Bìoball air-loidhne

Sṳ̂-phiên 39 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Fam-nan chûng ke Fí-kói
Thai-ví ke sṳ̂, kâu-pûn Sṳn-kô Chhui-chóng Yâ-thu-tun.

¹ Ngài sṳt kóng: “Ngài oi kiún-sṳ́m ngài ke hàng-vì, miên-tet ngài ke sa̍t-mà fam-chhui; fái-ngìn chhai ngài mien-chhièn ke sṳ̀, ngài oi fûng-tén choi m̀ chhut-sâng.”

² Ngài tiâm-tiâm mò chhut-sâng, hó-fa ya m̀-kóng; chúng-he ngài ke thung-khú ye̍t-lòi ye̍t li-hoi,

³ lièn ngài ke tî-poi ya chhûng-mân sîm-fó. Ngài sióng-lòi sióng-hi, sîm-fó kín chho̍k, ngài chhiu khôi-choi kóng:

⁴ “Song-chú â, ngài yû-hó sṳ̍t-to kí-tô se? Khiù Ngì chṳ́-sṳ ngài kí-sṳ̀ oi ko-sṳ̂n nè? Pûn ngài tî ngài ke ngìn-sên to-tái kí-tón!”

⁵ Khon â, Ngì pûn ngài ke ngìn-sên chṳ́-yû kí pâ-chóng chhòng! Chhai Ngì khon-lòi, ngài yit-sên ke sṳ̀-kiên chhâ-m̀-tô he làng. Sṳ-sṳ̍t-song, ngìn-sên chhiu-chhiong théu yit-héu hi án-kiú thin-thin!

⁶ Ngìn-sên sṳ̍t-chi chhiu-he fèu-yùn: Mò-hàn chhṳ̍t-chha̍t, chúng-he kiet-khiu̍k ya he hî-khûng; chit-chhùn chhòi-pó, m̀-tî voi pûn má-ngìn chiap-hi.

⁷ Chú â, ngài hàn ngióng-mong má-ke? Ngài só-yû ke phan-mong chhai Ngì!

⁸ Khiù Ngì kiu ngài thot-lì yit-chhiet ko-fam, m̀-hó pûn ngong-tong ngìn lòi sâu-nat ngài.

⁹ Ngài oi tiâm-tiâm, mò-oi khôi-choi, yîn-vi he Ngì sṳ́ ngài su-khú.

¹⁰ Khiù Ngì m̀-hó ki-siu̍k chit-fa̍t ngài; ngài pûn Ngì tá-to pan-sâng pan-sí!

¹¹ Ngì chit-fa̍t ngìn ke chhui-ok lòi kón-kau kì, sṳ́ kì kak-yi ke chhiong pûn chu-chhùng chu-thet. Sṳ̍t-chhai ô, ngìn-sên chhiu-chhiong théu yit-héu hi!

¹² Song-chú â, khiù Ngì thâng ngài ke khì-tó, khiù Ngì liù-sîm lòi-thâng ngài ke khiù-ham; khiù Ngì m̀-hó tiâm-tiâm yù-chhai ngài kieu! Yîn-vi, chhai Ngì mien-chhièn ngài chhiu he yit-ke chhut-ngoi-ngìn, chhiong ngài ke lie̍t-chú yit-yong, he sṳ-kiên ke ko-lu-hak.

¹³ Khiù Ngì m̀-hó muk chṳm-chṳm kín-hìm ngài! Chhai ngài lì-khôi, mò chhôi sṳ-kiên yî-chhièn, ngài chang yû-hó séu-khó hióng-su ôn-lo̍k!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan