Sṳ̂-phiên 109 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Fam-nan chûng ke Khiù-ham
Thai-ví ke sṳ̂, kâu-pûn Sṳn-kô Chhui-chóng.

¹ Ngài só siung-chan ke Song-ti â, khiù Ngì m̀-hó yit-chhṳ̍t tiâm-tiâm.

² Sià-ok kúi-cha ke ngìn kûng-kit ngài. Kì-têu kóng fâ-liâu lòi fí-pong ngài,

³ yung ok-thu̍k ke fa lòi chung-sông ngài; kì-têu mò-yèn mò-ku kûng-kit ngài.

⁴ Ngài siak kì-têu, vi kì-têu khì-tó, chúng-he, kì-têu sa thùng ngài chok-tui.

⁵ Kì-têu yung-ok po-san, yung yen-hen po oi-sîm.

⁶ Khiù Ngì phai mò kûng-chṳn ke fap-kôn lòi sṳ́m-phan ngài ke sù-thi̍t, yung yit-ke thùng kì chok-tui ke ngìn lòi ko kì.

⁷ Ngien kì su sṳ́m-phan, pûn-ngìn thin-chhui; ngien kì ke khì-tó ya son fam-chhui!

⁸ Ngien kì ke su-miang suk-tón, phe̍t-ngìn chhióng kì ke chṳt-vi!

⁹ Ngien kì ke chṳ́-ńg pien kû-yì, kì ke pû-ngiòng sàng-cho koá-fu!

¹⁰ Ngien kì ke chṳ́-ńg liù-long cho khiet-sṳ̍t, tui khiet-sṳ̍t-liàu tî-poi pûn-ngìn kiuk chhut-lòi!

¹¹ Ngien chai-chú nâ-chéu kì só-yû ke chhòi-sán, sâng-fun-ngìn chhióng-chéu kì lò-luk só-tet ke!

¹² Ngien kì tet m̀-tó ngìn ke chhṳ̀-pî, kì ke kû-yì tet m̀-tó lìn-mén!

¹³ Ngien kì ke heu-thoi chhiòn-phu chhie̍t-thet, kì ke siang chhòn m̀-to thi-ngi thoi!

¹⁴ Ngien Song-chú ki-tén kiâ chú-siên ke chhui-ok, mo̍k m̀ ki-tet kiâ mê ke ko-fam!

¹⁵ Ngien Song-chú yún-yén ki-tén kì-têu ke chhui, sṳ́ sṳ-kiên-ngìn vàn-chhiòn m̀ ki-tet kì-têu!

¹⁶ Yîn-vi kì chhiùng-lòi m̀-sṳt sióng-tó chhṳ̀-pî, chṳ́-yû tî ap-pet chhôi-ko ke khiùng-khú-ngìn, sṳm-chṳ sat-hoi sông-sîm mò yí-kho ke ngìn.

¹⁷ Kì chhin-hau chu-chú, ngien chu-chú lìm-to kì! Kì m̀-hén chuk-fuk, ngien chuk-fuk yén-lì kì!

¹⁸ Kì yung chu-chú lòi chông-phi chhṳ-kâ, chhiong chok ngoi-phàu; ngien chu-chú chhiong súi yit-yong liù-ngi̍p kì ke sṳ̂n-thí, chhiong yù án-ngiòng yit-chhṳ̍t theu-ngi̍p kì ke kut-thèu!

¹⁹ Ngien chu-chú chhiong sâm án-ngiòng ngiàm-tén kì, chhiong yêu-tai yit-yong sòng-sòng khún-tén kì!

²⁰ Ngien Song-chú án-ngiòng chit-fa̍t ngài ke-têu tui-thi̍t, po-yin ke-têu kóng fái-fa kûng-kit ngài ke ngìn.

²¹ Chúng-he, Chṳ-kô ke Song-chú â, khiù Ngì yîn-vi Ngì ke miàng lòi pông-chhu ngài, cheu Ngì chṳ-san ke chhṳ̀-oi lòi chṳ́n-kiu ngài!

²² Yîn-vi ngài khiùng-khú mò yí-kho; ngài ke nui-sîm sông-thung chṳ-khi̍t.

²³ Ngài chhiong lìm-am ke ngit-yáng chhiam-chhiam sêu-sṳt, chhiong yit-chak chhó-máng yit-yong pûn-ngìn fin-thet.

²⁴ Ngài kim-sṳ̍t to chhit-thèu sôn-ngiôn, sṳ̂n-thí chheu-to chhûn phì-pâu-kut.

²⁵ Sù-thi̍t khon-tó ngài chhiu seu ngài; kì-têu kín yèu-thèu vú-yu̍k ngài.

²⁶ Song-chú — ngài ke Song-ti â, khiù Ngì pông-chhu ngài; khiù Ngì cheu Ngì put-pien ke chhṳ̀-oi chṳ́n-kiu ngài!

²⁷ Pûn ngài ke sù-thi̍t tî liá he Ngì ke thai-nèn, liá-khien sṳ he Ngì — Song-chú chhṳ-kâ só-hàng ke.

²⁸ Chhiu-son kì-têu chu-chú ngài, Ngì hàn-he oi chuk-fuk ngài. Ngien pet-hoi ngài ke ngìn kien-seu, Ngì ke phu̍k-ngìn sa tet-tó fôn-hí.

²⁹ Ngien ngài ke-têu sù-thi̍t chok-tén siû-yu̍k, pûn kien-seu chhiong ngoi-phàu án-ngiòng pâu-tén.

³⁰ Ngài oi chhut-sâng thai-thai kám-chhia Song-chú; ngài oi chhai thai chhi-fi chûng chan-mî Kì,

³¹ yîn-vi Kì vi khiùng-khú ke ngìn sṳ̂n-yên, kiu kì thot-lì thin kì sí-chhui ke ngìn.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan