Bìoball air-loidhne

Yî-soi-â Sû 3 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yâ-lu-sat-lâng ke Fun-lon

¹ Chṳ-kô ke Song-chú — Van-kiûn ke Ngièn-soi oi chiông Yâ-lu-sat-lâng lâu Yù-thai ngìn-mìn ngit-sòng só sî-yeu ke chhiòn-phu nâ-chéu; Kì oi nâ-chéu kì-têu só vá-kho ke sṳ̍t-vu̍t lâu súi.

² Kì oi sêu-me̍t kì-têu ke yîn-hiùng lâu chan-sṳ, fap-kôn lâu siên-tî, son-miang ke lâu chóng-ló,

³ kiûn-sṳ-kâ lâu mìn-kiên liâng-chhiu, chhâm-mèu, sú-ngi sṳ̂-fu lâu hàng sià-su̍t ke ngìn.

⁴ Song-chú oi yung heu-sâng-ngìn cho kì-têu ke liâng-chhiu, pûn mò kîn-ngiam ke se-ngìn-è kón kì-têu.

⁵ Ngìn-mìn tak-sà voi khî-fu lòi, khî-fu hi; heu-sâng-ngìn khon-khiâng ló-ngìn-kâ; pî-chhien ke vú-yu̍k chûn-kui ke.

⁶ To ke-ngit, voi yû-ngìn chhai kì chhṳ-kâ ke kâ-chhu̍k chûng sién-chhut yit-sà, kóng: “Ngì hàn-yû mien-sâm hó-chok, ngì lòi-cho ngài-têu ke liâng-chhiu! Liá phai-fái ke só-chhai pûn ngì kón hó nâ!”

⁷ Ke-ngìn voi thai-sâng en: “M̀-hó sién ngài cho ngìn-mìn ke liâng-chhiu; ngài mò-fap yî-hó ngì-têu ke sông-hoi. Ngài vuk-hâ mò sṳ̍t ke, ya mò chok ke.”

⁸ Yâ-lu-sat-lâng voi vang! Yù-thai voi tó! Yîn-vi kì-têu só-kóng ke fa, só-cho ke sṳ mò yit-yong mò vì-poi Song-chú; kì-têu kûng-khôi vú-yu̍k Song-ti ke yùng-kông.

⁹ Tui kì-têu ke mien-set chhiu khon tet-chhut kì-têu ke fái sîm-su̍t. Kì-têu lâu Só-tô-mâ-ngìn khiung-yong, kûng-khôi fam-chhui. Kì-têu voi tù-tó châi-nan lé; kì-têu ok yû ok-po.

¹⁰ Oi hiong chṳn-chhṳ̍t ke ngìn kóng, kì-têu voi sṳ-sṳ sun-li; kì-têu voi hióng-su chhṳ-kâ kûng-chok ke sṳ̀n-kó.

¹¹ Chúng-he cho fái-sṳ ke ngìn voi tù-tó châi-fo; kì-têu voi yîn-vi chhṳ-kâ só-cho ke fái-sṳ su-tó po-yin.

¹² Lun-tó Ngài ke chṳ́-mìn, kì-têu voi pûn se-ngìn-è khî-fu, pûn fu-ńg kón-chṳ. Ngài ke chṳ́-mìn â, ngì-têu ke liâng-chhiu thu m̀-chho̍k lu, hoi ngì-têu hàng chhâ-lu.

Song-chú Sṳ́m-phan Kì ke Chṳ́-mìn

¹³ Song-chú oi lòi phien-lun; Kì oi khî hí-lòi siên-phan van-mìn.

¹⁴ Song-chú chin-ngi̍p fap-thìn sṳ́m-phan Kì chṳ́-mìn chûng ke chóng-ló lâu liâng-chhiu, siên-phan kì-têu ke chhui, kóng: “Ngì-têu pho-fái phù-thò-yèn; ngì-têu vuk-tú tôi-mân tui khiùng-khú ngìn chhióng-lòi ke tûng-sî.

¹⁵ Ngì-têu cho-má-ke khî-ap Ngài ke chṳ́-mìn, sia khiùng-khú ngìn ke mien-phì nè? Ngài — Chṳ-kô ke Song-chú, Van-kiûn ke Ngièn-soi án-ngiòng kóng.”

Kín-ko Yâ-lu-sat-lâng ke Fu-ńg

¹⁶ Song-chú kóng: “Ngì-têu khon, Siak-ôn ke fu-ńg ngióng-pân kiêu-ngau! Kì-têu hàng-lu, thèu-nà khià kô-kô. Kì-têu muk-chû tá ngién-koái, hàng-lu mò chṳn-kîn, kiok-ak tin-tin tong-tong.

¹⁷ Só-yî, Ngài yit-thin oi chit-fa̍t kì-têu; sṳ́ kì-têu pot chhu-thèu, chhak-sṳ̂n lu-thí.”

¹⁸ Chhai ke-ngit, Chú oi chiông Siak-ôn fu-ńg tá-pan ke tûng-sî chhiòn-phu nâ-chéu, chhiu-he kì-têu kiok-ak, thèu-nà-mô mióng, kîm-chân lâu ngie̍t-hìn ke pha̍t-lien,

¹⁹ ngí-vàn, sú-ak, miàng-mien-sâ,

²⁰ kì-têu ke mo-é, kiok-lien, fâ-tai, hiông-pâu, fù-thoi,

²¹ kim-chṳ́, phi-vàn,

²² lî-fu̍k, ngoi-tho, phî-kiên, chhièn-pâu,

²³ sú-kiang-é, mà-sâ sú-pha, pâu-thèu-kîn, miàng-sṳ̂n-pha.

²⁴ Kì-têu mò-chai yung hiông-súi, sṳ̂n-thí fat-chhut chhu-mi; mò-chai kiê chhin-chiâng ke yêu-tai, von chhû mà-sok suk-yêu; mò-chai thak chhin-chiâng ke ki-chûng, fán-chón pien kông-thèu; mò chhin-chiâng ke sâm-fu hó-chok, fán-chón kiê mà-pu sâm; chiâng-chiâng ke mien fán-chón nat-to ché-ché.

²⁵ Sàng-tú ke nàm-ngìn voi vang chhai tô-ha, yúng-sṳ voi sí chhai chan-chhòng.

²⁶ Siak-ôn ke sàng-mùn voi sông-sîm thai-kieu; sàng-sṳ voi fông-liòng to chhiong fu-ńg, sâm-fu pûn-ngìn thot chhiang-chhiang, chhô chhai thi-nài-hâ.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan