Bìoball air-loidhne

Yok-hon 13 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yâ-sû Sé Ho̍k-sâng ke Kiok

¹ Phàn-ko-chiet chhièn, Yâ-sû tî kì lì-khôi liá sṳ-kie chón Â-pâ ke-vi hi ke sṳ̀-chiet to lé. Kì yit-chhṳ̍t siak chhai sṳ-kiên su̍k kì chhṳ-kâ ke ngìn, kì chhiu siak kì-têu to-tái.

² Yâ-sû lâu kiâ ho̍k-sâng sṳ̍t-ya ke sṳ̀, Mô-kúi yí-kîn khúng-chṳ Kâ-lio̍k-ngìn Sî-mùn ke lai-é Yù-thai ke sîm, sṳ́ kì kiet-sîm chhut-mai Yâ-sû.

³ Yâ-sû tî Â-pâ yí-kîn chiông yit-chhiet ke khièn-piang kâu-pûn kì; kì tî chhṳ-kâ he tui Song-ti ke-vi lòi ke, oi to-chón Song-ti ke-vi hi.

⁴ Kì hong-hí-lòi, lì-khôi chho-vi, thot-hâ ngoi-sâm, nâ yit-thiàu sú-pha vì chhai yêu-khiên,

⁵ yèn-heu tó súi lo̍k kiok-phùn, khôi-sṳ́ sé ho̍k-sâng ke kiok, yu yung ke sú-pha chhu̍t-châu.

⁶ Kì lòi-to Sî-mùn-Pí-tet ke mien-chhièn, Pí-tet tui kì kóng: “Chú â, ngì oi sé ngài ke kiok he-mò?”

⁷ Yâ-sû en-kóng: “Ngài só-cho ke, ngì liá-ha mò liáu-kié, chiông-lòi ngì chhiu voi mìn-pha̍k.”

⁸ Pí-tet kóng: “Ngài chhie̍t-tui m̀ pûn ngì sé ngài ke kiok!” Yâ-sû kóng: “Ká-sṳ́ ngài mò sé ngì ke kiok, ngì lâu ngài chhiu mò má-ke koân-he.”

⁹ Sî-mùn-Pí-tet kóng: “Chú â, m̀ tân-chhiang ngài ke kiok, lièn sú lâu thèu-nà ya oi sé!”

¹⁰ Yâ-sû kóng: “Sṳ̂n sé-hó ke ngìn, chhiòn-sṳ̂n chhiu chhiang-li, sé kiok chhiu la. Ngì-têu he chhiang-li ke, chúng-he m̀-he tak-ke ngìn chhiang-li.”

¹¹ (Yâ-sû yí-kîn tî má-ngìn oi chhut-mai kì, só-yî kì kóng: “M̀-he tak-ke ngìn chhiang-li.”)

¹² Yâ-sû sé-hó kì-têu ke kiok, chhiu chiông ngoi-sâm chok-hí-lòi, chhô to-chón hi. Kì mun kiâ ho̍k-sâng kóng: “Thèu-ha, ngài vi ngì-têu só cho ke, ngì-têu liáu-kié mò?

¹³ Ngì-têu ham ngài cho sîn-sâng, cho Chú, chhin chho̍k, ngài pún-lòi chhiu-he.

¹⁴ Ngài he ngì-têu ke Chú, ngì-têu ke sîn-sâng, hàn sé ngì-têu ke kiok, ngì-têu ya yin-tông pí-chhṳ́ sé kiok.

¹⁵ Ngài cho ngì-têu ke póng-yong, he oi ngì-têu cheu ngài só-cho ke hi hàng.

¹⁶ Ngài sṳ̍t-chhai lâu ngì-têu kóng, nù-phu̍k mò pí chú-ngìn kha thai, su-phai ke ngìn ya mò pí phai kì ke ngìn kha thai.

¹⁷ Ngì-têu tî liá-ke tho-lî, na-he hi sṳ̍t-hàng chhiu chhin-yû fuk-hi!

¹⁸ “Ngài liá-ke fa m̀-he chṳ́ ngì-têu chhiòn-thí kóng ke; ngài ngin-sṳt ngài só kién-sién ke ngìn. Chúng-he Sṳn-kîn só kóng ‘Ke thùng ngài khiung-ha sṳ̍t-fan ke ngìn, sa yung kiok thet ngài’, liá-ki fa pit-thin voi sṳ̍t-hien.

¹⁹ Ngài chhai sṳ-chhìn hàn-màng fat-sên yî-chhièn chhiu lâu ngì-têu kóng, he oi pûn ngì-têu chhai sṳ-chhìn fat-sên ke sṳ̀, sin ngài chhiu-he ke ‘Chhṳ-yû Yún-yû’ ke.

²⁰ Ngài sṳ̍t-chhai lâu ngì-têu kóng, chiap-thai ngài só phai ke, chhiu-he chiap-thai ngài; chiap-thai ngài ke, chhiu-he chiap-thai ke ‘Chhâi ngài lòi ke’.”

Yâ-sû Yi-ngièn Voi Pûn-ngìn Chhut-mai
( Mâ-thai 26:20-25 ; Mâ-khó 14:17-21 ; Lu-kâ 22:21-23 )

²¹ Yâ-sû kóng-liáu liá-ke fa, sîm-chûng fî-sòng thung-khú, chhiu siên-pu kóng: “Ngài sṳ̍t-chhai lâu ngì-têu kóng, ngì-têu tông-chûng yû yit-ke ngìn oi chhut-mai ngài.”

²² Ho̍k-sâng pí-chhṳ́ siông-khon, m̀-tî kì he chṳ́ má-ngìn kóng ke.

²³ Yû yit-ke Yâ-sû só-siak ke ho̍k-sâng, chet-sṳ̂n kho chhai Yâ-sû ke fài-chûng.

²⁴ Sî-mùn-Pí-tet am-sṳ kì kóng: “Mun kì khon, kì he kóng má-ngìn.”

²⁵ Ke ho̍k-sâng chhiu tham-sṳ̂n mun Yâ-sû kóng: “Chú â, he má-ngìn?”

²⁶ Yâ-sû en-kóng: “Ngài vun yit-te piáng-è pûn má-ngìn, kì chhiu-he.” Kóng-liáu, kì chhiu vun yit-te piáng-è, nâ pûn Kâ-lio̍k-ngìn Sî-mùn ke lai-é Yù-thai.

²⁷ Yù-thai yit chiap-ko piáng-è, Mô-kúi chhiu ngi̍p kì ke sîm. Yâ-sû tui kì kóng: “Ngì oi cho ke, kón-kín hi cho!”

²⁸ Chhai-chho ke ngìn, mò ngìn tî Yâ-sû cho-má-ke tui kì kóng liá-ke fa.

²⁹ Yîn-vi Yù-thai he kón-chhièn ke, yû-têu ho̍k-sâng sióng Yâ-sû he fûn-fu kì hi mâi ko-chiet yung ke tûng-sî, ya-he ham kì tai têu tûng-sî hi pûn khiùng-khú-ngìn.

³⁰ Yù-thai sṳ̍t ke-te piáng-è heu, chit-sṳ̀ chhiu chhut-hi. Ke-sṳ̀ he am-pû-thèu.

Sîn ke Min-lin

³¹ Yù-thai chhut-hi yî-heu, Yâ-sû kóng: “Liá-ha Ngìn-chṳ́ yí-kîn tet-tó yùng-yeu lé; Song-ti ke yùng-yeu ya hién-mìn chhai Ngìn-chṳ́ ke sṳ̂n-song.

³² Ki-yèn Song-ti ke yùng-yeu thûng-ko Ngìn-chṳ́ lòi hién-mìn, Kì ya oi chhîn-chhṳ yùng-kông Ngìn-chṳ́, chit-sṳ̀ chhiu oi yùng-kông kì.

³³ Se-chṳ́ â, ngài thùng ngì-têu khiung-ha ke sṳ̀-kiên mò kí-kiú lé. Ngì-têu voi chhìm ngài, chúng-he ngài lâu ngì-têu kóng, chhiu-chhiong ngài lâu Yù-thai-ngìn ke liâng-chhiu kóng-ko ke: ‘Ngài oi hi ke só-chhai, ngì-têu cho-m̀-tet hi.’

³⁴ Ngài pûn ngì-têu yit-thiàu sîn min-lin: Ngì-têu oi pí-chhṳ́ siông-siak; ngài ngióng-pân siak ngì-têu, ngì-têu ya oi ngióng-pân pí-chhṳ́ siông-siak.

³⁵ Na-he ngì-têu pí-chhṳ́ siông-siak, sṳ-kiên-ngìn chhiu voi ngin-chhut ngì-têu he ngài ke ho̍k-sâng.”

Yâ-sû Yi-ngièn Pí-tet M̀ Ngin Chú
( Mâ-thai 26:31-35 ; Mâ-khó 14:27-31 ; Lu-kâ 22:31-34 )

³⁶ Sî-mùn-Pí-tet mun Yâ-sû kóng: “Chú â, ngì oi hi nai-vi?” Yâ-sû kóng: “Ngài só-oi hi ke só-chhai, ngì liá-ha cho-m̀-tet thèn ngài hi, chúng-he kha-man têu-é ngì chhiu voi thèn ngài hi.”

³⁷ Pí-tet kóng: “Chú â, cho-má-ke liá-ha ngài cho-m̀-tet thèn ngì hi nè? Ngài hén vi ngì piang-miang to sí!”

³⁸ Yâ-sû kóng: “Ngì hén vi ngài piang-miang to sí mâ? Ngài sṳ̍t-chhai lâu ngì kóng, kiê-é thài yî-chhièn, ngì voi sâm-pái m̀ ngin ngài.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan