Yok-pak Ki 22 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Thi-sâm Pái Chên-lun
( 22:1–27:23 )

¹ Chiap-tén, Thì-man-ngìn Yî-li-fap en Yok-pak kóng:

² Ngìn tui Song-ti kám-yû má-ke lu-yung nè? Chui chhûng-mìn ke tui Song-ti yû hó-chhu mò?

³ Ngì chṳn-chhṳ̍t ke hàng-vì voi pûn Chhiòn-nèn-chá fôn-hí mò? Ngì ke liòng-san kám voi pûn Song-ti tet-tó li-yit mâ?

⁴ Song-ti kám voi yîn-vi ngì kin-vi Kì lòi chit-fa̍t ngì, sṳ́m-phan ngì mâ?

⁵ M̀-voi! Kì chit-fa̍t ngì he yîn-vi ngì ke chhui chhin-chhûng, ngì ke chhui-ok tô-tôn.

⁶ Ngì vi-tó oi hiong hiûng-thi thó-chai, pet kì chiông sâm-fu thot-to kông-kông.

⁷ Choi-châu ke ngìn ngì m̀ pûn kì súi lîm; tú-sṳ́ yâu ke ngìn ngì m̀ pûn kì sṳ̍t.

⁸ Ngì li-yung ngì ke sṳ-li̍t lâu thi-vi cham-liâng só-yû ke thú-thi.

⁹ Ngì ham koá-fu khûng-sú chón-hi; ngì tá-thôn kû-yì ke sú-kut.

¹⁰ Yîn-vi án-ngiòng, liá-ha ngì chû-vì yû ham-chiáng; tet-ngìn-kiâng ke sṳ voi fut-yèn-kiên pâu-vì ngì.

¹¹ Vû-am châ-tén ngì, sṳ́ ngì khon m̀-tó; thai-súi voi chim-thet ngì!

¹² Song-ti kám m̀-he chhai kô-thiên ke táng-kô? Kì tâi-thèu hâ-lòi khon chui-kô ke sên-é.

¹³ Chúng-he ngì thai-tám mun: “Song-ti tî má-ke nè? Kì kám voi chhôn-ko yùn-chhèn lòi sṳ́m-phan ngài-têu?”

¹⁴ Ngì láu-tó yû vû-yùn châ-tén Kì, sṳ́ Kì khon m̀-tó; ngì ngin-vì Kì chhai kiûng-chhông táng-kô hàng-lòi hàng-hi thin-thin.

¹⁵ Fái-ngìn hàng-ko ke ló lu, ngì oi thèn-tén hàng he-mò?

¹⁶ Kì-têu ke sí-khì hàn-màng to, chhiu pûn thai-súi lièn-kîn tá-chéu.

¹⁷ Kì-têu tui Song-ti kóng: “Ngì sám-khôi! Chhiòn-nèn-chá nèn nâ ngài-têu ngióng-pân?”

¹⁸ Chúng-he, sṳ́ kì-têu hîn-vong ke he Song-ti; fái-ngìn ke sióng-fap, ngài mò fap-thu chan-sṳ̀n.

¹⁹ Ngi-ngìn khon-tó kì-têu ke kiet-khiu̍k chhiu fôn-hí; vù-kû ke ngìn yit khon-tó chhiu chhṳ́-seu kì-têu.

²⁰ Fái-ngìn ke chhòi-sán chhiòn-phu sêu-me̍t thet-hi, chhûn-tó ke yit-chhiet ya pûn fó-sêu chhiang-chhiang.

²¹ Só-yî, Yok-pak â, ngì oi sun-chhiùng Song-ti, lâu Kì fò-hó, án-ngiòng, Kì chhiu voi su-fuk pûn ngì.

²² Ngì oi chiap-su Kì ke kau-hiun, chiông Kì ke fa ki chhai sîm-tú.

²³ Ngì na-he chón-to Chhiòn-nèn-chá ke-vi, chhù-thet ngì vuk-hâ só-yû put-ngi ke hàng-vì, Song-ti chhiu voi sṳ́ ngì hîn-vong.

²⁴ Oi chiông ngì ke vòng-kîm vok chhai nam-nài tú, chiông chîn-kîm fit-to châu-thet ke hò-pa tái.

²⁵ Chhiòn-nèn-chá chhiu voi cho ngì kui-chhung ke vòng-kîm, ya voi chhiong pha̍k-ngiùn kô-kô vi ngì tún hí-lòi.

²⁶ Án-ngiòng, ngì chhiu voi ngióng-mong Chhiòn-nèn-chá, thùng-sṳ̀ voi tui Song-ti tet-tó hí-lo̍k.

²⁷ Ngì hiong Kì khì-tó, Kì voi thâng ngì ke khì-khiù; ngì ya oi vàn ngì só-hí ke ngien.

²⁸ Ngì só-cho ke kûng-chok chhiòn-phu voi sṳ̀n-kûng; ngì só-hàng ke lu yit-thin kông-mìn chhan-lan.

²⁹ Song-ti tá-vang kiêu-ngau ke ngìn, Kì oi chṳ́n-kiu khiâm-pî ke ngìn.

³⁰ Ngì mò chhui, Kì chhiu kiu ngì; ngì cho ngìn chṳn-chhṳ̍t, chhiu voi tet-tó chṳ́n-kiu.

Lean sinn:

Ceanglaichean taic

Sanasan