Yok-pak Ki 13 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Liá só-yû ke ngài chhiòn-phu khon-ko lé; ngài ya chhiòn-phu thâng-ko, chhiòn-phu mìn-pha̍k.

² Ngì-têu tî ke, ngài ya tî; ngài m̀-voi kha sû ngì-têu.

³ Ngài oi lâu Chhiòn-nèn-chá kóng, m̀ lâu ngì-têu au; ngài oi lâu Song-ti lòi phien-lun ngài ke on-chhìn.

⁴ Ngì-têu chhṳ-kâ chho fâ-liâu; ngì-têu he mò-yung ke yî-sên.

⁵ Na-he ngì-têu ngien-yi tiâm-tiâm mo̍k kóng-fa, ngì-têu chhiu son-cho chhin yû chṳ-fi ke ngìn!

⁶ Liá-ha chhiáng thâng ngài ke phien-lun, oi chu-yi thâng ngài ke sṳ̂n-su.

⁷ Ngì-têu cho-má-ke vi Song-ti kóng put-ngi ke fa? Ngì-têu ngióng-pân oi vi Kì kóng kúi-cha ke fa nè?

⁸ Ngì-têu ton-chṳ̂n oi khon Song-ti ke chhìn-mien mâ? Ngì-têu oi hi fap-yen vì Kì phien-lun he-mò?

⁹ Na-he Song-ti thiàu-chhà ngì-têu, ngì-têu chṳn-kîn yû án-hó mò? Ngì-têu láu-tó cho-tet phien Song-ti, chhiong phien-ngìn án-ngiòng he-mò?

¹⁰ Ngì-têu na am-chûng tui ngìn phiên-sîm, Kì ya yit-thin voi chit-phi ngì-têu.

¹¹ Song-ti ke vî-ngiàm kám m̀-voi sṳ́ ngì-têu thai chho̍k-kiâng? Kì án tet-ngìn-kiâng kám m̀-voi sṳ́ ngì-têu pi̍t-pi̍t-chhat?

¹² Ngì-têu só kóng ke kiet-ngièn chhiong chhṳ̀n-fôi án mò-yung; ngì-têu phien-lun ke lî-yù chhiong nam-nài án ngiôn-ngio̍k.

¹³ Ngì-têu tiâm-tiâm, yù-chhai ngài kóng-fa; heu-kó ngióng-pân, ngài chhṳ-kâ sṳ̀n-tâm.

¹⁴ Ngióng-pân hó nâ? Ngài kâm-ngien mo ngùi-hiám, ngài chún-phi nâ ngài ke sâng-miang lòi piang!

¹⁵ Ngài yí-kîn mò hî-mong, chhiu-son Song-ti oi chhṳ̀ ngài yu ngióng-pân? Ngài yit-thin oi chhai Kì mien-chhièn vi chhṳ-kâ ke só-hàng lòi phien-lun.

¹⁶ Kiám-chhái ngài ke yúng-hi voi kiu-tó ngài, yîn-vi fái-ngìn m̀-kám mien-tui Song-ti.

¹⁷ Liá-ha chhiáng chu-yi thâng ngài ke fa, tiâm-tiâm thâng ngài vi chhṳ-kâ phien-lun.

¹⁸ Ngài yí-kîn chún-phi hó ngài ke on-khien, ngài tî voi phan mò-chhui.

¹⁹ Song-ti â, Ngì chṳn-kîn oi ko ngài he-mò? Ton-chṳ̂n án-ngiòng, ngài chhiu tiâm-tiâm, kâm-ngien sí.

²⁰ Chhù-fî Ngì thùng-yi ngài lióng-hong yêu-khiù, ngài chhiu m̀ tui Ngì mien-chhièn khong hí-lòi:

²¹ Khiù Ngì mo̍k chit-fa̍t ngài; khiù Ngì m̀-hó hak ngài.

²² Song-ti â, Ngì ko ngài, ngài lòi fì-tap; ya-he ngài ko Ngì, Ngì lòi fì-tap.

²³ Ngài to-tái fam-tó má-ke chhui? Cho má-ke fái-sṳ? Khiù Ngì pûn ngài tî ngài ke ko-fam, ngài ke chhui-miàng.

²⁴ Ngì cho-má-ke êm-mien m̀-tap ngài? Ngì cho-má-ke khon ngài cho thi̍t-ngìn?

²⁵ Ngài chhiong pûn fûng chhôi ke lo̍k-ya̍p, Ngì hàn oi hak ngài he-mò? Ngài chhiong châu-thet ke vò-kón sui, Ngì hàn oi tûi ngài he-mò?

²⁶ Ngì ki-liu̍k ngài ke chhui-chhong ngiàm-ngiàm chṳ́-chit ngài, oi ngài tâm-tông heu-sâng sṳ̀ só-fam ke ko-sṳt.

²⁷ Ngì yung thiet-lien só-tén ngài ke kiok, kam-sṳ ngài só-hàng mî-yit phu lu, sṳm-chṳ kiám-chhà ngài ke kiok-chiak-yin.

²⁸ Ngì sṳ́ ngài chhiong mièn-thet ke tûng-sî, chhiong yit-liâng pûn chhùng ngâu-lan ke sâm.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan