Yok-pak Ki 18 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Chiap-tén, Sû-â-ngìn Pí-le̍t-tha̍t en Yok-pak kóng:

² Ngì séu kóng-têu fa hó-mò? Ngì ôn-chhin hâ-lòi sióng, ngài-têu chang yû phan-fap lâu ngì kóng-fa.

³ Ngì láu-tó ngài-têu chhiong thèu-sâng-é? Ngài-têu chhiong khìm-chhu án ngong he-mò?

⁴ Ngì ke fat-khién sông-hoi ngì chhṳ-kâ thin-thin; kám-kóng yîn-vi ngì fat-khién thi voi fông-thet? Song-ti yin-tông yì-sân lòi mân-chiuk ngì mâ?

⁵ Fái-ngìn ke kông yit-thin voi vû-thet; kì ke fó chhie̍t-tui m̀-voi chai chho̍k.

⁶ Kì chong-phùng tú ke tên thin-chho̍k pien-am; koa chhai táng-kô ke tên ya voi vû-thet.

⁷ Kì vún-thin ke kiok-phu khôi-sṳ́ yèu-yèu pái-pái; kì pûn chhṳ-kâ ke kúi-kie pan-tó.

⁸ Kì chhṳ-kâ ham-ngi̍p lò-mióng tú; kì ke kiok pûn mióng-è chhàn-tén.

⁹ Lò-mióng thak-tó kì ke kiok-châng; kî-koân chiông kì kia̍p-to hèn-hèn.

¹⁰ Yû ham-chiáng mài chhai thi-nài-hâ; kì hàng ke lu phû-tén lò-mióng.

¹¹ Khiúng-pu tui chû-vì kûng-kit kì, phu-phu pet-tén kì ke kiok-châng.

¹² Kì yî-chhièn hó-ngiak, liá-ha khiòng-khiòng voi ngo-tó; châi-fo yit-chhṳ̍t chhai kì ke sṳ̂n-piên tén-tén kì.

¹³ Chṳ-miang ke phiang-thung chhàn-sṳ̂n; kì ke sú-kiok mièn-mièn lok-lok.

¹⁴ Kì tui ôn-kî ke chong-phùng tú pûn-ngìn thô chhut-lòi, yèn-heu pûn-ngìn tai-to yîm-kiên ke vòng ke-vi hi.

¹⁵ Kì ke chong-phùng yung liù-vòng sêu-thu̍k, yèn-heu chhiu kâu-pûn phe̍t-ngìn hi he̍t.

¹⁶ Kì hâ-poi ke su-kîn khû-châu; kì táng-kô ke kî-ya̍p châu-thet.

¹⁷ Thi-song mò ngìn voi ki-tet kì; thùng-pâu m̀ ki-tet kì ke miàng.

¹⁸ Kì oi tui sṳ-kiên phî kiuk chhut-hi, tui kông-mìn chûng phî kiuk-ngi̍p vû-am.

¹⁹ Kì chhai pún-chhu̍k chûng mò chṳ́ mò sûn; kì he̍t ke só-chhai mò liù pan-sà.

²⁰ Sî-fông ke ngìn thâng-tó kì ke miang-yun kám-kok chho̍k-kiâng; tûng-fông ke ngìn tî kì só tù-tó ke chhiu hak-tó.

²¹ Liá chhiu-he fái-ngìn ke kiet-khiu̍k; m̀ kin-vi Song-ti ke ngìn chui-mî chhiu-he án-ngiòng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan