Bìoball air-loidhne

Yok-hon 15 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yâ-sû He Chṳ̂n ke Phù-thò-su

¹ “Ngài he chṳ̂n ke phù-thò-su; ngâ Pâ he châi-chung ke ngìn.

² Só-yû su̍k ngài yu mò kiet kó-chṳ́ ke su-kî, Kì chhiu chién-thet; chúng-he kiet kó-chṳ́ ke su-kî, Kì chhiu siû-chién to chhîn-chhiang, pûn kì kiet kó-chṳ́ hàn-kha tô.

³ Ngài lâu ngì-têu kóng ke tho-lî yí-kîn sṳ́ ngì-têu chhiang-li.

⁴ Ngì-têu oi yit-chhṳ̍t sâng chhai ngài tî-poi, ngài chhiu sâng chhai ngì-têu tî-poi. Na-he mò lâu ngài kiet-lièn, ngì-têu chhiu m̀-voi kiet kó-chṳ́, chhiong su-kî mò lâu phù-thò-su chiap-tén chhiu m̀-voi kiet kó-chṳ́ yit-yong.

⁵ “Ngài he phù-thò-su; ngì-têu he su-kî. Sâng chhai ngài tî-poi, ngài ya sâng chhai kì tî-poi ke ngìn, chang voi kiet kó-chṳ́ tô-tô; yîn-vi lì-khôi ngài, ngì-têu chhiu mò fap-thu cho má-ke.

⁶ Mò sâng chhai ngài tî-poi ke ngìn, kì voi chhiong su-kî pûn-ngìn fit-thet yit-yong, yèn-heu châu-thet, pûn-ngìn fit-lo̍k fó tî-poi sêu-thet.

⁷ Ká-sṳ́ ngì-têu yit-chhṳ̍t sâng chhai ngài tî-poi, ngài ke fa ya sṳ̀-sòng ki chhai ngì-têu ke sîm-chûng, ngì-têu mò-lun sióng-oi má-ke, khiù, chhiu voi tet-tó.

⁸ Ngì-têu kiet kó-chṳ́ tô-tô, yu ki-siu̍k cho ngài ke ho̍k-sâng, ngâ Pâ chhiu voi yîn-vi án-ngiòng tet-tó yùng-kông.

⁹ Chhiu-chhiong Â-pâ siak ngài, ngài ya siak ngì-têu; ngì-têu oi sâng chhai ngài ke thung-siak chûng.

¹⁰ Ngì-têu na-he chûn-sú ngài ke min-lin, chhiu voi sâng chhai ngài ke thung-siak chûng, chhiong ngài chûn-sú ngâ Pâ ke min-lin, chhiu sâng chhai Kì ke thung-siak chûng yit-yong.

¹¹ “Ngài lâu ngì-têu kóng liá-têu fa, he oi pûn ngì-têu tet-tó ngài ke khoai-lo̍k, sṳ́ ngì-têu ke khoai-lo̍k nêm-chhut-lòi.

¹² Liá he ngài ke min-lin: Ngì-têu oi pí-chhṳ́ siông-siak, chhiong ngài siak ngì-têu yit-yong.

¹³ Vi-tó phèn-yû hî-sên chhṳ-kâ ke sâng-miang, ngìn-kiên ke oi-siak mò pí liá kha ví-thai ke.

¹⁴ Ngì-têu na chûn-sú ngài ke min-lin, chhiu-he ngài ke phèn-yû.

¹⁵ Ngài mò chai khon ngì-têu cho nù-phu̍k, yîn-vi nù-phu̍k m̀-tî chú-ngìn só cho ke sṳ. Ngài chiông ngì-têu khon-cho phèn-yû, yîn-vi ngài yí-kîn chiông ngài tui ngâ Pâ ke-vi thâng-tó ke yit-chhiet chhiòn-phu pûn ngì-têu tî.

¹⁶ M̀-he ngì-têu sién ngài, he ngài sién ngì-têu. Ngài sat-li̍p ngì-têu, he oi ngì-têu chhut-hi kiet yún-chhùn ke kó-chṳ́. Án-ngiòng, ngì-têu fung ngài ke miàng, mò-lun tui Â-pâ khiù má-ke, Kì yit-thin voi su-pûn ngì-têu.

¹⁷ Ngài min-lin ngì-têu ke liá-têu fa, he oi ngì-têu pí-chhṳ́ siông-siak.

Sṳ-kiên-ngìn ke Yen-hen

¹⁸ “Ká-sṳ́ sṳ-kiên-ngìn yen-hen ngì-têu, ngì-têu oi tî, kì-têu yí-kîn siên yen-hen ngài.

¹⁹ Ká-sṳ́ ngì-têu su̍k liá sṳ-kie, sṳ-kiên-ngìn yit-thin voi siak ngì-têu, chhiong siak kì-têu chhṳ-kâ ke ngìn. Chúng-he ngài chiông ngì-têu tui liá sṳ-kiên sién chhut-lòi, ngì-têu chhiu m̀-he su̍k sṳ-kie; só-yî sṳ-kiên-ngìn yen-hen ngì-têu.

²⁰ Ngì-têu oi ki-tet ngài lâu ngì-têu kóng-ko ke fa: ‘Nù-phu̍k mò pí chú-ngìn kha thai.’ Na-he kì-têu pet-hoi ngài, kì-têu ya voi pet-hoi ngì-têu; na-he kì-têu chûn-sú ngài ke fa, kì-têu ya voi chûn-sú ngì-têu ke fa.

²¹ Vi-tó ngài ke yèn-ku, kì-têu voi tui ngì-têu cho liá yit-chhiet ke sṳ, yîn-vi kì-têu m̀-sṳt ke ‘Chhâi ngài lòi ke.’

²² Na-he ngài m̀-sṳt lòi-ko, m̀-sṳt kâu kì-têu, kì-têu chhiu mò chhui; chúng-he, liá-ha kì-têu ke chhui he thôi-m̀-thet ke.

²³ Yen-hen ngài ke, ya yen-hen ngâ Pâ.

²⁴ Ká-sṳ́ ngài chhai kì-têu tông-chûng mò cho ke-têu chhiùng-lòi m̀-sṳt yû-ngìn cho-ko ke sṳ, kì-têu chhiu mò chhui. Sṳ-sṳ̍t-song, kì-têu yû khon-tó ngài só-cho ke, hàn-he yen-hen ngài, ya yen-hen ngâ Pâ.

²⁵ Liá he oi yin-ngiam kì-têu ke Fap-li̍t-sû só siá ke: ‘Kì-têu mò-yèn mò-ku yen-hen ngài!’

²⁶ “Chúng-he, ke tui Â-pâ lòi ke Pó-fi-sṳ̂ voi to; Kì chhiu-he chṳ̂n-lî ke Lìn. Ngài phai Kì tui Â-pâ ke-vi lòi ke sṳ̀, Kì oi vi ngài cho kien-chṳn.

²⁷ Khiung-yong, ngì-têu ya oi vi ngài cho kien-chṳn, yîn-vi ngì-têu tui khôi-sṳ́ chhiu thùng ngài khiung-ha.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan