa̍k-thèu, chiông kûi-chak sân pién chón-lòi.

¹⁰ Kì chhai ngàm-sa̍k tông-chûng yet sân-lùng, fat-hien lùng-tú tak-yong ke pó-sa̍k.

¹¹ Kì chiông súi ngièn-thèu tù-tén, sṳ́ pó-chhòng hién-lu chhut-lòi.

¹² Chúng-he, oi hi nai-vi chhìm chṳ-fi nè? Hi nai-vi chang ho̍k tet-tó chhûng-mìn nè?

¹³ Chṳ-fi ke ka-chhṳ̍t mò-ngìn tî, chhai sṳ-kiên mò-ngìn chhìm tet-tó.

¹⁴ Chhṳ̂m-yên kóng: Chṳ-fi mò chhai ngài liá-vi; thai-hói kóng: Chṳ-fi mò lâu ngài khiung-ha.

¹⁵ Kîm-é mâi m̀-tó chṳ-fi; kha-tô ke ngiùn-è ya von m̀-tó.

¹⁶ Sùn-kîm lâu kui-chhung ke chû-pó, khiung-yong ya lâu kì pí m̀-tet.

¹⁷ Vòng-kîm lâu pó-ngiu̍k mò phan-fap lâu kì pí; sùn-kîm ke hi-mén ya von m̀-tó.

¹⁸ Chṳ-fi ke ka-chhṳ̍t yàng-ko sân-fù lâu súi-chîn; yû chṳ-fi yén-yén chhêu-ko tet-tó fùng-pó-sa̍k.

¹⁹ Kú-sṳ̍t ke vòng-ngiu̍k lâu kì ke ka-chhṳ̍t pí m̀-tet; chui-sùn ke kîm-é ya mò fap-thu lâu kì pí-ka.

²⁰ Án-ngiòng, chṳ-fi ke ngièn-thèu chhai nai-vi? Hi nai-vi chang ho̍k tet-tó chhûng-mìn nè?

²¹ Thung-vu̍t ke muk-chû khon m̀-tó kì; khûng-chûng ke fî-niâu ya khon m̀-tó.

²² Chhiu-son fí-me̍t lâu sí-mòng ya sṳ̀n-ngin, chṳ́-yû thâng-ko kì ke fûng-sâng thin-thin.

²³ Tân-tân Song-ti tî ke-thiàu lu, tî oi hi nai-vi chhìm chṳ-fi;

²⁴ yîn-vi Kì ke muk-chû khon tet-tó thi-khi̍t, Kì chhà-khon phû-thiên-ha ke van-sṳ van-vu̍t.

²⁵ Song-ti su vî-li̍t pûn fûng, vi thai-hói kiet-thin súi-liong,

²⁶ kûi-thin lo̍k-yí ke sṳ̀-chiet, thin hióng lùi-kûng ke lu-sien,

²⁷ ke-sṳ̀ Kì khon-tó chṳ-fi, chhet-liòng kì, kiên-thin kì, yu kam-chhat kì ke ka-chhṳ̍t.

²⁸ Song-ti hiong sṳ-kiên ngìn kóng: “Kin-vi Song-chú chhiu-he chṳ-fi; lì-khôi sià-ok chhiu-he chhûng-mìn.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan