Bìoball air-loidhne

« Roimhe

Air adhart »

Sṳ̂-phiên 78 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Song-ti lâu Kì ke Chṳ́-mìn
Â-sat ke kau-hiun-sṳ̂.

¹ Ngài ke chṳ́-mìn â, oi liù-sîm thâng ngài ke kau-thô; ngì-têu oi chet-ngí thâng ngài só-kóng ke fa.

² Ngài oi yung pí-yi lòi sot-mìn; ngài oi kóng li̍t-sṳ́ ke o-meu:

³ chhiu-he ngài-têu só thâng-ko só-tî ke sṳ, he ngài-têu ke chú-siên lâu ngài-têu kóng ke.

⁴ Ngài-têu mò-oi tui chṳ́-sûn khong-tén liá-têu sṳ-chhìn; ngài-têu yit-thin oi tui ha yit-thoi ke ngìn sot-mìn: Song-chú ke mî-san, Kì ke thai-nèn, lâu Kì yit-chhiet khì-meu ke chok-vì.

⁵ Kì pân-pu fap-lin pûn Ngâ-kok ke heu-thoi; Kì chṳ-thin kie-min pûn Yî-set-lie̍t ngìn-mìn. Kì ha min-lin pûn ngài-têu ke chú-siên, oi chiông Kì ke fap-li̍t chhòn-pûn chṳ́-sûn,

⁶ pûn heu-thoi ngìn yû-hó ho̍k-si̍p, yu chhòn-pûn kì-têu ke chṳ́-sûn.

⁷ Án-ngiòng, kì-têu ya voi sin-kho Song-ti, m̀-voi m̀ ki-tet Song-ti só-cho ke sṳ, fán-chón voi chûn-sú Kì ke kie-min.

⁸ Kì-têu chang m̀-voi chhiong chú-siên yit-yong; kì-têu he ngang-kiáng phoi-ngia̍k ke pak-siang, tui Song-ti mò kiên-thin ke sin-sîm, tui Kì ya mò yún-kiú ke chûng-sîm.

⁹ Yî-fap-lièn ke chṳ́-sûn sûi-yèn yû kiûng-chien, chúng-he khôi-chan ke-ngit chhiu chón-sṳ̂n thò-chéu.

¹⁰ Kì-têu mò chûn-sú Song-ti ke yok; kì-têu m̀ fu̍k-chhiùng Kì ke kau-sṳ.

¹¹ Kì-têu m̀ ki-tet Kì só-cho ke-têu sṳ-chhìn, m̀ ki-tet Kì hàng pûn kì-têu khon ke sṳ̀n-chiak.

¹² Song-ti chhai Só-ôn ke phìn-ngièn, chhai Âi-khi̍p, chhai kì-têu chú-siên ke mien-chhièn hàng sṳ̀n-chiak.

¹³ Kì chiông hói fûn-khôi, tai-liâng kì-têu ko-hi; Kì sṳ́ hói-súi chhiong chhiòng-piak án-ngiòng khî-tén.

¹⁴ Ngit-sṳ̀-thèu, Kì yung yùn-chhái tai-liâng kì-têu; am-pû-sṳ̀, Kì yung fó-kông yîn-thô kì-têu.

¹⁵ Kì chhai khóng-yâ sṳ́ phàn-sa̍k lie̍t-khôi, pûn kì-têu yû chhiong chhṳ̂m-yên án-tô ke súi hó-lîm.

¹⁶ Kì sṳ́ phàn-sa̍k phun-chhut chhin-tô súi, chhiong hò-pa súi án-ngiòng liù-tén hâ.

¹⁷ Chúng-he, kì-têu hàn ki-siu̍k tet-chhui Song-ti, chhai khóng-yâ phoi-ngia̍k Chṳ-kô-chá.

¹⁸ Kì-têu ku-yi sṳ-tham Song-ti, sùi-sîm só-oi ke thó sṳ̍t-vu̍t.

¹⁹ Kì-têu siet-thu̍k Song-ti, kóng: “Song-ti nèn chhai khóng-yâ phan chok-si̍t mâ?

²⁰ Yû-yáng, Kì sṳ̍t-chhai yû tá phàn-sa̍k, pûn súi phun-chhut, chhiong hò-pa súi liù-tén hâ; chúng-he Kì hàn-yû phan-fap pûn ngài-têu liòng-sṳ̍t mâ? Kì yû fap-thu vi Kì ke chṳ́-mìn yi-phi ngiuk mâ?”

²¹ Song-chú thâng-tó liá-ke fa chhiu thai fat-khién. Kì yung fó kûng-kit Kì ke chṳ́-mìn Ngâ-kok; Kì tui Yî-set-lie̍t khién-to fó-hi tông-chho̍k;

²² yîn-vi kì-têu m̀ siông-sin Song-ti, ya m̀ yí-kho Kì ke chṳ́n-kiu.

²³ Chúng-he, Kì hàn-he hiong thiên ha-lin, fûn-fu tá-khôi thiên-mùn;

²⁴ Kì tui thiên-táng su kì-têu liòng-sṳ̍t, kong-hâ mâ-nâ lòi yông-yuk kì-têu.

²⁵ Ngìn chhiu sṳ̍t-tó thiên-sṳ́ ke sṳ̍t-vu̍t; he Song-ti pûn kì-têu tet-tó páu-chiuk.

²⁶ Kì siên pûn thiên-khûng chhôi-hí tûng-fûng, yu yung khièn-nèn ham nàm-fûng chhôi-lòi.

²⁷ Kì sṳ́ ngiuk chhiong chhṳ̀n-fôi án-ngiòng kong hâ-lòi, sṳ́ fî-niâu chhiong hói-sâ án-tô su-pûn kì-têu;

²⁸ Kì sṳ́ fî-niâu lo̍k chhai yàng-fòng chûng, chhai kì-têu pu-phùng ke si chû-vì.

²⁹ Kì-têu chhiòn-phu yû-hó sṳ̍t, sṳ̍t-to páu-pi̍t-pi̍t; Song-ti cheu kì-têu só thâm-oi ke su-pûn kì-têu.

³⁰ Chúng-he kì-têu hàn tông thâm-sṳ̍t, kì-têu ke choi hàn chheu-tén ke sṳ̀,

³¹ Song-ti chhiu tui kì-têu thai fat-khién, chhṳ̀-sí kì-têu tông-chûng ke hó-hon, sû-thet Yî-set-lie̍t chui yû-siu ke heu-sâng-ngìn.

³² Sûi-yèn kîn-li̍t liá yit-chhiet, kì-têu hàn-he ki-siu̍k fam-chhui; chhiu-son fat-sên liá-têu khì-sṳ, kì-têu hàn-he m̀-hén siông-sin.

³³ Só-yî Kì sṳ́ kì-têu ke ngièn-ngit pien-cho hî-khûng, sṳ́ kì-têu ke sâng-miang fut-yèn-kiên tù-tó châi-nan.

³⁴ Kì yit chhṳ̀-ngìn ke sṳ̀, kì-têu chhiu khiù-ham Kì; kì-têu fí-kói, pet-chhiet chhìm-khiù Song-ti.

³⁵ Kì-têu sióng-hí Song-ti he kì-têu ke phàn-sa̍k, Chṳ-kô ke Song-ti he kì-têu ke kiu-su̍k-chá.

³⁶ Chúng-he kì-têu kóng fâ-liâu phien Kì; kì-têu tui Kì kóng hî-ká ke fa.

³⁷ Kì-têu tui Kì chhin mò chûng-sîm, ya mò chṳ̂n-sṳ̍t sú Kì ke yok.

³⁸ Sûi-yèn án-ngiòng, Song-ti thung-siak Kì ke chṳ́-mìn: Kì sa-miên kì-têu ke chhui, mò sêu-me̍t kì-têu; yit-pái yu yit-pái, Kì ngiûn-tén mò thai fat-khién.

³⁹ Kì thí-sit kì-têu put-ko he ngiuk-sṳ̂n thin-thin, chhiong yit-chhṳn fûng, chhôi ko-hi chhiu mò to-chón-lòi.

⁴⁰ Kì-têu chhai khóng-yâ chai-sâm phoi-ngia̍k Song-ti; kì-têu yit-chhṳ̍t chhai sâ-mo̍k sṳ́ Kì sông-sîm!

⁴¹ Kì-têu yit-pái yu yit-pái sṳ-tham Song-ti, ngiâ Yî-set-lie̍t ke Chṳ-sṳn-chá thai fat-khién.

⁴² Kì-têu m̀ ki-tet Kì vù-khiùng ke thai-nèn, pin Kì kiu kì-têu thot-lì sù-thi̍t ke ngit-è.

⁴³ Kì-têu m̀ ki-tet Kì chhai Âi-khi̍p hàng ke sṳ̀n-chiak, pin Kì chhai Só-ôn phìn-ngièn só-cho ke khì-sṳ:

⁴⁴ Kì chiông hò-pa ke súi pien-cho hiet, sṳ́ Âi-khi̍p-ngìn lîm m̀-tet.

⁴⁵ Kì sṳ́ vû-yìn kûi-khiùn lòi khiàm-tuk kì-têu, sṳ́ hà-mà châu-tha̍p kì-têu ke thièn-thi.

⁴⁶ Kì sṳ́ kì-têu ke ńg-kuk pûn se chhó-máng sṳ̍t-thet, ham thai chhó-máng chiông kì-têu ke thièn-yèn sún chhiang-chhiang.

⁴⁷ Kì yung pên-pho̍k fí-me̍t kì-têu ke phù-thò-su, lo̍k sông lòi tá-fái kì-têu ke vù-fâ-kó-su.

⁴⁸ Kì yung pên-pho̍k te̍p-sí kì-têu ke ngiù-khiùn, yu yung ngiap-lang sông-hoi kì-têu ke yòng-khiùn.

⁴⁹ Kì hiong kì-têu fat-chhut lie̍t-nu, su-hi, châi-fo; Kì ke thai fat-khién chhiong sí ke sṳ́-chá yit-yong tá-kit kì-têu.

⁵⁰ Kì mò chai ngiûn-tén Kì ke nu-hi; Kì m̀-hén ngièu kì-têu ke sin-miang; Kì sṳ́ kì-têu pot-vûn lòi sí-thet.

⁵¹ Kì chhṳ̀-sí Âi-khi̍p tak-kâ ke chóng-chṳ́, chhiu-he Hàm vuk-hâ yúng-chong ke thèu-thôi.

⁵² Heu-lòi, Kì chhiu-chhiong mu̍k-chá yit-yong, chiông chhṳ-kâ ke chṳ́-mìn tai chhut-lòi, ya tai-liâng kì-têu kîn-ko khóng-yâ.

⁵³ Chhai Kì ke tai-liâng chṳ̂-ha, kì-têu chhin phìn-ôn, mò-kiâng mò-sèu; chúng-he kì-têu ke thi̍t-ngìn chhiu pûn hói-súi chim-sí chhiang-chhiang.

⁵⁴ Kì thu kì-têu to Kì ke sṳn-thi, lòi-to Kì chhîn-chhṳ chṳ̂n-fu̍k ke sân.

⁵⁵ Kì chhai Kì chṳ́-mìn ke mien-chhièn chiông ngoi-chhu̍k-ngìn kiuk-chéu, chiông ke thú-thi fûn-phi pûn Kì ke chṳ́-mìn, chiông ngoi-chhu̍k-ngìn ke kâ-yèn kâu-pûn Yî-set-lie̍t ke kok kî-chhu̍k.

⁵⁶ Chúng-he, kì-têu sṳ-tham Chṳ-kô ke Song-ti, phoi-ngia̍k Kì, m̀-hén fu̍k-chhiùng Kì ke kie-min.

⁵⁷ Kì-têu thùng chú-siên yit-yong phoi-ngia̍k, mò chûng-sîm; kì-têu chhiong sûng-thet ke kiûng yit-yong kho m̀-tet.

⁵⁸ Kì-têu hí ngoi-pâng sṳ̀n-mìn ke chi-thàn lòi ngiâ Kì fat-khién; kì-têu yung tiâu-khiet ke ngiéu-siong lòi yîn-hí Kì ke chhit-tu.

⁵⁹ Song-ti yit thâng-tó chhiu fat-khién, chiông Yî-set-lie̍t vàn-chhiòn hi-chhie̍t.

⁶⁰ Kì fit-thet ke hí chhai Sṳ-lò ke sṳn-só, chhiu-he Kì chhai ngìn-kiên só tap ke chong-phùng.

⁶¹ Ke chông-hién Kì ke khièn-nèn lâu yùng-kông ke yok-khui, Kì yù-chhai kì pûn thi̍t-ngìn chhióng-chéu.

⁶² Kì tui chhṳ-kâ ke chṳ́-mìn fat-khién, pûn kì-têu sí chhai tô-kiam chṳ̂-ha.

⁶³ Kì-têu ke heu-sâng pûn chan-fó sêu-me̍t; kì-têu ke moi-é chhìm-mò ngìn hó-ka.

⁶⁴ Kì-têu ke chi-sṳ̂ pûn tô-kiam chhṳ̀-sí; kì-têu chûng-kiên ke koá-fu mò-fap kieu.

⁶⁵ Chui-heu, Chú chhiong soi-siáng yit-yong, chhiong yúng-sṳ chiú-heu chhîn-siáng.

⁶⁶ Kì tá-thui Kì ke thi̍t-ngìn, pûn kì-têu yún-yén kien-seu.

⁶⁷ Kì hi-chhie̍t Yok-sit ke heu-thoi, mò kién-sién Yî-fap-lièn kî-chhu̍k.

⁶⁸ Kì kién-sién ke he Yù-thai kî-chhu̍k, hàn-yû Kì só-siak ke Siak-ôn-sân.

⁶⁹ Kì chhai ke-vi hí sṳn-thien, kô-to tù-thiên, chhiong thai-thi khî-to chhai-chhai, chhṳ̍t-to yún-yén.

⁷⁰ Kì kién-sién Kì ke phu̍k-ngìn Thai-ví, tui yòng-làn tông-chûng tho̍k kì chhut-lòi,

⁷¹ pûn kì m̀-sṳ́ chai chóng yòng-khiùn, li̍p kì cho Yî-set-lie̍t ke vòng, cho Song-ti chṳ́-mìn ke mu̍k-chá.

⁷² Thai-ví chhiòn-sîm mu̍k-yông kì-têu; kì chhin chîn-mìn tai-liâng kì-têu.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan