Bìoball air-loidhne

Yî-sṳ̂-thiap Ki 9 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yù-thai-ngìn Chhù-me̍t Kì-têu ke Tui-thi̍t

¹ Sṳ̍p-ngi ngie̍t, chhiu-he Â-tha̍t-ngie̍t sṳ̍p-sâm to lé; liá he vòng ke min-lin khôi-sṳ́ yû-háu ke ngit-è, ya he Yù-thai-ngìn ke sù-thi̍t ngièn-lòi sióng-oi sêu-me̍t kì-têu ke ngit-è. Chúng-he, ke-ngit, Yù-thai-ngìn fán-chón yàng-ko kì-têu.

² Yù-thai-ngìn chhai chhiòn-koet tak-sén, kì-têu só he̍t ke sàng-tú chû-chṳt hí-lòi, kûng-kit sióng-oi hoi kì-têu ke ngìn. Tak só-chhai ke ngìn chhiòn-phu kiâng kì-têu, mò-ngìn yû phan-fap tí-khong kì-têu.

³ Tak-sén ke kôn-yèn, sén-chóng, chúng-tuk lâu vòng-kâ thoi-péu, chhiòn-phu pông-chhu Yù-thai-ngìn, yîn-vi kì-têu kiâng Ma̍t-tí-kói.

⁴ Chhiòn-koet ke ngìn tî: Liá-ha Ma̍t-tí-kói chhai vòng-kiûng he yit-ke tông-yû khièn-li̍t ke ngìn, kì ke khièn-li̍t yu ye̍t-lòi ye̍t-thai.

⁵ Só-yî Yù-thai-ngìn cheu chhṳ-kâ ke yi-sṳ tui-thai kì-têu ke sù-thi̍t, yung tô-kiam kûng-kit, chhṳ̀-thet kì-têu.

⁶ Yù-thai-ngìn chhai sú-tû Sû-sân-sàng chhiu chhṳ̀-thet ńg-pak ngìn.

⁷ Ha̍p-man ke sṳ̍p-ke lai-é ya pûn kì-têu chhṳ̀-sí: Pâ-sân-thai-thâ, Tha̍t-fûn, Â-sṳ̂-pha-thâ,

⁸ Pho-lâ-thâ, Â-thai-li-ngâ, Â-li-thai-thâ,

⁹ Pha-mâ-sṳ̂-thâ, Â-li-soi, Â-li-thoi, Ngá-yâ-sat-thâ.

¹⁰ Ha̍p-man he Ha̍p-mí-thai-thâ ke lai-é, he Yù-thai-ngìn ke tui-thi̍t. Chúng-he Yù-thai-ngìn mò chiông chhòi-vu̍t chhióng-chéu.

¹¹ Ke-ngit, sú-tû Sû-sân-sàng pûn-ngìn chhṳ̀-sí ke ngìn-su po-to vòng ke-vi,

¹² vòng chhiu tui vòng-heu Yî-sṳ̂-thiap kóng: “Yù-thai-ngìn chhai Sû-sân-sàng chhiu chhṳ̀-thet ńg-pak ngìn, Ha̍p-man ke sṳ̍p-ke lai-é ya pûn kì-têu chhṳ̀-sí. Chhai ngài khì-thâ ke tak-sén, m̀-tî chhṳ̀-thet kí-tô ngìn! Ngì liá-ha yû má-ke yêu-khiù? Lâu ngài kóng, ngài yit-thin ya su-pûn ngì.”

¹³ Yî-sṳ̂-thiap en-kóng: “Vòng na chún ngài ke yêu-khiù, thiên-kông-ngit chhiáng pûn Sû-sân-sàng ke Yù-thai-ngìn chai cheu kîm-pû-ngit só-cho ke hi cho, yu chiông Ha̍p-man sṳ̍p-ke lai-é ke sṳ̂n-sṳ̂ tiau chhai káu-hìn-ka táng.”

¹⁴ Vòng chhiu án-ngiòng ha-lin; kì ke min-lin chhòn-phien Sû-sân-sàng. Ha̍p-man sṳ̍p-ke lai-é ke sṳ̂n-sṳ̂ chhiu pûn-ngìn tiau chhai káu-hìn-ka táng kûng-khôi sṳ-chung.

¹⁵ Â-tha̍t-ngie̍t sṳ̍p-si, Sû-sân-sàng ke Yù-thai-ngìn yu chai chhi-si̍p, chhai sàng-tú chhṳ̀-thet sâm-pak sà, chúng-he kì-têu hàn-he mò chhióng chhòi-vu̍t.

¹⁶ Khì-thâ tak-sén ke Yù-thai-ngìn chhai Â-tha̍t-ngie̍t sṳ̍p-sâm, ya chû-chṳt hí-lòi pó-fu chhṳ-kâ; kì-têu vi-tó chhù-me̍t sù-thi̍t, chhṳ̀-sí hen kì-têu ke ngìn chúng-khiung chhit-van ńg-chhiên sà, chúng-he chhiòn-phu mò chhut-sú chhióng chhòi-vu̍t.

¹⁷ Thi-ngi ngit, Â-tha̍t-ngie̍t sṳ̍p-si, kì-têu chhiu mò-chai chhṳ̀ ngìn; kì-têu thin liá-ngit cho phan yèn-si̍t fôn-hí khin-chuk ke ngit-è.

¹⁸ Chúng-he Sû-sân-sàng ke Yù-thai-ngìn thin sṳ̍p-ńg cho chiet-ngit; yîn-vi kì-têu he chhai sṳ̍p-sâm, sṳ̍p-si lióng-ngit chhṳ̀ sù-thi̍t, chhai sṳ̍p-ńg ke-ngit chang mò chhṳ̀-ngìn.

¹⁹ Só-yî, he̍t chhai chông-ha ke Yù-thai-ngìn chiông Â-tha̍t-ngie̍t sṳ̍p-si thin-cho phan yèn-si̍t fôn-hí khin-chuk ke chiet-ngit, fu-siông sung lî-vu̍t.

Phû-ngí-chiet ke Lòi-ngièn

²⁰ Ma̍t-tí-kói chiông liá-têu sṳ chhiòn-phu ki-liu̍k hâ-lòi, yu fat sin-é pûn Â-ha̍p-sùi-lû-vòng chhiòn-koet tak-sén ke Yù-thai-ngìn,

²¹ fûn-fu kì-têu, tak-ngièn chhiòn-phu oi chûn-sú Â-tha̍t-ngie̍t sṳ̍p-si lâu sṳ̍p-ńg cho chiet-ngit,

²² yîn-vi liá lióng-ngit he Yù-thai-ngìn thot-lì sù-thi̍t ke ngit-è; liá-chak ngie̍t he Yù-thai-ngìn tui pî-sông, chhie̍t-mong chón-cho fôn-hí, khoai-lo̍k ke ngie̍t-fun. Kì-têu oi sú liá chiet-ngit, phan yèn-si̍t fôn-hí khin-chuk, fu-siông sung lî-vu̍t, ya oi kiu-chi khiùng-khú ngìn.

²³ Yù-thai-ngìn chûn-chhiùng Ma̍t-tí-kói ke chṳ́-sṳ, só-yî kì-têu tak-ngièn chhai liá chiet-ngit khin-chuk.

²⁴ Yù-thai-ngìn ke sù-thi̍t, Â-kap-ngìn Ha̍p-mí-thai-thâ ke lai-é Ha̍p-man, sṳt kie-va̍k chhù-thet Yù-thai-ngìn. Kì yung chhû-chhiâm (yu ham-cho chhû “phû-ngí”) lòi kiet-thin yit-ke ngit-è, oi sêu-me̍t Yù-thai-ngìn.

²⁵ Chúng-he yîn-vi Yî-sṳ̂-thiap to vòng ke-vi hi khién-khiù, vòng chhiu pân-pu min-lin, sṳ́ Ha̍p-man ke kie-mèu kûi-to chhṳ-kâ ke sṳ̂n-song, chhiu-he kì lâu kì ke lai-é chhiòn-phu pûn-ngìn tiau chhai káu-hìn-ka táng.

²⁶ Liá chhiu-he “Phû-ngí-chiet” ke lòi-ngièn. Yù-thai-ngìn yîn-vi Ma̍t-tí-kói só-siá ke sin-é, pin kì-têu só tù-tó ke sṳ,

²⁷ chhiu vi chhṳ-kâ, heu-thoi, lâu ke-têu khó-nèn kûi-sun kì-têu ke ngìn, thin yit-ke kûi-kí, oi cheu Ma̍t-tí-kói ke chṳ́-sṳ, tak-ngièn ki-ngiam liá lióng-ngit.

²⁸ Mò-lun chhai nai-sén nai-sàng, tak-ke Yù-thai kâ-thìn oi sṳ-sṳ thoi-thoi yún-yén ki-ngiam chûn-sú liá “Phû-ngí-chiet.”

²⁹ Â-pí-hâi ke moi-é — vòng-heu Yî-sṳ̂-thiap ya siá yit-fûng sin-é, yung vòng-heu ke chhiòn-khièn chṳ̂-chhṳ̀ Ma̍t-tí-kói só-siá ke-fûng yû-koân Phû-ngí-chiet ke sin-é.

³⁰ Liá sin-é he siá-pûn Â-ha̍p-sùi-lû-vòng thúng-chhṳ ke yit-pak ngi-sṳ̍p-chhit sén só-yû ke Yù-thai-ngìn. Sin-é tî-poi chuk-fuk Yù-thai-ngìn fò-phìn, ôn-chhiòn,

³¹ yu chṳ́-sṳ kì-têu lâu heu-thoi oi cheu-sṳ̀ chûn-sú Phû-ngí-chiet, chhiong kì-têu chûn-sú kim-sṳ̍t lâu ôi-khiù ke kûi-thin khiung-yong. Liá he Yù-thai-ngìn Ma̍t-tí-kói lâu vòng-heu Yî-sṳ̂-thiap khiung-thùng fat-chhut ke min-lin.

³² Yî-sṳ̂-thiap ke min-lin khok-thin liáu Phû-ngí-chiet; liá min-lin ya siá chhai sû-kién tî-poi.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan