Sṳ̂-phiên 118 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Vi Sṳn-li Kám-chhia Khì-tó

¹ Oi kám-chhia Song-chú, yîn-vi Kì he chṳ-san; Kì ke chhṳ̀-oi yún-yén chhòng-chhùn!

² Ngien Yî-set-lie̍t-ngìn kóng: “Kì ke chhṳ̀-oi yún-yén chhòng-chhùn!”

³ Ngien Â-lùn-kâ ke chung chi-sṳ̂ kóng: “Kì ke chhṳ̀-oi yún-yén chhòng-chhùn!”

⁴ Ngien só-yû kin-vi Song-chú ke ngìn kóng: “Kì ke chhṳ̀-oi yún-yén chhòng-chhùn!”

⁵ Ngài chhai kip-nan chûng khiù Song-chú; Kì chhiu en ngài, pûn ngài chhṳ-yù.

⁶ Song-chú lâu ngài thùng-chhai, ngài chhiu m̀-sṳ́ kiâng; ngìn nèn tui ngài ngióng-pân nò?

⁷ Song-chú thùng ngài khiung-ha, Kì pông-chhu ngài; ngài voi khon-tó thi̍t-ngìn ke sṳt-phai.

⁸ Khiù Song-chú pí-yu, yàng-ko yí-kho sṳ-ngìn.

⁹ Khiù Song-chú pí-yu, yàng-ko yí-kho vòng-chṳ́.

¹⁰ Lie̍t-koet pâu-vì ngài; ngài yí-kho Song-chú ke miàng chiáu-me̍t kì-têu!

¹¹ Kì-têu tui si-mien pâu-vì ngài; ngài yí-kho Song-chú ke miàng chiáu-me̍t kì-têu!

¹² Kì-têu chhiong phûng-é yê-kông tá-chhṳn pâu-vì ngài, yu chhiong net-chhùng chho̍k-fó kín-sêu; ngài yí-kho Song-chú ke miàng chiáu-me̍t kì-têu!

¹³ Kì-têu chhin-miang kûng-kit ngài, oi tá-vang ngài; chúng-he Song-chú pông-chhu ngài.

¹⁴ Song-chú he ngài ke li̍t-liong, ngài ke sṳ̂-kô; Kì he ngài ke kiu-chú!

¹⁵ Song-chú chṳ́-mìn ke chong-phùng tú, yû fôn-fû sṳn-li ke sâng kóng: “Song-chú hién-chhut Kì ke thai-nèn lé!

¹⁶ Song-chú ke nèn-li̍t sṳ́ ngài-têu tá-yàng; Song-chú hién-chhut Kì ke thai-nèn lé!”

¹⁷ Ngài m̀-voi chṳ-to sí, ngài voi sâng hâ-hi, lòi siên-yòng Song-chú ke chok-vì.

¹⁸ Song-chú sṳt ngiàm-ngiàm hìn-fa̍t ngài, chúng-he mò sṳ́ ngài sí-thet.

¹⁹ Vi ngài tá-khôi sṳn-thien ke mùn; ngài oi ngi̍p-hi kám-chhia Song-chú!

²⁰ Liá mùn he Song-chú ke mùn; chṳ́-yû ngi-ngìn chang cho-tet ngi̍p-hi.

²¹ Song-chú â, ngài oi kám-chhia Ngì, yîn-vi Ngì en ngài; Ngì he ngài ke kiu-chú!

²² Nài-súi sṳ̂-fu só fit-thet ke liá-te sa̍k-thèu, yí-kîn sàng-cho thi-kî chûng chui chhung-yeu ke.

²³ Liá he Song-chú ke chok-vì, he ngióng-pân khì-meu ke sṳ â!

²⁴ Liá he Song-chú só-thin ke ngit-chṳ́; ngài-têu oi fôn-fôn hí-hí lòi khin-chuk!

²⁵ Song-chú â, ngài-têu khiù Ngì, khiù Ngì lòi chṳ́n-kiu! Song-chú â, khiù Ngì pûn ngài-têu sun-li sṳ̀n-kûng!

²⁶ Ngien Song-chú su-fuk pûn ke fung Chú miàng lòi ke! Ngài-têu tui Song-chú ke sṳn-thien chuk-fuk ngì-têu!

²⁷ Song-chú he Song-ti; Kì su-pûn ngài-têu kông-mìn. Oi nâ-tén su-kî khôi-sṳ́ ngài-têu ke khin-tién, hàng to chi-thàn sùn hi.

²⁸ Ngì he ngài ke Song-ti, ngài oi kám-chhia Ngì! Ngài ke Song-ti â, ngài oi siên-yòng Ngì ke ví-thai!

²⁹ Oi kám-chhia Song-chú, yîn-vi Kì he chṳ-san; Kì ke chhṳ̀-oi yún-yén chhòng-chhùn!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan