Sṳ̂-phiên 38 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Tù-tó Châi-nan ke Khì-tó
Thai-ví khiù Chú ki-ngiam ke sṳ̂.

¹ Song-chú â, m̀-hó fat-khién lòi chit-phi ngài; khiù Ngì m̀-hó thai fat-khién lòi chit-fa̍t ngài!

² Ngì ke chien sa-ngi̍p ngài án-chhṳ̂m; Ngì ke sú chak-tén ngài án-chhûng.

³ Ngì thai fat-khién sṳ́ ngài mân-sṳ̂n chho̍k-sông; ngài ke chhui-ok hoi ngài kut-thèu sôn-thung.

⁴ Ngài ke chhui thia̍p hí-lòi pí ngài ke thèu-nà kha-kô; chhui-ngiak ke chhûng-tâm chiông ngài chak-to khî m̀ hí-lòi.

⁵ Yîn-vi ngài ke ngong-tong, sông-héu sâng-nùng chhu-thet.

⁶ Ngài thung-to tú-sṳ́ nám-tén, poi kû-kû, kûi-ngit mò-kat mò-sat, hàng-lòi hàng-hi.

⁷ Ngài ke yêu-sṳ̂n chhiong pûn fó sêu, chṳ-to mân-sṳ̂n chho̍k-sông.

⁸ Ngài kûi-sṳ̂n mò-li̍t, ngiôn chì-chì; sîm-kôn vut-chut, thung-to kín-chhên.

⁹ Chú â, Ngì tî ngài ke sîm-ngien; Ngì thâng-tó ngài thai-sâng than-sit.

¹⁰ Ngài sîm-kôn po̍k-po̍k-thiàu, chhiòn-mò ngièn-hi; ngài ke muk-chû ya kín-lòi kín-mùng.

¹¹ Chhîn-chhit phèn-yû m̀-hén mien-tui ngài ke phiang-thung; kak-piak lìn-sa ya he khiung-yong khî-to yén-yén.

¹² Chhìm kî-fi sû ngài miang ke sat lò-mióng; sióng-oi sông-hoi ngài ke yu kín-hak ngài, chhiùng-chó to-am sat kúi-kie tui-fu ngài.

¹³ Ngài chhiong ngí-lûng ke, mò fap-thu thâng, yu chhiong choi-á ke, mò fap-thu kóng;

¹⁴ ngài sàng-cho thâng m̀-tó ke ngìn, lièn ngài ke choi ya m̀-voi en.

¹⁵ Song-chú â, ngài só ngióng-mong ke chhiu-he Ngì! Chú — ngài ke Song-ti â, Ngì thin-chho̍k voi en ngài!

¹⁶ Yîn-vi ngài sṳt khiù: “Mo̍k pûn tui-thi̍t yîn-vi ngài pot-phiang yòng-yòng tet-yi; mo̍k pûn kì-têu yîn-vi ngài vang lo̍k-hi lòi khoâ-khiéu.”

¹⁷ Yîn-vi thung-khú yit-chhṳ̍t mò lì-khôi ngài, ngài sùi-sṳ̀ tû yû khó-nèn vang lo̍k-hi.

¹⁸ Ngài sṳ̀n-ngin chhṳ-kâ ke chhui-ok, yu yîn-vi ngài ke chhui yù-sèu.

¹⁹ Ngài ke tui-thi̍t yúng-chong yu tông yû-li̍t; mò-yèn mò-ku yen-hen ngài ke chhin-tô.

²⁰ Yî-ok po-san ke ngìn thùng ngài chok-tui, yîn-vi ngài só chûi-khiù ke he liòng-san.

²¹ Song-chú â, khiù Ngì m̀-hó piong-thet ngài! Ngài ke Song-ti â, m̀-hó lì-khôi ngài án-yén!

²² Chú â, ngài ke chṳ́n-kiu-chá â, khiù Ngì kiak-kiak lòi pông-chhu ngài!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan