Bìoball air-loidhne

Yok-hon 17 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yâ-sû Vi Ho̍k-sâng Khì-tó

¹ Yâ-sû kóng-liáu liá-têu fa, chhiu ngo-thèu mong-thiên, kóng: “Â-pâ â, sṳ̀-chiet yí-kîn to lé, khiù Ngì yùng-kông Ngì ke Lai-é, pûn Lai-é ya hó yùng-kông Ngì.

² Ngì yû chiông kón-lî chhiòn ngìn-lui ke khièn-piang su-pûn kì, sṳ́ kì chiông yún-sên su-pûn Ngì só kâu-thok kì ke ngìn.

³ Yún-sên chhiu-he ngin-sṳt Ngì — vì-yit ke chṳ̂n Sṳ̀n, yu ngin-sṳt Ngì só chhâi-lòi ke Yâ-sû Kî-tuk.

⁴ Ngài yí-kîn chhai thi-song yùng-kông Ngì; ngài yí-kîn vàn-sṳ̀n Ngì só kâu-thok ke sṳ́-min.

⁵ Â-pâ â, liá-ha khiù Ngì chhai Ngì chhṳ-kâ ke mien-chhièn yùng-kông ngài, chiông ke màng-yû sṳ-kie yî-chhièn, ngài thùng Ngì khiung-yû ke yùng-kông su-pûn ngài!

⁶ “Ngài yí-kîn chiông Ngì hién-mìn pûn ke-têu Ngì tui sṳ-kiên tho̍k-chhut-lòi kâu-pûn ngài ke ngìn. Kì-têu pún-lòi he su̍k Ngì ke, Ngì chiông kì-têu su-pûn ngài; kì-têu ya yû chûn-sú Ngì ke fa.

⁷ Liá-ha kì-têu tî, Ngì só su-pûn ngài ke yit-chhiet, chhiòn-phu he tui Ngì ke-vi lòi ke;

⁸ yîn-vi Ngì só kâu-pûn ngài ke tho-lî, ngài yí-kîn su-pûn kì-têu, kì-têu ya yû chiap-su. Kì-têu khok-sṳ̍t tî ngài he tui Ngì ke-vi lòi ke, ya sin he Ngì chhâi ngài lòi.

⁹ “Ngài vi-tó kì-têu khiù Ngì. Ngài m̀-he vi sṳ-kiên-ngìn khiù, fán-chón he vi Ngì só su ngài ke ngìn khiù, yîn-vi kì-têu he su̍k Ngì ke.

¹⁰ Ngài só-yû ke chhiòn-phu he Ngì ke, Ngì só-yû ke ya he ngài ke; ngài ke yùng-kông he thûng-ko kì-têu hién-mìn chhut-lòi.

¹¹ Ngài liá-ha oi hi Ngì ke-vi, mò chai liù chhai sṳ-kiên, chúng-he kì-têu oi liù chhai sṳ-kiên. Sṳn-kiet ke Â-pâ â! Khiù Ngì yung Ngì ke miàng, chhiu-he Ngì su-pûn ngài ke miàng, pó-sú kì-têu, sṳ́ kì-têu ha̍p-cho yit-thí, chhiong Ngì lâu ngài khiung-yong.

¹² Ngài thùng kì-têu khiung-ha ke sṳ̀, ngài yung Ngì ke miàng, chhiu-he Ngì só su-pûn ngài ke miàng, pó-sú kì-têu. Ngài ya pó-fu kì-têu; chhù-liáu ke chu-thin oi me̍t-mòng ke yit-sà yî-ngoi, mò yit-ke sṳt-thet, án-ngiòng lòi yin-ngiam Sṳn-kîn ke fa.

¹³ Liá-ha, ngài oi hi Ngì ke-vi; ngài hàn chhai liá sṳ-kiên ke sṳ̀ kóng liá-têu fa, he oi pûn kì-têu ke sîm chhûng-mân ngài ke khoai-lo̍k.

¹⁴ Ngài chiông Ngì ke fa su-pûn kì-têu; sṳ-kiên-ngìn chhiu yen-hen kì-têu, yîn-vi kì-têu m̀-he su̍k liá sṳ-kiên, chhiong ngài m̀-he su̍k liá sṳ-kiên yit-yong.

¹⁵ Ngài m̀-he khiù Ngì chiông kì-têu tui liá sṳ-kiên tai-chéu, ngài he khiù Ngì pó-sú kì-têu thot-lì ke sià-ok-chá.

¹⁶ Chhiu-chhiong ngài m̀-he su̍k liá sṳ-kiên, kì-têu ya m̀-he su̍k liá sṳ-kiên.

¹⁷ Khiù Ngì yung chṳ̂n-lî sṳ́ kì-têu chiông chhṳ-kâ fung-hien pûn Ngì; Ngì ke fa chhiu-he chṳ̂n-lî.

¹⁸ Chhiong Ngì chhâi ngài ngi̍p sṳ-kiên, ngài ya phai kì-têu ngi̍p sṳ-kiên.

¹⁹ Vi-tó kì-têu, ngài chiông chhṳ-kâ fung-hien pûn Ngì, sṳ́ kì-têu ya voi sṳ̀n-sîm fung-hien pûn Ngì.

²⁰ “Ngài m̀ tân-chhiang vi kì-têu khiù, ya vi ke-têu chiap-su kì-têu ke fa lòi sin ngài ke ngìn khiù.

²¹ Ngien kì-têu chhiòn-phu ha̍p-cho yit-thí. Â-pâ â, ngien kì-têu sâng chhai ngài-têu tî-poi, chhiong Ngì chhai ngài tî-poi, ngài chhai Ngì tî-poi yit-yong. Ngien kì-têu chhiòn-phu ha̍p-cho yit-thí, pûn sṳ-kiên-ngìn sin ngài he Ngì só chhâi-lòi ke.

²² Ngì su-pûn ngài ke yùng-kông, ngài ya su-pûn kì-têu, sṳ́ kì-têu ha̍p-cho yit-thí, chhiong ngài-têu ha̍p-cho yit-thí khiung-yong.

²³ Ngài chhai kì-têu tî-poi, Ngì chhai ngài tî-poi, sṳ́ kì-têu vàn-chhiòn ha̍p-cho yit-thí, pûn sṳ-kiên-ngìn tî he Ngì chhâi ngài lòi, ya tî Ngì siak kì-têu, chhiong Ngì siak ngài yit-yong.

²⁴ “Â-pâ â, Ngì só su-pûn ngài ke ngìn, ngài chhai nai-vi, ngài oi kì-têu ya thùng ngài khiung-ha chhai ke-vi, pûn kì-têu khon-tó Ngì su ngài ke yùng-kông; yîn-vi chhai chhóng-chho sṳ-kie yî-chhièn, Ngì chhiu siak ngài.

²⁵ Kûng-ngi ke Â-pâ â, sṳ-kiên-ngìn m̀ sṳt Ngì, chúng-he ngài sṳt Ngì; liá-têu ngìn ya tî he Ngì chhâi ngài lòi.

²⁶ Ngài yí-kîn chiông Ngì hién-mìn pûn kì-têu; ngài hàn oi ki-siu̍k án-ngiòng cho, vi-tó pûn Ngì tui ngài ke thung-siak chhûng-mân kì-têu ke sâng-miang, ngài ya sâng chhai kì-têu ke sâng-miang chûng.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan