Bìoball air-loidhne

Yok-hon 7 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yâ-sû lâu Kiâ Ló-thâi

¹ Sṳ-heu, Yâ-sû chhai Kâ-li-li-sén lòi-lòi hi-hi, mò-oi hi Yù-thai thi-khî, yîn-vi Yù-thai-ngìn ke liâng-chhiu sióng-oi sat-hoi kì.

² Yù-thai-ngìn ke Tap Liàu-è Chiet voi to lé,

³ só-yî Yâ-sû ke ló-thâi lâu kì kóng: “Ngì oi lì-khôi liá-vi, hi Yù-thai, hó pûn ngiâ ho̍k-sâng khon ngì só hàng ke khì-sṳ.

⁴ Ngìn oi chhut-miàng, chhiu m̀-hó chhai am-chûng cho-sṳ. Ngì ki-yèn nèn hàng liá-têu khì-sṳ, chhiu yin-kôi chhai sṳ-ngìn mien-chhièn péu-hien chhut-lòi!”

⁵ (Ngièn-lòi lièn kiâ ló-thâi ya mò sin kì.)

⁶ Yâ-sû tui kì-têu kóng: “Ngì-têu sùi-sṳ̀ chhin fông-phien; chúng-he ngài ke sṳ̀-kî hàn-màng sṳ̀n-su̍k.

⁷ Sṳ-ngìn m̀-voi yen-hen ngì-têu, chúng-he voi yen-hen ngài, yîn-vi ngài sòng-sòng chṳ́-chṳn kì-têu ke chok-vì he sià-ok ke.

⁸ Ngì-têu chhṳ-kâ hi ko-chiet, ngài liá-ha m̀ hi, yîn-vi ngài ke sṳ̀-kî hàn-màng sṳ̀n-su̍k.”

⁹ Yâ-sû lâu kì-têu kóng liá-têu fa yî-heu, hàn-he liù chhai Kâ-li-li.

Yâ-sû Ko Tap Liàu-è Chiet

¹⁰ Yâ-sû ke ló-thâi hi ko-chiet yî-heu, Yâ-sû ya thèn-tén hi. Kì m̀-he kûng-khôi hi, he am-chûng hi ke.

¹¹ Chiet-khì-chûng, Yù-thai-ngìn ke liâng-chhiu tak só-chhai chhìm Yâ-sû, kín mun: “Kì chhai nai-vi?”

¹² Chung-ngìn vi-tó kì ngi-lun fûn-fûn; yû-têu kóng: “Kì he yit-ke hó ngìn!” yû-têu kóng: “M̀-he! Kì chhai san-thung chung-ngìn.”

¹³ Chúng-he thai-kâ m̀-kám kûng-khôi thàm-lun kì, yîn-vi kì-têu kiâng Yù-thai-ngìn ke liâng-chhiu.

¹⁴ Chiet-khì ko-thet yit-pan, Yâ-sû chhiu sông-hi sṳn-thien kau-hiun ngìn.

¹⁵ Yù-thai-ngìn ke liâng-chhiu kám-kok chhin khì-koai, kóng: “Liá-ke ngìn mò su má-ke kau-yuk, ngióng-voi án yû ho̍k-mun â?”

¹⁶ Yâ-sû kóng: “Ngài ke kau-sṳ m̀-he ngài chhṳ-kâ ke, he tui ke chhâi ngài ke Song-ti lòi ke.

¹⁷ Ngìn na-he kiet-sîm oi hàng Song-ti ke chṳ́-yi, chhiu voi tî ngài ke kau-sṳ he tui Song-ti lòi ke, ya-he cheu ngài chhṳ-kâ ke yi-sṳ kóng ke.

¹⁸ Cheu chhṳ-kâ ke yi-sṳ kóng-fa ke, he sióng-oi yùng-kông chhṳ-kâ; vì-yû sióng-oi yùng-kông ke chhâi kì lòi ke, chang-he chṳ̂n-sṳ̍t mò hî-ká ke ngìn.

¹⁹ Mô-sî m̀-he chiông fap-li̍t kâu-pûn ngì-têu mâ? Chúng-he ngì-têu mò yit-sà chûn-sú fap-li̍t. Ngì-têu cho-má-ke sióng-oi chhṳ̀ ngài nè?”

²⁰ Chung-ngìn fì-tap kóng: “Ngì pûn kúi fu-sṳ̂n lé! Má-ngìn sióng-oi chhṳ̀ ngì nò?”

²¹ Yâ-sû kóng: “Ngài chhai Ôn-sit-ngit hàng yit-ke sṳ̀n-chiak, ngì-têu chhiòn-phu khon-cho koai-sṳ.

²² Mô-sî fûn-fu ngì-têu hàng kot-lî (khì-sṳ̍t kot-lî m̀-he tui Mô-sî, he tui siên-chú khôi-sṳ́ ke), ngì-têu chhiu chhai Ôn-sit-ngit vi ngìn hàng kot-lî.

²³ Na-he ngìn chhai Ôn-sit-ngit hàng kot-lî, muk-tit he vì-fu Mô-sî ke fap-li̍t, án-ngiòng, ngài chhai Ôn-sit-ngit pûn yit-ke ngìn vàn-chhiòn fî-fu̍k khien-không, ngì-têu cho-má-ke chit-phi ngài nè?

²⁴ M̀-hó cheu ngoi-péu ton sṳ-fî, oi cheu kûng-tong ke phêu-chún lòi phan-ton chang chho̍k.”

Yâ-sû He M̀-he Kî-tuk

²⁵ Yû-têu Yâ-lu-sat-lâng-ngìn kóng: “Liá-ke ngìn kám m̀-he kì-têu sióng-oi chhṳ̀ ke mâ?

²⁶ Ngì khon, kì kûng-khôi kóng-fa, sa mò ngìn chhut-lòi fán-pok kì! Kám-kóng ngài-têu ke liâng-chhiu khok-ngin kì chhiu-he Kî-tuk mâ?

²⁷ Sṳ-sṳ̍t-song, Kî-tuk chhut-hien ke sṳ̀, mò-ngìn voi tî kì he tui nai-vi lòi ke, chúng-he liá-ke ngìn ke lòi-li̍t ngài-têu fî-sòng chhîn-chhú.”

²⁸ Tông-sṳ̀, Yâ-sû chhai sṳn-thien tî-poi kau-hiun ngìn, kì thai-sâng siên-ko kóng: “Ngì-têu chṳn-kîn ngin-sṳt ngài, tî ngài tui nai-vi lòi mâ? Ngài lòi, pin m̀-he cheu chhṳ-kâ ke yi-sṳ. Ke ‘Chhâi ngài lòi ke’ he chṳ̂n-sṳ̍t ke. Ngì-têu m̀ ngin-sṳt Kì,

²⁹ chúng-he ngài ngin-sṳt Kì; yîn-vi ngài tui Kì ke-vi lòi, he Kì chhâi-phai ngài.”

³⁰ Kì-têu chhiu sióng-oi chok kì, chúng-he mò ngìn ha-sú, yîn-vi kì ke sṳ̀-kî hàn-màng to.

³¹ Chung-ngìn tông-chûng ya yû hó-tô ngìn sin kì; kì-têu kóng: “Kî-tuk lòi ke sṳ̀, voi pí liá-ke ngìn hàng hàn-kha tô ke sṳ̀n-chiak mâ?”

Phai Kín-ví Hi Chok Yâ-sû

³² Fap-li-soi-ngìn thâng-tó chung-ngìn án-ngiòng fûn-fûn ngi-lun Yâ-sû ke sṳ, kì-têu lâu chi-sṳ̂-chóng chhiu phai kín-ví hi chok Yâ-sû.

³³ Yâ-sû kóng: “Ngài hàn-yû tô-séu-è sṳ̀-kiên thùng ngì-têu khiung-ha, yèn-heu oi to-chón ‘Chhâi ngài lòi ke’ ke-vi hi.

³⁴ Ngì-têu voi chhìm ngài, chúng-he chhìm m̀-tó; yîn-vi ngài oi hi ke só-chhai, ngì-têu cho-m̀-tet hi.”

³⁵ Ke-têu Yù-thai-ngìn ke liâng-chhiu pí-chhṳ́ mun-kóng: “Liá-ke ngìn sióng-oi hi nai-vi, pûn ngài-têu chhìm kì m̀-tó nè? Kám-kóng kì oi to fûn-san chhai Hî-lia̍p-ngìn chûng ke Yù-thai khièu-mìn ke-vi hi, kâu Hî-lia̍p-ngìn he-mò?

³⁶ Kì kóng ‘Ngì-têu voi chhìm ngài, chúng-he chhìm m̀-tó’ yu kóng ‘Ngài oi hi ke só-chhai, ngì-têu cho-m̀-tet hi’, liá-ke fa he má-ke yi-sṳ nè?”

Sâng-miang-súi ke Kông-hò

³⁷ Chiet-khì ke chui-mî yit-ngit, chhiu-he chui chông-ngiàm ke yit-ngit, Yâ-sû khî-hí-lòi, thai-sâng siên-ko kóng: “Ngìn na-he choi-châu, chhiu yin-kôi to ngài liá-vi lòi lîm.

³⁸ Sin ngài ke ngìn, cheu Sṳn-kîn só kóng: ‘Tui kiâ nui-tú voi yû kông-hò liù-chhut sâng-miang ke súi.’ ”

³⁹ Yâ-sû liá-ke fa he chṳ́ sin kì ke ngìn só oi chiap-su ke Sṳn-Lìn kóng ke. Ke-sṳ̀ Sṳn-Lìn màng-yû kong-lìm, yîn-vi Yâ-sû hàn-màng tet-tó yùng-kông.

Chung-ngìn Vi-tó Yâ-sû Fûn-chên

⁴⁰ Chung-ngìn tông-chûng yû chhin-tô ngìn thâng-tó liá-ke fa, chhiu kóng: “Liá-ke ngìn khok-sṳ̍t he ke siên-tî!”

⁴¹ Ya yû-ngìn kóng: “Kì he Kî-tuk!” Chúng-he yû-ngìn kóng: “Kî-tuk ngióng-voi tui Kâ-li-li lòi?

⁴² Sṳn-kîn kám m̀-he ki-chai, Kî-tuk he Thai-ví ke heu-thoi, oi kong-sên chhai Thai-ví ke pún-hiông Pak-li-hèn mâ?”

⁴³ Chung-ngìn chhiu vi-tó Yâ-sû fûn-chên.

⁴⁴ Yû-têu ngìn sióng-oi chok kì, chúng-he mò ngìn ha-sú.

Yù-thai-ngìn ke Liâng-chhiu M̀ Sin Yâ-sû

⁴⁵ Ke-têu kín-ví to-chón-hi kien chi-sṳ̂-chóng lâu Fap-li-soi-ngìn; kì-têu mun: “Cho-má-ke mò chiông kì tai-chón-lòi nè?”

⁴⁶ Ke-têu kín-ví en-kóng: “Chhiùng-lòi màng-sṳt yû-ngìn chhiong kì án-ngiòng kóng-fa ke!”

⁴⁷ Fap-li-soi-ngìn kóng: “Ngì-têu ya pûn kì phien-chéu he-mò?

⁴⁸ Ngài-têu ke liâng-chhiu ya-he Fap-li-soi-ngìn kám yû sin kì ke mâ?

⁴⁹ Liá-têu mò mìn-pha̍k Mô-sî fap-li̍t ke pak-siang he su chu-chú ke!”

⁵⁰ Kì-têu tông-chûng yû Nì-kô-tet-mu, kì yî-chhièn sṳt hi kien Yâ-sû. Kì thì-siáng kì-têu, kóng:

⁵¹ “Cheu ngài-têu ke fap-li̍t, màng sṳ́m-mun ya-he chhà-mìn ngìn só-cho ke sṳ, kám cho-tet thin kì ke chhui mâ?”

⁵² Kì-têu kóng: “Kám-kóng ngì ya he Kâ-li-li-ngìn mâ? Ngì hi chhà Sṳn-kîn khon, chhiu tî Kâ-li-li m̀-voi chhut siên-tî.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan