Sṳ̂-phiên 21 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Kô-siung Sṳn-li
Thai-ví ke sṳ̂, kâu-pûn Sṳn-kô Chhui-chóng.

¹ Song-chú â, vòng yîn-vi Ngì su ke li̍t-liong fôn-hí; kì yîn-vi Ngì só-su ke sṳn-li fî-sòng khoai-lo̍k.

² Kì ke sîm-ngien, Ngì vi kì sṳ̀n-chhiòn; choi só-khiù ke, Ngì ya tap-yin kì.

³ Ngì su-pûn kì khi̍t-thai ke hen-fuk chiap-thai kì, yu chiông kîm miên-liù tai chhai kì ke thèu-nà-táng.

⁴ Kì tui Ngì khiù su-ngièn, Ngì chhiu su-pûn kì; Ngì sṳ́ kì chhòng-su, yèn-to yún-yún yén-yén.

⁵ Kì yîn-vi Ngì só-su ke sṳn-li mân-yû yùng-kông; Ngì yu chiông chûn-yùng lâu vî-ngiàm kâ-pûn kì.

⁶ Ngì su kì ke thai fuk-hi vù-khiùng vù-chhin; Ngì lâu kì thùng-chhai pûn kì chhûng-mân khoai-lo̍k.

⁷ Yîn-vi vòng yû sin-kho Song-chú; thûng-ko Chṳ-kô-chá ke chhṳ̀-oi, kì ke vòng-khièn m̀-voi yèu-thung.

⁸ Ngì oi chhut-sú tui-fu Ngì yit-chhiet ke sù-thi̍t; Ngì ke yu-sú oi chok ke-têu hen Ngì ke ngìn.

⁹ Ngì yit chhut-hien, oi sṳ́ kì-têu chhiong lo̍k chhai fó-lù tî-poi. Song-chú oi thai fat-khién lòi thûn-me̍t kì-têu; lie̍t-fó oi chiông kì-têu sêu-to chhiang-chhiang.

¹⁰ Ngì oi tui thi-song me̍t-chhin kì-têu ke chṳ́-sûn; Ngì oi tui ngìn-kiên chhṳ̀-thet kì-têu ke heu-thoi.

¹¹ Chhiu-son sù-thi̍t sat kúi-kie oi tui-fu Ngì, kì-têu ke yîm-mèu ya mò khó-nèn sṳ̀n-kûng.

¹² Ngì yit lâi-kiûng tui-chún kì-têu ke thèu-nà, kì-têu chhiu voi chón-sṳ̂n chéu-to chhiang-chhiang.

¹³ Song-chú â, ngien Ngì hién-mìn Ngì ke li̍t-liong! Ngài-têu oi ngìm-sṳ̂ kô-siung Ngì ke khièn-nèn.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan