Bìoball air-loidhne

Yok-pak Ki 1 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Sat-tan Sṳ-tham Yok-pak

¹ Yû yit-ke ngìn ôn-to Yok-pak, he̍t chhai Vû-sṳ̂ thi-khî; kì he yit-ke hó ngìn, cho-ngìn chṳn-chhṳ̍t, kin-vi Song-ti, yén-lì fái-sṳ.

² Kì yû chhit-ke lai-é, sâm-ke moi-é.

³ Kì yû chhit-chhiên chak yòng, sâm-chhiên chak lo̍k-thò, ńg-pak tui ngiù, ńg-pak chak lì-mà; hàn-yû chhin-tô ke phu̍k-ngìn. Chhai tûng-fông ngìn tông-chûng, kì son-he chui pot ke.

⁴ Yok-pak ke-têu lai-é sòng-sòng lùn-liù chhai chhṳ-kâ vuk-hâ phan-chok, ya phai-ngìn hi chhiáng kì-têu ke sâm-ke chí-moi khiung-ha lòi lîm-sṳ̍t.

⁵ Tak-pái yèn-si̍t ke ngit-khì ko-heu, Yok-pak chhiu tá-chó hong hí-lòi, vi tak-ke chṳ́-ńg hien sêu-fa-chi, ham kì-têu hàng kiet-chhiang ke lî-ngì. Kì sòng-sòng án-ngiòng cho, yîn-vi kì sióng: “Kiâng-pha ngài ke-têu chṳ́-ńg yû fam-chhui, chhai sîm-tú chu-ma Song-ti.”

⁶ Yû yit-ngit, thiên-táng ke chung sṳ̀n-chṳ́ lòi chhèu-kien Song-chú, Sat-tan ya chhai kì-têu tông-chûng.

⁷ Song-chú mun Sat-tan: “Ngì tui nai-vi lòi â?” Sat-tan en-kóng: “Ngài chhai thi-song tak-vi hàng-lòi hàng-hi, yèn-heu chón-to liá-vi lòi.”

⁸ Song-chú mun Sat-tan: “Ngì yû chu-yi tó Ngài ke phu̍k-ngìn Yok-pak mò? Sṳ-kiên mò yit-sà chhiong kì án-hó: Cho-ngìn chṳn-chhṳ̍t, yu kin-vi Ngài, yén-lì fái-sṳ.”

⁹ Sat-tan en-kóng: “Yok-pak kin-vi Song-ti, kám he mò ngièn-yîn?

¹⁰ Ngì kám m̀-he chhai si chû-vì pó-fu kì, lâu kì ke kâ, pin kì só-yû ke yit-chhiet? Ngì su-fuk pûn kì, sṳ́ kì fàm-sṳ sun-li; kì ke thèu-sâng tô-to mân-phien he.

¹¹ Chúng-he Ngì na-he chhut-sú, chiông kì só-yû ke chhiòn-phu nâ-chéu, kì yit-thin voi tông-mien chu-ma Ngì!”

¹² Song-ti tui Sat-tan kóng: “Hó â, kì só-yû ke chhiòn-phu chhai ngì sú-chûng, chúng-he put-chún ngì sông-hoi kì pún-sṳ̂n.” Sat-tan chhiu tui Song-chú mien-chhièn chhut-hi lé.

Yok-pak Sṳt-thet Yit-chhiet

¹³ Yû yit-ngit, Yok-pak ke chṳ́-ńg chhiòn-phu chhai thai-kô vuk-hâ sṳ̍t-fan lîm-chiú,

¹⁴ yû po-sin ke chéu-lòi lâu Yok-pak kóng: “Ngiù tông lài-thièn, lì chhai phòng-piên sṳ̍t-chhó ke sṳ̀,

¹⁵ Sṳ-pâ-ngìn fut-yèn-kiên lòi kûng-kit, chiông thèu-sâng chhiòn-phu chhióng-chéu, chhṳ̀-thet ngì só-yû ke phu̍k-ngìn, chṳ́-yû ngài yit-sà thò-chéu, lòi hiong ngì po-sin.”

¹⁶ Kì hàn-màng kóng-so̍t, nang-ngoi yit-ke phu̍k-ngìn chéu-tén lòi, kóng: “Song-ti tui thiên-táng kong-fó hâ-lòi, sêu-thet yòng-khiùn lâu chóng-yòng ke, chṳ́-yû ngài yit-sà thò-chéu, lòi hiong ngì po-sin.”

¹⁷ Kì hàn kóng-tén fa ke sṳ̀, yu yû yit-ke phu̍k-ngìn chéu-tén lòi, kóng: “Kâ-le̍t-tí-ngìn fûn sâm-chhui, fut-yèn-kiên kûng-kit ngài-têu, chiông lo̍k-thò chhiòn-phu chhióng-chéu, chhṳ̀-thet só-yû ke phu̍k-ngìn, chṳ́-yû ngài yit-sà thò-chéu, lòi hiong ngì po-sin.”

¹⁸ Kì hàn-màng kóng-so̍t, nang-ngoi yu yû yit-ke phu̍k-ngìn chéu-tén lòi, kóng: “Ngì ke-têu chṳ́-ńg chhai thai-kô vuk-hâ sṳ̍t-fan lîm-chiú,

¹⁹ fut-yèn-kiên yû thai-fûng tui khóng-yâ chhôi-lòi, chiông vuk chhôi-vang, vuk-tú ke heu-sâng-ngìn chhiòn-phu chak-sí, chṳ́-yû ngài yit-sà thò-chéu, lòi hiong ngì po-sin.”

²⁰ Yok-pak chhiu khî hí-lòi, chhá-lan chhṳ-kâ ke ngoi-sâm, thi-thet thèu-nà-mô, phu̍k chhai thi-song kin-pai,

²¹ kóng: “Ngài chhak-sṳ̂n lu-thí chhut mû-thôi, ya oi chhak-sṳ̂n lu-thí to-chón hi; sóng-su ke he Song-chú, sû chón-hi ke ya he Song-chú. Song-chú ke miàng yin-tông tet-tó siung-chan!”

²² Sûi-yèn tù-tó liá yit-chhiet ke sṳ-chhìn, Yok-pak pin mò fam-chhui, mò koai-yen Song-ti cho m̀-chho̍k.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan