Bìoball air-loidhne

Sṳ̂-phiên 35 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Khiù Pông-chhu ke Khì-tó
Thai-ví ke sṳ̂.

¹ Song-chú â, khiù Ngì cho ngài ke-têu tui-thi̍t ke tui-thi̍t! Khiù Ngì kûng-kit ke-têu kûng-kit ngài ke ngìn!

² Khiù Ngì nâ-tén thai-se ke tún-phài, hong-hí-lòi pông-chhu ngài.

³ Khiù Ngì khià-hí Ngì ke chhòng-màu lâu thai pú-thèu, kûng-kit ke-têu tûi ngài ke ngìn. Khiù Ngì tui ngài pó-chṳn kóng: “Ngài voi kiu ngì.”

⁴ Ngien sióng-oi sû ngài miang ke ngìn sṳt-mong kien-seu! Ngien sat-kie oi hoi ngài ke ngìn lau-khui su vú-yu̍k!

⁵ Song-chú ke sṳ́-chá kiuk kì-têu ke sṳ̀, ngien kì-têu chhiong lùng-hông pûn fûng chhôi-san.

⁶ Song-chú ke sṳ́-chá tûi kì-têu ke sṳ̀, ngien kì-têu chéu ke lu yu-am yu-va̍t.

⁷ Kì-têu mò-yèn mò-ku sat lò-mióng oi chok ngài; kì-têu mò-yèn mò-ku yet ham-chiáng oi hoi ngài.

⁸ Ngien châi-nan fut-yèn chṳ̂-kiên lìm-to kì-têu; ngien kì-têu pûn chhṳ-kâ ke lò-mióng chhàn-tó, tiet-lo̍k chhṳ-kâ yet ke ham-chiáng lòi me̍t-mòng.

⁹ Ke-sṳ̀, ngài oi yîn-vi Song-chú lòi fôn-hí, yîn-vi Kì chṳ́n-kiu ngài lòi khoai-lo̍k!

¹⁰ Ngài oi tui sîm-tái hiong Song-chú ko-pha̍k kóng: “Song-chú â, má-ngìn cho-tet thùng Ngì pí nè? Ngì pó-fu ngiôn-ngio̍k ke ngìn miên-su khiòng-phau-chá ke khî-fu; Ngì pó-fu ngiôn-ngio̍k khiùng-khú ke ngìn miên-su ap-pet-chá ke pok-siok.”

¹¹ Tông-ok ke ngìn hong-hí-lòi cho ká kien-chṳn; kì-têu phàn-mun ngài pin mò fam-ko ke chhui.

¹² Kì-têu yung-ok po-san, hoi ngài sîm-sṳ̀n kû-tân chhie̍t-mong!

¹³ Siên-chhièn, kì-têu pot-phiang ke sṳ̀, ngài chok mà-sâm péu-sṳ ôi-sông, ngài kim-sṳ̍t lòi khiet-khú chhṳ-kâ; ngài vi kì-têu khì-tó ke sṳ̀, thèu-nà lài-lài,

¹⁴ chhiong-he vi-tó phèn-yû ya-he hiûng-thi pî-sông; ngài chhut-ngi̍p ôi-sông, hàng-lu poi kû-kû, chhiong ngìn vi-tó chhṳ-kâ ke â-mê ôi-tho yit-yong.

¹⁵ Chúng-he, ngài tù-tó châi-nan ke sṳ̀, kì-têu sa chhi-si̍p lòi sâu-nat ngài; lièn ngài m̀-sṳt ke ngìn ya lòi kûng-kit ngài, kì-têu kín kûng-kit ngài, chhiong oi chhá-thet ngài.

¹⁶ Chhiu-chhiong mò thiên-liòng ke ngìn sâu-nat pâi-kiok ke, kì-têu hàn yen-hen ngài, tui ngài ngâu-ngà chhiet-chhṳ́.

¹⁷ Song-chú â, Ngì oi khon-to kí-sṳ̀ chang chhut-sú? Khiù Ngì chṳ́n-kiu ngài thot-lì kì-têu ke pet-hoi, tui liá-khiùn sṳ̂-é chûng chhióng-kiu ngài ke sin-miang!

¹⁸ Án-ngiòng, ngài chhiu chhai chhi-fi chûng kám-chhia Ngì; ngài oi chhai fi-chung ke mien-chhièn chan-mî Ngì.

¹⁹ Mo̍k pûn ke-têu fâ-liâu ke sù-thi̍t yîn-vi ngài ke sṳt-phai seu mí-mí! Mo̍k pûn mò-yèn mò-ku hen ngài ke yîn-vi ngài ke thung-khú tá-ngién-koái!

²⁰ Yîn-vi kì-têu mò kóng fò-phìn ke fa, fán-chón sat-kie hoi ke-têu ló-sṳ̍t-pak.

²¹ Kì-têu ok khià-khià ngu-ko ngài, kóng: “Ôi, ôi! Ngài-têu chhîn-ngién khon-tó lé!”

²² Song-chú â, Ngì yí-kîn khon-tó lé; khiù Ngì m̀-hó tiâm-tiâm m̀ chhut-sâng! Chú â, m̀-hó lì-khôi ngài án-yén!

²³ Ngài ke Song-ti â, hó-siáng lé, vi ngài lòi phien-fu; ngài ke Chú â, hó hong lé, vi ngài lòi sṳ̂n-yên!

²⁴ Song-chú — ngài ke Song-ti â, khiù Ngì cheu Ngì ke kûng-ngi phan ngài mò-chhui; khiù Ngì m̀-hó pûn ke-têu sù-thi̍t tui ngài khoâ-khiéu.

²⁵ Mo̍k pûn kì-têu sîm-kôn sióng: “Â-hâ! Liá chhiu-he ngài-têu só-oi ke!” Mo̍k pûn kì-têu kóng: “Ngài-têu yí-kîn chiông kì thûn-thet lé!”

²⁶ Ngien só-yû fôn-hí ngài su-khú ke ngìn lau-khui su vú-yu̍k! Ngien só-yû hiong ngài chhṳ-kô chhṳ-thai ke ngìn kien-seu sṳt mien-chṳ́!

²⁷ Ngien ke-têu fôn-hí ngài tet-tó sṳ̂n-yên ke fôn-fû khoai-lo̍k! Ngien kì-têu kín-kóng: “Song-chú he yin-tông su chûn-chhùng ke, yîn-vi Kì fôn-hí Kì ke phu̍k-ngìn phìn-ôn!”

²⁸ Án-ngiòng, ngài chhiu oi kóng-hí Ngì ke kûng-ngi; mò-lun ngit-ya, ngài oi chan-mî Ngì!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan