Bìoball air-loidhne

Yok-hon 21 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Tui Chhit-ke Ho̍k-sâng Hién-hien

¹ Liá-têu sṳ yî-heu, chhai Thì-pí-lî-â fù-piên, Yâ-sû yu tui ho̍k-sâng hién-hien. Liá-pái hién-hien ke kîn-ko he án-ngiòng ke:

² Ke-sṳ̀, Sî-mùn-Pí-tet, phiên-miàng Sûng-sâng-é ke Tô-mâ, Kâ-li-li ke Kâ-nâ-ngìn Nâ-tan-ngia̍p, Sî-pí-thai ke lióng-ke lai-é, lâu nang-ngoi lióng-ke ho̍k-sâng khiung-ha chhai ke-vi.

³ Sî-mùn-Pí-tet tui kì-têu kóng: “Ngài oi hi tá ǹg-è.” Kì-têu kóng: “Ngài-têu ya thèn ngì hi.” Só-yî kì-têu chhut-hi, sông-sòn; chúng-he kûi am-pû mò tá-tó pan-mî.

⁴ Thiên yit kông, Yâ-sû khî chhai fù-sùn, chúng-he ho̍k-sâng m̀-tî kì he Yâ-sû.

⁵ Yâ-sû tui kì-têu kóng: “Phèn-yû, ngì-têu yû tá-tó ǹg-è mò?” Kì-têu kóng: “Mò.”

⁶ Yâ-sû kóng: “Chiông mióng-è ve chhai sòn ke yu-phién, chhiu voi tá-tó.” Kì-têu chhiu cheu kì ke fa ve mióng-è hâ-hi, kiet-kó lâi m̀ sông-lòi, yîn-vi mióng-tó thet tô ǹg-è.

⁷ Yâ-sû só-siak ke ke ho̍k-sâng tui Pí-tet kóng: “He Chú!” Sî-mùn-Pí-tet yit thâng-kóng he Chú, ngiàm-sṳ̀ nâ yit-liâng sâm vì-tén (ke-sṳ̀ kì tá-chhak-pok), thiau-lo̍k súi tî-poi.

⁸ Khì-thâ ke ho̍k-sâng chiông sòn-è chhang-khiûn fù-sùn, chiông kûi mióng ǹg-è thô-ko-lòi. Tông-sṳ̀ kì-têu lì fù-sùn mò kí-yén, chhâ-m̀-tô yit-pak kûng-chhak.

⁹ Kì-têu sông-ngan, khon-tó yit-tôi fó-than-fó, táng-kô yû ǹg-è, yu yû piáng-è.

¹⁰ Yâ-sû lâu kì-têu kóng: “Nâ kí-mî ngì-têu chang tá-tó ke ǹg-è lòi.”

¹¹ Sî-mùn-Pí-tet sông-sòn hi, chiông mióng-è thô-sông liu̍k-thi; mióng-tú yû yit-pak ńg-sṳ̍p-sâm-mî thai-ǹg. Sûi-yèn yû án tô ǹg-è, chúng-he mióng mò lan-thet.

¹² Yâ-sû lâu kì-têu kóng: “Ngì-têu lòi sṳ̍t-chêu.” Mò yit-ke ho̍k-sâng kám mun kì kóng: “Ngì he má-ngìn?” yîn-vi kì-têu tî kì chhiu-he Chú.

¹³ Yâ-sû chhiu hàng ko-hi, nâ piáng-è pûn-pûn kì-têu, yèn-heu yu nâ ǹg-è pûn-pûn kì-têu.

¹⁴ Liá he Yâ-sû tui sí fu̍k-fa̍t heu, thi-sâm-pái tui ho̍k-sâng hién-hien.

Yâ-sû lâu Pí-tet

¹⁵ Kì-têu sṳ̍t-páu yî-heu, Yâ-sû mun Sî-mùn-Pí-tet kóng: “Yok-hon ke lai-é Sî-mùn, ngì oi ngài pí liá-têu kha-tô mò?” Kì en-kóng: “Chú â, he, ngì tî ngài oi ngì.” Yâ-sû kóng: “Ngì oi chhṳ ngài ke se yòng-è.”

¹⁶ Yâ-sû thi-ngi-pái mun: “Yok-hon ke lai-é Sî-mùn, ngì oi ngài mò?” Kì en-kóng: “Chú â, he, ngì tî ngài oi ngì.” Yâ-sû lâu kì kóng: “Ngì oi chóng ngài ke yòng-è.”

¹⁷ Yâ-sû thi-sâm-pái yu mun kì: “Yok-hon ke lai-é Sî-mùn, ngì oi ngài mò?” Pí-tet yîn-vi Yâ-sû lièn-lièn sâm-pái mun kì, “Ngì oi ngài mò?” chhiu yù-sèu; kì tui Yâ-sû kóng: “Chú â, ngì vù-só-put-tî, ngì tî ngài oi ngì.” Yâ-sû kóng: “Ngì oi chhṳ ngài ke yòng-è.

¹⁸ Ngài sṳ̍t-chhai lâu ngì kóng, ngì heu-sâng ke sṳ̀, chhṳ-kâ kiê yêu-tai, chhṳ-yù lòi-hi; chúng-he ngièn-ló ke sṳ̀, ngì voi chhûn-chhut sú lòi, phe̍t-ngìn voi chiông ngì thak-tén, tai ngì to ngì mò-oi hi ke só-chhai.”

¹⁹ (Yâ-sû kóng liá-ke fa he chṳ́ Pí-tet voi ngióng-pân sí, lòi yùng-kông Song-ti.) Chiap-tén, Yâ-sû yu lâu kì kóng: “Ngì lòi thèn ngài!”

Yâ-sû lâu Kì Só-siak ke Ke Ho̍k-sâng

²⁰ Pí-tet chón-sṳ̂n, khon-tó Yâ-sû só-siak ke ke ho̍k-sâng thèn-tén lòi. (Ke ho̍k-sâng sṳt chhai sṳ̍t-ya ke sṳ̀ tham-sṳ̂n mun Yâ-sû kóng: “Chú â, oi chhut-mai ngì ke he má-ngìn?”)

²¹ Pí-tet khon-tén kì, mun Yâ-sû kóng: “Chú â, liá ngìn chiông-lòi ngióng-pân?”

²² Yâ-sû en-kóng: “Ngài na oi liù kì ke miang to ngài chai lòi, kôn ngì má-ke sṳ? Ngì thèn ngài chhiu chho̍k!”

²³ Só-yî, liá-ke fa liù-chhòn chhai thèn Yâ-sû ke ngìn tông-chûng, kóng ke ho̍k-sâng m̀-voi sí. Khì-sṳ̍t, Yâ-sû pin mò kóng kì m̀-voi sí, chṳ́-yû kóng: “Ngài na oi liù kì ke miang to ngài chai lòi, kôn ngì má-ke sṳ?”

²⁴ Liá-ke ho̍k-sâng chhiu-he vi liá-têu sṳ cho kien-chṳn ke ngìn; kì chiông liá-têu sṳ ki hâ-lòi. Ngài-têu tî kì ke kien-chṳn he chṳ̂n ke.

Kiet-mî ke Fa

²⁵ Yâ-sû hàn cho chhin-tô phe̍t ke sṳ, na-he yit-yit ki hâ-lòi, ngài sióng sṳ-kie ya mò fap-thu yùng-na̍p án-tô sû.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan