Bìoball air-loidhne

Yok-hon 9 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yî-hó Chhut-se chhiu Mô-muk ke Ngìn

¹ Yâ-sû chhai lu-song khon-tó yit-ke chhut-se chhiu mô-muk ke ngìn.

² Kiâ ho̍k-sâng mun kì kóng: “Sîn-sâng, liá-ke ngìn chhut-se chhiu mô-muk, he má-ngìn ke chhui chho-sṳ̀n ke? He kì chhṳ-kâ ke chhui, ya-he kiâ yà-ôi ke chhui nè?”

³ Yâ-sû en-kóng: “Kì ke mô-muk lâu chhṳ-kâ ya-he yà-ôi ke chhui lûng-chúng mò koân-he, he oi chhai kiâ sṳ̂n-song chông-hién Song-ti ke chok-vì.

⁴ Ngit-sṳ̀-thèu, ngài-têu yin-tông oi cho ke ‘Chhâi ngài lòi ke’ ke kûng-chok; am-pû-sṳ̀ yit-to, chhiu mò-ngìn nèn kûng-chok.

⁵ Ngài chhai sṳ-kiên ke sṳ̀, chhiu-he sṳ-kiên ke kông.”

⁶ Kóng liá-ke fa yî-heu, Yâ-sû phi héu-lân chhai thi-song, yung héu-lân kiâu-nài, kò mô-muk ke muk-chû,

⁷ lâu kì kóng: “Ngì hi Sî-lò-â ke súi-chhṳ̀ sé.” (Sî-lò-â ke yi-sṳ he “Fung chhâi-phai”.) Kì chhiu hi sé, to-chón-lòi ke sṳ̀, yí-kîn khon-tet-tó lé.

⁸ Kì ke lìn-sa lâu ke-têu sòng-sòng khon-tó kì thó-sṳ̍t ke ngìn kóng: “Liá-ke ngìn m̀-he phìn-sòng chhô chhai liá-vi thó-sṳ̍t ke mâ?”

⁹ Yû-têu kóng: “Chhiu-he kì!” Ya yû-têu kóng: “M̀-he kì, lâu kì siông-chhiong thin-thin.” Ke ngìn chhṳ-kâ kóng: “He ngài.”

¹⁰ Kì-têu mun kì kóng: “Ngiâ muk-chû ngióng-pân khon-tet-tó nè?”

¹¹ Kì en-kóng: “Yû yit-ke miàng ôn-to Yâ-sû ke, yung nam-nài kò ngài ke muk-chû, lâu ngài kóng: ‘Ngì hi Sî-lò-â ke súi-chhṳ̀ sé.’ Ngài chhiu hi, yit sé chhiu khon-tet-tó.”

¹² Kì-têu mun-kóng: “Ke ngìn chhai nai-vi?” Kì en-kóng: “Ngài m̀ tî.”

Fap-li-soi-ngìn Chûi-kiu Mô-muk ke Sṳ

¹³ Kì-têu tai ke thèu-pái mô-muk ke ngìn hi kien Fap-li-soi-ngìn.

¹⁴ Yâ-sû kiâu-nài yî-hó kiâ muk-chû, ke-ngit he Ôn-sit-ngit.

¹⁵ Fap-li-soi-ngìn yu chhà-mun ke ngìn he ngióng-pân khon-tet-tó ke. Kì lâu kì-têu kóng: “Kì yung nam-nài kò ngài ke muk-chû, ngài yit sé chhiu khon-tet-tó.”

¹⁶ Yû-têu Fap-li-soi-ngìn kóng: “Cho liá-ke sṳ ke ngìn mò khó-nèn he tui Song-ti ke-vi lòi ke, yîn-vi kì mò chûn-sú Ôn-sit-ngit ke kûi-thin.” Nang-ngoi yû-têu ngìn kóng: “Yû chhui ke ngìn ngióng-voi hàng án-ngiòng ke sṳ̀n-chiak nè?” Kì-têu chûng-kiên chhiu fat-sên fûn-chên.

¹⁷ Só-yî, ke-têu Fap-li-soi-ngìn yu mun mô-muk ke ngìn kóng: “Ki-yèn kì yî-hó ngiâ muk-chû, ngì kóng kì he ngióng-pân ke ngìn?” Kì en-kóng: “Kì he yit-ke siên-tî.”

¹⁸ Ke-têu Yù-thai-ngìn ke liâng-chhiu m̀-hén sin kì thèu-pái he mô-muk-ke, liá-ha yí-kîn khon-tet-tó; tén-to chiông kì ke yà-ôi chhìm-lòi,

¹⁹ kì-têu chhiu mun-kóng: “Liá he ngiâ lai-é mò? Ngì-têu m̀-he kóng kì yit chhut-se chhiu mô-muk mâ? Án-ngiòng, liá-ha ngióng-voi khon-tet-tó nè?”

²⁰ Kì ke yà-ôi en-kóng: “Kì he ngài-têu ke lai-é, ngài-têu ya tî kì yit chhut-se chhiu mô-muk.

²¹ Kì liá-ha ngióng-pân khon-tet-tó, he má-ngìn yî-hó kiâ muk-chû, ngài-têu chhiu m̀ tî. Kì yí-kîn thai lé, ngì-têu hi mun kì, kì chhṳ-kâ voi kóng!”

²² Kì ke yà-ôi án-ngiòng kóng, he yîn-vi kiâng Yù-thai-ngìn ke liâng-chhiu; tông-sṳ̀ Yù-thai-ngìn ke liâng-chhiu yí-kîn kóng-hó, ká-sṳ́ yû-ngìn sṳ̀n-ngin Yâ-sû he Kî-tuk, chhiu oi chiông kì kiuk-chhut fi-thòng.

²³ Só-yî kì ke yà-ôi en-kóng: “Kì yí-kîn thai lé, ngì-têu hi mun kì!”

²⁴ Kì-têu chai yit-pái chiông ke chhut-se chhiu mô-muk ke ngìn hêm-lòi, tui kì kóng: “Chhai Song-ti ke mien-chhièn, ngì yit-thin oi kóng sṳ̍t-fa! Ngài-têu tî ke-chak ngìn he yit-ke chhui-ngìn.”

²⁵ Kì en-kóng: “Kì he m̀-he chhui-ngìn, ngài m̀ tî; chúng-he ngài tî yit-hong sṳ: Ngài pún-lòi he mô-muk ke, liá-ha khon tet-tó!”

²⁶ Kì-têu mun-kóng: “Kì tui ngì cho má-ke? Kì ngióng-pân yî-hó ngiâ muk-chû?”

²⁷ Kì en-kóng: “Ngài lâu ngì-têu kóng-ko, ngì-têu m̀-oi thâng. Cho-má-ke liá-ha yu oi thâng nè? Kám-kóng ngì-têu ya sióng-oi cho kiâ ho̍k-sâng he-mò?”

²⁸ Kì-têu chhiu ma kì kóng: “Ngì chang he ke-chak ngìn ke ho̍k-sâng! Ngài-têu he Mô-sî ke ho̍k-sâng!

²⁹ Ngài-têu tî Song-ti sṳt lâu Mô-sî kóng-ko fa; chúng-he ke-chak ngìn, ngài-têu kîn-pún m̀ tî kì he tui nai-vi lòi ke!”

³⁰ Kì en-kóng: “Liá chhiu khì-koai lé! Kì yî-hó ngài ke muk-chû, chúng-he ngì-têu m̀ tî kì he tui nai-vi lòi ke!

³¹ Ngài-têu tî Song-ti m̀-oi thâng chhui-ngìn ke khì-khiù; Kì chṳ́-yû thâng ke kin-pai Kì, pin sṳ̍t-hàng Kì chṳ́-yi ke ngìn.

³² Chhóng-chho sṳ-kie yî-lòi, chhut-se chhiu mô-muk ke, màng-sṳt thâng-ko yû ngìn yî-hó kiâ muk-chû.

³³ Liá-ke ngìn na-m̀-he tui Song-ti lòi ke, kì má-ke tû mò fap-thu cho.”

³⁴ Kì-têu chit-phi kì kóng: “Ngì liá chhut-se chhai chhui-ok chûng ke tûng-sî, ngióng-pân kám kau-hiun ngài-têu!” Kì-têu chhiu chiông kì kiuk-chhut fi-thòng.

Lìn-sin ke Mô-muk

³⁵ Yâ-sû thâng-kóng kì-têu chiông kì kiuk-chhut fi-thòng ke sṳ, chhiu chhìm-tó kì, mun kì kóng: “Ngì sin Ngìn-chṳ́ mò?”

³⁶ Kì en-kóng: “Sîn-sâng, chhiáng lâu ngài kóng má-ngìn he Ngìn-chṳ́, ngài chhiu sin kì!”

³⁷ Yâ-sû lâu kì kóng: “Ngì yí-kîn khon-tó kì, liá-ha lâu ngì kóng-fa ke chhiu-he kì.”

³⁸ Kì kóng: “Chú â, ngài sin!” chhiu pai Yâ-sû.

³⁹ Yâ-sû kóng: “Ngài lòi sṳ-kiên ke muk-tit he oi sṳ́m-phan, pûn mô-muk-ke khon-tet-tó, khon-tet-tó ke fán-chón pien-cho mô-muk.”

⁴⁰ Chhai kiâ sṳ̂n-piên, yû-têu Fap-li-soi-ngìn thâng-tó liá-ke fa, chhiu mun kì kóng: “Kám-kóng ngì chiông ngài-têu ya khon-cho mô-muk-ke he-mò?”

⁴¹ Yâ-sû en-kóng: “Ngì-têu na-he mô-muk ke, ngì-têu chhiu mò chhui; liá-ha ngì-têu kóng ‘Ngài-têu khon-tet-tó’, án-ngiòng, ngì-têu hàn-he chhai chhui-chûng.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan