Bìoball air-loidhne

Sṳ̂-phiên 89 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Koet-nan chûng ke Sṳ̂-kô
Yî-sṳ̂-lâ-ngìn Yî-tham ke kau-hiun-sṳ̂.

¹ Song-chú â, ngài oi yún-yén kô-chhong Ngì put-pien ke chhṳ̀-oi; ngài oi khôi-choi chhòn-yòng Ngì ke sin-sṳ̍t chhṳ̍t-to van-thoi.

² Ngài kóng, Ngì ke chhṳ̀-oi yún-yén chhòng-chhùn; Ngì ke sin-sṳ̍t kiên-thin, chhiong thiên yit-yong.

³ Ngì kóng: “Ngài sṳt thùng Ngài só kién-sién ke ngìn li̍p-yok; Ngài sṳt yin-hí Ngài ke phu̍k-ngìn Thai-ví kóng:

⁴ ‘Ngài oi sṳ́ ngì ke heu-thoi yún-yén cho vòng; Ngài oi kiên-ku ngì ke vòng-vi to van-thoi.’ ”

⁵ Song-chú â, chû-thiên siung-chan Ngì khì-meu ke chok-vì; sṳn-chá chhai thiên-thìn chhong-kô chan-mî Ngì ke sin-sṳ̍t.

⁶ Thiên-táng kám yû thùng Song-chú pí et-tet ke? Sṳ̀n ke chung-chṳ́ tông-chûng mò yit-ke cho-tet thùng Song-chú pài khiung-ha.

⁷ Chhai sṳn-chá ke chhi-fi chûng, Song-ti chui su chûn-chhung; kì-têu chhai Kì ke chû-vì, chhiòn-phu kin-vi Kì.

⁸ Chú Song-ti — Van-kiûn ke Ngièn-soi â, má-ngìn chhiong Ngì án-yû khièn-nèn? Song-chú â, Ngì chhai só-yû ke sṳ-chhìn song hién-chhut Ngì ke sin-sṳ̍t.

⁹ Ngì kón-chṳ thai-hói; Ngì phìn-chhin pô-long.

¹⁰ Ngì tá-sui hói-koai Lâ-ha̍p-pak, chhṳ̀-sí kì; Ngì yung thai khièn-nèn ke sú tá-san Ngì ke sù-thi̍t.

¹¹ Thiên he Ngì ke, thi ya khiung-yong he Ngì ke; sṳ-kie lâu khì-chûng ke van-vu̍t he Ngì chhóng-chho ke.

¹² Tui nàm-khi̍t to pet-khi̍t, chhiòn-phu he Ngì chho ke; Thâ-phok-sân, Het-mùn-liâng lûng-chúng tui Ngì fôn-fû.

¹³ Ngì ke sú-kut ngióng-pân yû-li̍t! Ngì ke khièn-nèn ngióng-pân khiòng-thai!

¹⁴ Ngì ke koet he yung chṳn-ngi lâu kûng-tong cho kîn-kî; Ngì só-cho ke yit-chhiet hién-chhut chhṳ̀-oi lâu sin-sṳ̍t.

¹⁵ Yung sṳ̂-kô kin-pai Ngì ke ngìn sṳ̍t-chhai yû fuk-hi! Song-chú â, kì-têu sên-fa̍t chhai Ngì ke kông-mìn chûng.

¹⁶ Yîn-vi Ngì, kì-têu kûi-ngit fôn-hí khoai-lo̍k; kì-têu só siung-chan ke he Ngì ke kûng-ngi.

¹⁷ Ngì he kì-têu ke yùng-kông lâu li̍t-liong; Ngì sṳ̂-ên, ngài-têu chhiu tet-tó sṳn-li.

¹⁸ Ngài-têu ke tún-phài sṳ̍t-chhai he Song-chú kién-sién ke; ngài-têu ke vòng he Yî-set-lie̍t ke Sṳn-chá sat-li̍p ke.

Song-ti Pûn Thai-ví ke Yin-hí

¹⁹ Ke-sṳ̀, Ngì chhai yi-siong chûng tui Ngì chûng-sîm ke chṳ́-mìn kóng: “Ngài yí-kîn chiông miên-liù su-pûn yit-ke chhut-miàng ke yúng-sṳ; Ngài chiông vòng-vi su-pûn Ngài tui ngìn-mìn chûng sién chhut-lòi ke ngìn.

²⁰ Ngài yí-kîn kién-sién Ngài ke phu̍k-ngìn Thai-ví, yung sṳn-yù kò kì, li̍p kì cho ngì-têu ke vòng.

²¹ Ngài ke nèn-li̍t oi sṳ̀-sòng thùng kì khiung-ha; Ngài ke khièn-nèn voi sṳ́ kì pien chhin khiòng-chong.

²² Kì ke sù-thi̍t yún-yén mò phan-fap yàng kì; sià-ok ke ngìn ya mò fap-thu hoi-tó kì.

²³ Ngài oi tá-sui thùng kì chok-tui ke ngìn; Ngài oi tá-vang yit-chhiet hen kì ke ngìn.

²⁴ Ngài oi yung sin-sṳ̍t lâu chhṳ̀-oi khoán-thai kì; kho Ngài ke miàng, kì chhiu voi tet-tó sṳn-li.

²⁵ Ngài oi sṳ́ kì ke koet-thú kín-lòi kín-thai, tui Thi-chûng-hói to Yu-fat-lâ-tí-hò.

²⁶ Kì voi tui Ngài kóng: ‘Ngì he ngâ Pâ, ngài ke Song-ti; Ngì he chṳ́n-kiu ngài ke phàn-sa̍k!’

²⁷ Ngài oi sat-li̍p kì cho chóng-chṳ́, cho sṳ-kiên chui ví-thai ke vòng.

²⁸ Ngài tui kì ke chhṳ̀-oi m̀-voi kói-pien; Ngài thùng kì li̍p ke yok yún-yén yû-háu.

²⁹ Ngài oi sṳ́ kì ke heu-thoi yún-yén chóng-khièn; kì ke pó-chho voi chhiong thiên án-ngiòng chhòng-chhùn.

³⁰ “Kì ke heu-thoi na hi-chhie̍t Ngài ke kau-sṳ, hàng-sṳ vì-ngìn m̀ chûn-cheu Ngài ke fap-chet,

³¹ kì-têu na vì-phoi Ngài ke kûi-chet, kì-têu na m̀ sú Ngài ke kie-min,

³² Ngài chhiu oi yung kun-é lòi chit-fa̍t kì-têu ke ko-fam; Ngài ya oi yung piên-é lòi chit-fa̍t kì-têu ke chhui-ngiak.

³³ Chúng-he, Ngài tui Thai-ví ke chhṳ̀-oi m̀-voi sû-fì; Ngài tui kì ke sin-sṳ̍t yún-yén m̀-voi pien-chṳt.

³⁴ Ngài m̀-voi fi-thet thùng kì só-li̍p ke yok, ya m̀-voi kói-pien Ngài pûn kì ke yin-hí.

³⁵ “Ngài chṳ́ chhṳ-kâ ke sṳn-miàng fat-sṳ, Ngài fat-sṳ yit-pái yún-yén yû-háu: Ngài chhie̍t-tui m̀-voi khî-phien Thai-ví!

³⁶ Kì ke heu-thoi voi yit-thoi chhòn yit-thoi, chhṳ̍t-to yún-yén; Ngài oi khon-ku kì ke pó-chho, pûn kì chhiong ngit-thèu chhòng-chhùn.

³⁷ Kì ke pó-chho voi chhiong ngie̍t-kông án kiên-thin; ngie̍t-kông he thiên-khûng chûng-sṳ̍t ke kien-chṳn-chá.”

Than-sit Vòng ke Sṳt-phai

³⁸ Kiet-kó Ngì sa khî-chhie̍t kì, piong-thet kì; Ngì fî-sòng khién Ngì só sién-li̍p ke vòng.

³⁹ Ngì chhí-sêu thùng Ngì phu̍k-ngìn só-li̍p ke yok; Ngì chiông kì ke miên-liù fit-lo̍k nam-nài tú.

⁴⁰ Ngì chhak-thet kì só-yû ke sàng-chhiòng, sṳ́ kì ke sàng-pó sàng-cho fông-thi.

⁴¹ Ko-lu ke ngìn chhiòn-phu chhióng kì; lìn-koet ya siông-châng vú-yu̍k kì.

⁴² Ngì sṳ́ kì ke sù-thi̍t lûng-chúng tá-yàng kì; Ngì pûn kì ke thi̍t-ngìn chhiòn-phu chṳ̂n fôn-hí.

⁴³ Ngì sṳ́ kì ke vú-hi sṳt-háu, pûn kì chhai chan-chhòng khî m̀-he̍t.

⁴⁴ Ngì chhióng-chéu kì ke khièn-chhóng, chiông kì ke pó-chho súng-vang.

⁴⁵ Ngì sṳ́ kì vi-ló siên-sôi; Ngì pûn kì su-chhin yit-chhiet ke siû-yu̍k.

Khién-khiù Song-ti Théu-piong

⁴⁶ Song-chú â, Ngì khong-tén m̀-tap ngài-têu, oi to yún-yén mâ? Ngì ke nu-hi chhiong fó tông-chho̍k, oi to kí-sṳ̀ nè?

⁴⁷ Khiù Ngì oi ki-tet ngài ke ngìn-sên he kí-tón; Ngì só chhóng-chho ke ngìn-lui he ngióng-pân hî-khûng!

⁴⁸ Nai yû-ngìn chhòng-sên put-ló nè? Má-ngìn thò tet-ko yîm-kiên ke khièn-sṳ nè?

⁴⁹ Chú â, Ngì yung sin-sṳ̍t hiong Thai-ví só yin-hí ke, Ngì siên-chhièn ke chhṳ̀-oi chhai nai-vi?

⁵⁰ Chú â, khiù Ngì m̀-hó m̀ ki-tet Ngì ke phu̍k-ngìn só sṳ̀n-su ke siû-yu̍k; khiù Ngì m̀-hó m̀ ki-tet ngài ngióng-pân ngiûn-su ngoi-pâng ke khî-fu.

⁵¹ Song-chú â, Ngì ke sù-thi̍t vú-yu̍k Ngì sat-li̍p ke vòng; mò-lun kì hi-to nai-vi, kì-têu chúng-he vú-yu̍k kì.

⁵² Ngien Song-chú yún-yén tet-tó siung-chan! Â-mén! Â-mén!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan