Bìoball air-loidhne

Yok-pak Ki 21 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Yok-pak en-kóng:

² Chhiáng ngì-têu ngin-chṳ̂n thâng ngài ke fa; liá he ngì-têu cho-tet pûn ngài vì-yit ke ôn-ví.

³ Pai-thok, chhiáng pûn ngài yit-ke kóng-fa ke kî-fi, ngài kóng-so̍t, ngì-têu chang lòi chhṳ́-seu ngài hàn m̀-voi man.

⁴ Ngài só au ke pin m̀-he tui ngìn; só-yî ngài chang voi án chho̍k-kip â!

⁵ Khon-tén ngài, ngì-têu kám m̀-voi pot chhṳ̂-kiâng? Ngì-têu kám m̀-he hak-to mò-fa kóng!

⁶ Sióng-tó ngài só tù-tó ke yit-chhiet, ngài chhiu kiâng-to kûi-sṳ̂n pi̍t-pi̍t-chhat.

⁷ Fái-ngìn cho-má-ke ki-siu̍k sâng hâ-hi? Cho-má-ke hióng chhòng-su, hîn-vong, fat-tha̍t?

⁸ Kì-têu m̀ tân-chhiang chṳ́-sûn mân-thòng, hàn chhîn-muk khon-tén heu-thoi chóng-thai.

⁹ Kì-têu ke vuk-hâ phìn-ôn, m̀-sṳ́ kiâng má-ke; Song-ti chit-fa̍t ke kun-é mò lìm-to kì-têu.

¹⁰ Kì-têu ke ngiù-kú chhòn-chúng yit-thin sṳ̀n-kûng; kì-têu ke ngiù-mà kiung-chṳ́ m̀-voi lau-thôi.

¹¹ Kì-têu ke chṳ́-ńg chhut-hi liau, chhṳ-yù chhṳ-chhai chhiong yòng-khiùn; kì ke-têu se-ngìn-è fôn-hí to kín-chéu, kín-thiàu.

¹² Kì-têu fò-tén lìn-kú lâu khìm lòi chhong-kô; kì-têu thèn-tén phùn-tha̍k ke sâng lòi fôn-fû.

¹³ Kì-têu yit-sên-ngìn fûng-fûng fu-fu, phìn-phìn ôn-ôn ngi̍p-to fùn-mu hi.

¹⁴ Fái-ngìn tui Song-ti kóng: “Yén-yén lì-khôi ngài-têu! Ngài-têu yit-sên-ngìn mò-oi chhìm Ngì ke chṳ́-yi.

¹⁵ Chhiòn-nèn-chá he má-ngìn, yû má-ke hó kin-pai? Ngài-têu hiong Kì khì-tó yu yû má-ke hó-chhu?”

¹⁶ Fái-ngìn khon chhṳ-kâ ke sṳ̀n-kûng he tá-piang lòi ke; chúng-he liá-chúng sióng-fap ngài chhie̍t-tui m̀-voi chan-sṳ̀n.

¹⁷ Kám-kóng fái-ngìn ke tên sṳt vû-thet mâ? Kám-kóng châi-nan sṳt lìm-to kì-têu mâ? Song-ti sṳt fat-khién chit-fa̍t fái-ngìn mâ?

¹⁸ Kì kám sṳt chiông kì-têu chhôi-san, chhiong thai-fûng chhôi-san vò-kón? Kì kám sṳt chiông kì-têu kién-chéu, chhiong khòng-fûng kién-chéu lùng-hông?

¹⁹ Ngì-têu kóng, yîn-vi fái-ngìn chit-ok, Song-ti thin-chho̍k voi chit-fa̍t kì-têu ke chṳ́-ńg; ngài ngin-vì, Song-ti oi chit-fa̍t chhui-ngìn pún-sṳ̂n, pûn kì-têu sṳ̀n-tâm chhṳ-kâ ke chhui-ko chang chho̍k.

²⁰ Chhui-ngìn yin-kôi sṳ̀n-su chhṳ-kâ oi su ke chit-fa̍t; pûn kì-têu chhîn-sṳ̂n thí-ngiam Chhiòn-nèn-chá ke fat-khién.

²¹ Ngìn chhai sṳ-kiên ke ngièn-ngit voi kiet-suk ke sṳ̀, hàn nèn cheu-ku chhṳ-kâ chṳ́-ńg ke hen-fuk mâ?

²² Lièn chhô thai-vi ke ngìn ya voi pûn Song-ti sṳ́m-phan, ngìn ke chṳ-sṳt ngióng yû khó-nèn lòi kâu Song-ti nè?

²³ Yû-têu ngìn yit-sên-ngìn yúng-khien, to sí hióng-su phìn-ôn hen-fuk.

²⁴ Kì-têu ke tú-sṳ́ koe̍t-koe̍t; kut-súi ya tet-tó chṳ̂-yun.

²⁵ Yû-têu ngìn to sí sîm-kôn thung-khú, yit-sên-ngìn m̀-sṳt hióng-su khoai-lo̍k.

²⁶ Chúng-he liá lióng-chúng ngìn khiung-yong voi sí, oi mài, sṳ̂n-sṳ̂ khiung-yong voi chhai nài-kak tú pûn chhùng sṳ̍t.

²⁷ Ngài tî ngì-têu sîm-tú só-sióng ke, tî ngì-têu ham-hoi ngài ke yîm-mèu.

²⁸ Ngì-têu mun: “Ke-chak pa-vòng he̍t chhai nai-vi? Ke-chak fái tûng-sî ke vuk-hâ chhai nai-vi?”

²⁹ Ngì-têu kám m̀-sṳt mun ko-lu ngìn? Ngì-têu kám m̀-tî kì-têu tai chón-lòi ke po-ko?

³⁰ Chhai Song-ti fat-khién chit-fa̍t ngìn ke ngit-è, fái-ngìn sòng-sòng sám-chéu, tiên-to mò sṳ-chhìn.

³¹ Kám-yû má-ngìn tông-mien chit-phi fái-ngìn? Ya-he cheu kì só-cho ke po-fu̍k kì?

³² Chhiu-he kì pûn-ngìn kông-to mu-thi, chong chhai yû-ngìn chóng ke fùn-mu sṳ̀,

³³ yû yit thai-chhṳn ke ngìn hi sung-chong, lièn mu-thi ke nài ya chhin châu-sóng.

³⁴ Ngì-têu ngióng hàn kóng khûng-fa lòi ôn-ví ngài! Ngì-têu kóng ke fa tak-ki tû he hâm-chhê!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan