Bìoball air-loidhne

Sṳ̂-phiên 51 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Khì-khiù Sa-chhui
Siên-tî Nâ-tân chit-phi Thai-ví lâu Pha̍t-sṳ-pâ thûng-kiên yî-heu, Thai-ví cho liá-sú sṳ̂-kô, kâu-pûn Sṳn-kô Chhui-chóng.

¹ Song-ti â, khiù Ngì lìn-mén ngài, yîn-vi Ngì yû put-pien ke chhṳ̀-oi! Khiù Ngì chhu̍t-thet ngài ke ko-fam, yîn-vi Ngì yû fûng-sṳn ke chhṳ̀-pî!

² Khiù Ngì sé-thet ngài ke chhui-ko, sé-chhiang ngài yit-chhiet ke chhui-ok!

³ Yîn-vi, ngài tî chhṳ-kâ ke ko-fam; ngài ke chhui-ok sòng chhai ngài mien-chhièn.

⁴ Ngài só-fam ke chhui chhiu-he thu̍k-thu̍k tet-chhui Ngì; ngài só-cho ke he Ngì khon-cho sià-ok ke sṳ. Só-yî, Ngì sṳ́m-phan ngài he lî-só-tông-yèn ke; Ngì chit-fa̍t ngài ya he ngài chhui-yû-yin-tet ke.

⁵ Ngài yit chhut-se chhiu he chhui-ngìn, hàn chhai mû-thôi yí-kîn yû-chhui.

⁶ Ngì só yêu-khiù ke he nui-chhai ke sṳ̀n-sṳ̍t; khiù Ngì kâu ngài, sṳ́ ngài sîm-chûng tet-tó chṳ-fi.

⁷ Khiù Ngì chhu̍t-thet ngài ke chhui, pûn ngài tet-tó chhiang-li; khiù Ngì sé-chhiang ngài, pûn ngài pí siet kha-pha̍k.

⁸ Khiù Ngì pûn ngài thâng-tó fôn-hí khoai-lo̍k ke sâng; sûi-yèn Ngì yû tá-sui ngài, khiù Ngì sṳ́ ngài chhùng-sîn tet-tó khoai-lo̍k.

⁹ Khiù Ngì êm-mien, m̀-hó khon ngài ke chhui, chhu̍t-thet ngài yit-chhiet ke chhui-ok.

¹⁰ Song-ti â, khiù Ngì vi ngài chho sùn-kiet ke sîm, su-pûn ngài chhiòn-sîn lâu chûng-sṳ̀n ke lìn.

¹¹ Khiù Ngì m̀-hó kiuk ngài lì-khôi Ngì ke mien-chhièn; m̀-hó chiông Ngì ke Sṳn-Lìn tui ngài sû chón-hi.

¹² Chai yit-pái chiông Ngì kiu-ên ke fôn-hí su-pûn ngài, sṳ́ ngài ke lìn lo̍k-yi lòi sun-fu̍k Ngì.

¹³ Án-ngiòng, ngài oi chiông Ngì ke tho-lu chṳ́-sṳ chhui-ngìn; kì-têu chhiu voi kûi-sun Ngì.

¹⁴ Song-ti â, Ngì he chṳ́n-kiu ngài ke Song-ti; khiù Ngì sa-miên ngài ke sí-chhui; ngài chhiu oi thai-sâng kô-siung Ngì ke kûng-ngi.

¹⁵ Chú â, khiù Ngì khôi ngài ke choi, ngài chhiu voi chhòn-yòng Ngì ke hó miàng-sâng.

¹⁶ Ngì mò fôn-hí chi-vu̍t, na-he oi, ngài chhiu voi hien; sêu-fa-chi ya m̀-he Ngì só kak-yi ke.

¹⁷ Song-ti â, ngài só-hien ke chi chhiu-he yù-sông pho-sui ke lìn; Song-ti â, yù-sông fí-kói ke sîm, Ngì m̀ voi khî-chhie̍t.

¹⁸ Song-ti â, khiù Ngì yung chhṳ̀-oi hó khoán-thai Siak-ôn; khiù Ngì chhùng-kien Yâ-lu-sat-lâng ke sàng-chhiòng.

¹⁹ Ke-sṳ̀, Ngì chhiu voi ye̍t-na̍p kûng-ngi ke sên-ngì lâu chhiòn-sên ke sêu-fa-chi; ke-sṳ̀, chhiu voi yû kûng-ngiù hien chhai Ngì ke chi-thàn-táng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan