Sṳ̂-phiên 9 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Kám-chhia Song-ti ke Kûng-ngi
Thai-ví ke sṳ̂, kâu-pûn Sṳn-kô Chhui-chóng, thiau yung Ôi-chṳ́-kô.

¹ Song-chú â, ngài oi yit-sîm yit-yi kám-chhia Ngì; ngài oi chhòn-yòng Ngì yit-chhiet khì-meu ke chok-vì.

² Ngài oi yîn-vi Ngì lòi fôn-hí khoai-lo̍k; Chṳ-kô-chá â, ngài oi kô-siung Ngì ke miàng!

³ Ngì yit hién-hien, ngài ke sù-thi̍t chhiu thui-chéu; chhai Ngì mien-chhièn, kì-têu chhiu vang-hâ me̍t-mòng.

⁴ Ngì chhô chhai pó-chho song, cheu kûng-ngi lòi sṳ́m-phan; Ngì vi ngài sṳ̂n-yên, vi ngài ke on-khien phien-fu.

⁵ Ngì chit-phi lie̍t-pâng, sêu-me̍t sià-ok ke ngìn; Ngì chhu̍t-thet kì-têu ke miàng, chhṳ̍t-to yún-yén.

⁶ Ngài ke sù-thi̍t yí-kîn me̍t chhiang-chhiang lé; kì-têu ke sàng-sṳ pûn Ngì fí-me̍t thet; ya mò-ngìn chai-ko ki-ngiam kì-têu lé.

⁷ Chúng-he, Song-chú oi chóng-khièn to yún-yén; Kì yí-kîn vi sṳ́m-phan sat-li̍p Kì ke pó-chho.

⁸ Kì yung kûng-ngi sṳ́m-phan sṳ-kie; Kì cheu kûng-phìn thúng-chhṳ van-mìn.

⁹ Song-chú he su ap-pet ke ngìn ke phit-nan-só, he kì kip-nan sṳ̀ thò-nan ke sàng-pó.

¹⁰ Song-chú â, ngin-sṳt Ngì ke ngìn oi yí-kho Ngì, yîn-vi Ngì m̀-sṳt hi-chhie̍t ke-têu chhìm-khiù Ngì ke ngìn.

¹¹ Oi siung-chan chhai Siak-ôn chóng-khièn ke Song-chú! Oi chhai van-koet chûng-kiên chhòn-yòng Kì ke chok-vì!

¹² Song-ti ki-ngiam khú-nan chûng ke ngìn; Kì mò m̀ ki-tet kì-têu ke ôi-khiù, oi chit-fa̍t pet-hoi kì-têu ke ngìn.

¹³ Song-chú â, khiù Ngì lìn-mén ngài! Ngì khon, yen-hen ngài ke ngìn ngióng-pân pet-hoi ngài! Song-chú â, khiù Ngì tui sí-mùn pâng ngài sông-lòi,

¹⁴ pûn ngài khî chhai Siak-ôn-sàng ke mùn-héu, tui ngìn kóng-hí ngài siung-chan Ngì ke yit-chhiet, yu yîn-vi Ngì ke chṳ́n-kiu fôn-hí khoai-lo̍k.

¹⁵ Ngoi-pâng-ngìn ham chhai chhṳ-kâ yet ke hâng-tú, kiok pûn chhṳ-kâ só-sat ke lò-mióng chhàn-tó.

¹⁶ Song-chú thûng-ko kûng-chṳn ke sṳ́m-phan chông-hién Kì chhṳ-kâ; fái-ngìn pûn chhṳ-kâ ke sú só-cho ke chhàn-to sí-sí.

¹⁷ Fái-ngìn lâu só-yû m̀-tap Song-ti ke ngoi-pâng-ngìn, kì-têu chhiòn-phu oi lo̍k yîm-kiên.

¹⁸ Khiùng-khú-ngìn, Song-ti yit-thin m̀-voi yún-yén m̀ ki-tet kì-têu; su pet-hoi ke, kì-têu ke sîm-ngien ya m̀-voi yit-chhṳ̍t lo̍k-khûng.

¹⁹ Song-chú â, hong-hí-lòi, mo̍k pûn sṳ-kiên-ngìn yàng-ko Ngì! Khiù Ngì tai ngoi-pâng-ngìn to Ngì mien-chhièn, sṳ́m-phan kì-têu.

²⁰ Song-chú â, pûn kì-têu thai-thai chho̍k-kiâng; pûn kì-têu tî chhṳ-kâ he ngìn thin-thin!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan