Sṳ̂-phiên 107 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

THI-ŃG KIÉN (Sṳ̂-phiên 107–150 Phiên) Siung-chan Song-ti ke Chṳ-san

¹ “Oi kám-chhia Song-chú, yîn-vi Kì he chṳ-san; Kì ke chhṳ̀-oi yún-yén chhòng-chhùn!”

² Song-chú só kiu-su̍k ke ngìn â, ngì-têu oi án-ngiòng kín-kóng! Kì kiu ngì-têu thot-lì sù-thi̍t ke sú;

³ Kì tui tûng, sî, nàm, pet, tai ngì-têu tui kok thi-fông to-chón-lòi.

⁴ Yû-têu ngìn mì-sṳt chhai mò-ngìn he̍t ke khóng-yâ, chhìm m̀-tó lu hó-hi yû-ngìn he̍t ke sàng-sṳ.

⁵ Kì-têu tú-kî yu choi-châu, chhiòn-mò pan-si̍t ke hî-mong.

⁶ Chhai kip-nan chûng, kì-têu khiù-ham Song-chú, Kì chhiu chṳ́n-kiu kì-têu thot-lì khú-nan.

⁷ Kì tai-liâng kì-têu hàng chhṳ̍t-lu, hi-to yû-ngìn he̍t ke sàng-sṳ.

⁸ Kì-têu yin-tông kám-chhia Song-chú put-pien ke chhṳ̀-oi, siung-chan Kì vi-tó sṳ-kiên-ngìn só-hàng ke khì-sṳ.

⁹ Kì pûn choi-châu ke ngìn tet-tó mân-chiuk, pûn tú-kî ke sṳ̍t chhin-hó yu chhin-páu.

¹⁰ Yû-têu ngìn sên-fa̍t chhai vû-am lâu sí-yîm chûng, kì-têu su-chhin thung-khú yu pûn thiet-lien khún-tén,

¹¹ yîn-vi kì-têu phoi-ngia̍k Song-ti ke fa, méu-sṳ Chṳ-kô-chá ke chṳ́-yi.

¹² Song-ti yung lò-khú hòng-fu̍k kì-têu ke sîm; kì-têu vang-tó, chúng-he mò-ngìn lòi fù.

¹³ Chhai kip-nan chûng, kì-têu khiù-ham Song-chú, Kì chhiu chṳ́n-kiu kì-têu thot-lì khú-nan.

¹⁴ Kì tai kì-têu tui vû-am lâu sí-yîm chhut-lòi, yu pâng-thôn ke-têu khún-tén kì-têu ke só-lien.

¹⁵ Kì-têu yin-tông kám-chhia Song-chú put-pien ke chhṳ̀-oi, siung-chan Kì vi-tó sṳ-kiên-ngìn só-hàng ke khì-sṳ.

¹⁶ Kì tá-lan thùng-mùn, chám-thôn thiet mùn-chhôn.

¹⁷ Yû-têu ngìn yîn-vi chhṳ-kâ ke ko-fam pot-phiang, yu yîn-vi chhṳ-kâ ke chhui-ok su-khú;

¹⁸ kì-têu tui sṳ̍t-vu̍t chhiòn-mò vi-khiéu, kín-lòi chhiu kín-khiûn sí-mòng ke mùn.

¹⁹ Chhai kip-nan chûng, kì-têu khiù-ham Song-chú, Kì chhiu chṳ́n-kiu kì-têu thot-lì khú-nan.

²⁰ Kì kóng yit-ki fa chhiu yî-hó kì-têu, kiu kì-têu thot-lì sí-mòng.

²¹ Kì-têu yin-tông kám-chhia Song-chú put-pien ke chhṳ̀-oi, siung-chan Kì vi-tó sṳ-kiên-ngìn só-hàng ke khì-sṳ.

²² Kì-têu yin-tông oi tui Kì hien kám-chhia ke chi, yung fôn-hí ke sṳ̂-kô kóng-sot Kì ke chok-vì!

²³ Yû-têu ngìn chhô-sòn chhut-hói, chhai thai-hói tông-chûng mèu-sên.

²⁴ Kì-têu khon-tó Song-chú ke chok-vì, Kì chhai chhṳ̂m-hói só-hàng ke khì-sṳ.

²⁵ Kì yit min-lin, chhiu hí khòng-fûng, sṳ́ hói-long kie̍p-to pan-thiên-kô.

²⁶ Yit-ha chhûng-to kô-kô, yit-ha lo̍k-to chhṳ̂m-chhṳ̂m, ngùi-kip chṳ-khi̍t, kì-têu kiâng-to sṳ̀n-fùn sêu-san.

²⁷ Kì-têu vang-lòi vang-hi, chhiong sṳ̍t chiú-chui; kì-têu ke chhòi-thiau vàn-chhiòn tién m̀-chhut.

²⁸ Chhai kip-nan chûng, kì-têu khiù-ham Song-chú, Kì chhiu chṳ́n-kiu kì-têu thot-lì khú-nan.

²⁹ Kì sṳ́ khòng-fûng phìn-chhin, pûn hói-long tiâm hâ-lòi.

³⁰ Kì-têu fôn-hí na-thiên, yîn-vi fûng-phìn long-chhin; Kì chhiu thu kì-têu to só-oi hi ke hói-kóng.

³¹ Kì-têu yin-tông kám-chhia Song-chú put-pien ke chhṳ̀-oi, siung-chan Kì vi-tó sṳ-kiên-ngìn só-hàng ke khì-sṳ.

³² Kì-têu yin-tông chhai chóng-ló ke ngi-fi chûng chan-mî Kì, chhai ngìn-mìn ke thai-fi chûng chhòn-yòng Kì ke ví-thai.

³³ Song-chú sṳ́ hò-pa pien-cho khóng-yâ, sṳ́ chhièn-súi châu-thet sàng-cho hôn-thi,

³⁴ sṳ́ chhin phì ke thú-thi pien-cho yàm-thi, yîn-vi he̍t chhai ke-vi ke ngìn chhin fái.

³⁵ Kì sṳ́ sâ-mo̍k tak-vi yû pî-thòng, sṳ́ hôn-thi sàng-cho chhièn-súi chṳ̂ thi.

³⁶ Kì pûn tú-kî ke ngìn he̍t chhai ke-vi; ke-têu ngìn chhiu hí yit-chho sàng lòi-he̍t.

³⁷ Kì-têu kâng-thièn ve-chúng, chung phù-thò, tet-tó fî-sòng fûng-fu ke sû-sṳ̀n.

³⁸ Kì su-fuk pûn kì-têu ke chṳ́-sûn kín-tô; Kì sṳ́ kì-têu ke thèu-sâng yû-kâ mò-kám.

³⁹ Heu-lòi yîn-vi pûn-ngìn khî-fu, su-khú su-nan, Song-ti ke chṳ́-mìn chhiu kín kám-séu, kín chhôi-ko.

⁴⁰ Song-ti sṳ́ thúng-chhṳ-chá tù-tó vú-yu̍k, pûn kì-têu phêu-liù chhai mò-ngìn he̍t ke khóng-yâ.

⁴¹ Chúng-he, Kì chṳ́n-kiu khiùng-khú-ngìn thot-lì khú-nan, pûn kì-têu ke kâ-chhu̍k chhiong yòng-khiùn án hîn-vong.

⁴² Chṳn-chhṳ̍t ke ngìn khon-tó chhiu chhin fôn-hí; chúng-he fái-ngìn chhiòn-phu á-khiéu vù-ngièn.

⁴³ Ngien yû chṳ-fi ke ngìn chu-yi liá-têu sṳ-chhìn; ngien kì-têu sṳ̂-ngiam Song-chú put-pien ke chhṳ̀-oi.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan