Sṳ̂-phiên 139 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Vù-só Put-tî ke Song-ti
Thai-ví ke sṳ̂, kâu-pûn Sṳn-kô Chhui-chóng.

¹ Song-chú â, Ngì yû sṳ-ngiam ngài, Ngì ngin-sṳt ngài.

² Ngài ke yit-kí yit-thung, Ngì chhiòn-phu tî; lì-khôi án yén, Ngì ya tî ngài ke sîm-sṳ̂.

³ Mò-lun ngài cho-se ya-he hiû-sit, Ngì yit-chhṳ̍t khon-ku ngài; ngài yit-chhiet só-cho ke, Ngì chhiòn-phu tî.

⁴ Song-chú â, ngài màng kóng, Ngì chhiu tî ngài ke yi-sṳ.

⁵ Ngì chhai ngài si chû-vì pó-fu ngài; Ngì yung Ngì ke khièn-nèn pó-yu ngài.

⁶ Ngì ngin-sṳt ngài fî-sòng chha̍t-tái, chhêu-ko ngài só-nèn lî-kié ke.

⁷ Ngài oi hi nai-vi chang sám tet-khôi Ngì ke Lìn? Ngài oi chéu-to nai-vi chang sám tet-khôi Ngì ke mien?

⁸ Ngài na-he sông-to thiên-táng, Ngì yit-thin chhai ke-vi; ngài na-he hâ-to yîm-kiên, Ngì ya voi chhai ke-vi.

⁹ Ngài chhiu-he pî-to tûng-phién ke thiên-ngài, ya-he he̍t chhai sî-phién ke hói-kok,

¹⁰ Ngì ke sú ya yit-thin voi chhai ke-vi tai-liâng ngài; Ngì ke yu-sú chhie̍t-tui voi chhai ke-vi fù-chhṳ̀ ngài.

¹¹ Ngài na-he kóng: “Vû-am yit-thin voi châ-tén ngài, ngài chû-vì ke kông-mìn voi pien-cho vû-am”,

¹² chúng-he tui Ngì lòi kóng, vû-am m̀-son vû-am, am-pû-thèu lâu ngit-sṳ̀-thèu khiung-yong án kông. Vû-am lâu kông-mìn tui Ngì lòi-khon he khiung-yong ke.

¹³ Ngài ke ńg-chhong-liuk-fú he Ngì chho ke; chhai mû-thôi chûng Ngì sṳ́ ngài sàng-hìn.

¹⁴ Ngài siung-chan Ngì, yîn-vi ngài ke su-chho tet-ngìn-vi yu sṳ̀n-khì; Ngì ke chok-vì sṳ̍t-chhai khì-meu, liá he ngài ke sîm chhṳ̂m tî ke!

¹⁵ Ngài chhai mû-thôi ke tî-poi tiâm-tiâm sàng-hìn, Ngì ya chhin chhîn-chhú; chhiong-he chhai chhin-chhṳ̂m ke thi-tái-hâ chṳ-chho ke, ya màn Ngì m̀-ko.

¹⁶ Ngài chhut-se yî-chhièn, Ngì ke muk-chû yí-kîn khon-tó ngài ke hìn-thí; ngìn-sên màng khôi-sṳ́, Ngì chhiu vi ngài tá-son, ki chhai Ngì ke sû-hong.

¹⁷ Song-ti â, Ngì ke yi-ngiam sṳ̍t-chhai chhṳ̂m-o! Ngì ke sîm-sṳ̂ sṳ̍t-chhai chṳ̂n-nàn thûi-son!

¹⁸ Ngài na-he son khon-é, yit-thin pí hói-sâ kha-tô; chhiu-he son to-tái, mò chhîn-chhú, ngài hàn-he lâu Ngì thùng-chhai.

¹⁹ Song-ti â, ngài chṳ̂n hî-mong Ngì chiông fái-ngìn sû-thet! Ngài chhin hî-mong Ngì sṳ́ hiûng-ok ke ngìn lì-khôi ngài!

²⁰ Kì-têu kóng fái-fa ngiâ Ngì; kì-têu khôi-choi siet-thu̍k Ngì.

²¹ Song-chú â, ngài ngióng-pân yen-hen ke-têu yen-hen Ngì ke ngìn! Ngài ngióng-pân nâu ke-têu phoi-ngia̍k Ngì ke ngìn!

²² Ngài yen-hen kì-têu to-tái, chiông kì-têu khon-cho sù-thi̍t.

²³ Song-ti â, khiù Ngì sṳ-ngiam ngài, liáu-kié ngài ke sîm-sṳ̂; kháu-ngiam ngài, mìn-pha̍k ngài ke yi-ngiam.

²⁴ Khon ngài tî-poi yû má-ke fái sîm-sṳ̂ mò; khiù Ngì tai-liâng ngài hàng yún-sên ke tho-lu.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan